1 Issiweř SIDI ak-d Musa, inna:

2 “Siweř ak-d Harun d iḥenjiren nnes u ak-d marra ayt n Israil, ini asen: ‘Wa d awař i yumur SIDI, inna: 3 Kuř aryaz zi taddart n Israil, wenni iɣarṣen i ufunas niɣ izmar niɣ iɣayḍ di řmargeḥ niɣ wenni t iɣarṣen barra i řmargeḥ, 4 uca war t yiwi d tawhibt ɣar wadaf n Uqiḍun n Umsagar, maḥend ad t-i-dd issqarreb d tawhibt ɣar SIDI zzat n Tzeddiɣt n SIDI, ad as dd-ittwaḥseb idammen nni. Netta issizzeř idammen uca aryaz nni ad ittwaqess zi řgens nnes, 5 maḥend, xmi i ɣa qeddmen ayt n Israil tiɣarṣa nsen, tinni innumen ɣarrṣen barra deg iyyar, nitni ad tent awyen ɣar SIDI, ɣar ukehhan ɣar wadaf n Uqiḍun n Umsagar maḥend ad tent qeddmen din am tɣarṣa n řehna i SIDI. 6 Akehhan ad izeǧeɛ idammen x uɛalṭar n SIDI ɣar wadaf n Uqiḍun n Umsagar u netta ad issbexxar tadunt am ict n řefwaḥet ittfuḥen i SIDI. ^■   7 War ttqeddamen ɛad tiɣarṣa nsen i imuyan ittwazedɣen, inni ḍeffaren nitni am ayt n farq-ccɣeř. Ta d ict n tewṣeyyet i řebda i nitni i marra jjiřat nsen.’ 8 Ad asen tinid ɛawed: ‘Kuř aryaz n ayt n Israil u n ibarraniyyen inni iǧan di řwest nsen, wenni ixsen ad issbexxar ict n tɣarṣt n wecmaḍ niɣ min ma ṭaɣarṣt i ɣares, 9 uca war tt-i-dd-yiwi ɣar wadaf n Uqiḍun n Umsagar ḥima ad t issewjed i SIDI, aryaz nni ad ittwaqess zi řgens nnes.

10 Kuř ijj zi taddart n Israil niɣ zeg ibarraniyyen inni izeddɣen di řwest nsen, wenni i ɣa iccen idammen mammec mma ggin, Necc ad qeřbeɣ udem inu x wenni iccin idammen nni, uca ad t qeḍɛeɣ zi řwest n řgens nnes. ^■  

11 Minzi řeɛmar n arrimet deg idammen uca Necc wciɣ awem ten x uɛalṭar maḥend ad fdin x řeɛmur nwem, minzi idammen d ina i ɣa fdin x řeɛmar.

12 S uya aqa nniɣ i ayt n Israil: Uřa d ijj zzaywem war ittett zeg idammen uřa d abarrani i izeddɣen di řwest nwem, war ittett idammen.

13 Kuř ijj zeg ayt n Israil u zeg ibarraniyyen i izeddɣen di řwest nwem, wenni iymaren ijj n umuddar niɣ ijj n wejḍiḍ nni izemmar ad ittwacc, ad issizzeř idammen nnes uca ad ten issdduři s ucař.

14 Minzi řeɛmar n kuř aysum d idammen nnes, aqa aten d řeɛmar nnes. S uyenni nniɣ i ayt n Israil: ‘War ttᵉttem zeg idammen n mammec ma igga weysum!’, minzi řeɛmar n marra aysum d idammen nnes. Wenni zzaysen ɣa iccen, ad ittwaqess zi řgens nnes. ^■  

15 Marra wenni i ɣa iccen zeg ict n řxecbet niɣ zeg ijj n umuddar imezzqen, ma netta zi tarwa n temmurt niɣ d ijj n ubarrani, ad iṣebben arruḍ nnes uca ad issird ixef nnes s waman uca ad yiři ixmej ař tameddit. Awarni aya ad yiři izdeg. ^■  

16 Mařa war issird arruḍ u war issird arrimet nnes, xenni ad yarbu řmuɛṣiyyet nnes.’ “