1 Issiweř SIDI ak-d Musa, inna:

2 “Siweř ak-d ayt n Israil uca ini asen: ‘Necc d SIDI, AREBBI nwem! 3 War tteggem amecnaw mammec tteggen di temmurt n Miṣra mani tuɣa tzeddɣem kenniw, u war tteggem amecnaw mammec tteggen di temmurt n Kenɛan mani kenniw ɣa nedheɣ, uca war ggur ad teddarem ɛlaḥsab tiweṣṣa nsen. ^□   4 Ad teggem lfarayiḍ inu uca ad teḥḍam tiweṣṣa inu maḥend ad daysen tuyurem: Necc d SIDI, AREBBI nwem! 5 Ad teḥḍam tiweṣṣa inu d lfarayiḍ inu: bnadem nni tent itteggen, ad zzaysent iddar, Necc d SIDI! ^■  

6 Uřa d ijj ma ad dd-iqarreb ɣar ca n yijjen zi raǧ nnes ḥima ad issɛarra řɛar nnes: Necc d SIDI.

7 War ggur ad tessɛarrid řɛar n babac d řɛar n yemmac. Aqa-tt d yemmac, war ggur ad tessɛarrid řɛar nnes. 8 Řɛar n temɣart n baba ac war ggur ad t tessɛarrid. Aqa-t d řɛar n baba ac. ^■   9 X řɛar n učmac, yeǧis n babac niɣ yeǧis n yemmac, niɣ nettat tᵉttwaxřeq-dd di taddart niɣ barra i taddart, aqa řɛar nnes war t tessɛarri ca.

10 X řɛar n yeǧis n mmic niɣ n yeǧis n yeǧic, war ttessɛarri ca řɛar nsen minzi aqa d řɛar nnek.

11 War ttessɛarri ca řɛar n yeǧis n temɣart n babac, tenni dd-ittwaxeřqen i babac. Aqa-tt d učmac. ^■  

12 War ggur ad tessɛarrid řɛar n učmas n babac. Aqa-tt d raǧ n babac. ^■  

13 War ggur ad tessɛarrid řɛar n učmas n yemmac, minzi nettat d raǧ n yemmac.

14 War ggur ad tessɛarrid řɛar n umas n babac u war dd-ttqarrabed ɣar temɣart nnes, aqa-tt d ɛentic. ^■  

15 War ggur ad tessɛarrid řɛar n temɣart n mmic, aqa-tt d tamɣart n mmic. War ttessɛarri ca řɛar nnes. ^■  

16 War ggur ad tessɛarrid řɛar n temɣart n umac, aqa-t d řɛar n umac. ^■  

17 War tessɛarri ca řɛar n temɣart d yeǧis. War dd-ttawi ca yeǧis n mmis niɣ yeǧis n yeǧis, maḥend ad tessɛarrid řɛar nnes. Aqa atent d raǧ nnek, aqa-tt d ict n tmeɛmuč ifesden. ^■  

18 War dd-ttawi tamɣart d tacna ak-d učmas maḥend ad tt tɣenned ammu xmi i ɣa tessɛarrid řɛar nnes am ɛad teddar.

19 War dd-ttqarrab ca ɣar ict n temɣart xmi i ɣa teɛzeř ixef nnes zi ssibbet n řexmej nnes ḥima ad tessɛarrid řɛar nnes. ^■   20 War ttᵉṭṭeṣ ak-d temɣart n umqarreb nnek maɣar ammu zzayes i ɣa tfesded ixef nnek. ^■   21 War ttejjid arraw nnek ad ẓwan ɣar Mulak, war tessɛiǧid Isem n AREBBI nnek, Necc d SIDI! ^■   22 War ttᵉṭṭes ca ak-d ca n weryaz am tᵉtteṣṣed ak-d temɣart. Aqa-tt d jjɛifect. ^■   23 War fessed ca ixef nnek ak-d ca n řebhimet am tfeḥḥřed akides, u tamɣart war ttbeddi zzat i řebhimet maḥend ad tfesded ixef nnes zzayes. Aqa d ijj n uxeǧeḍ ifesden. ^■   24 War fessdem ca ixef nwem s marra timesřayin-a, minzi řegnus nni i ɣa ssuffɣeɣ zzat i uɣembub nwem, tuɣa fessden ixef nsen s marra timesřayin-a. 25 S uyenni tedweř temmurt tefsed uca Necc ad as xeǧṣeɣ řmuɛṣiyyet nnes uca ad tɛuqq temmurt imezdaɣ nnes. 26 Maca kenniw ad teḥḍam tiweṣṣa d lfarayiḍ inu, war tteggem uřa d ict n řḥajjet zi marra jjɛayef-a, niɣ wenni zi tarwa n temmurt uřa d abarrani nni izeddɣen di řwest nwem. ^■   27 Minzi iryazen n temmurt, inni tuɣa qbeř nwem, aqa ggin marra jjɛayef-a uca ammu i tedweř temmurt tefsed. 28 War ttejji tammurt ad kenniw tɛuqq umi tt tfessdem, am mammec tɛuqq temmurt řgens nni tuɣa din qbeř nwem. 29 Minzi marra inni iggin man wen ma zi jjɛayef-a, aqa řeɛmur, inni i ɣa iggin ammu, ad ttwaqeḍɛen zi řgens nsen. 30 Ad teḥḍam min d awem umureɣ maḥend war tḍeffarem tiweṣṣa yurṣuḍen am mammec tt ggin řegnus qbeř nwem. War zzaysent tfessdem ixef nwem. Necc d SIDI, AREBBI nwem!”