1 Issiweř SIDI ak-d Musa awarni i řmewt n tnayen n iḥenjiren n Harun, awarni řami dd-qarrben nitni zzat i wudem n SIDI uca mmuten.^■   2 SIDI inna i Musa: “Siweř ak-d Harun, umac, ḥima war ittidef řebda ɣar Uqeddas daxeř i uřeḥḥaf, zzat i tqebbart n weṣřaḥ nni iǧan x Ttabut, ḥima war ittmetti ca, minzi Necc ttbaneɣ-dd deg ijj n useynu sennej i tqebbart n weṣřaḥ. ^■   3 S uya ad yadef Harun ɣar Uqeddas: s ijj n uyenduz, ameẓyan n ufunas, i tɣarṣt n ddenb uca s yijj n icarri i tɣarṣt n wecmaḍ. 4 Ad yarḍ arruḍ iqeddsen n řeqṭen uca ssarwař n řeqṭen ad yiři x arrimet nnes. Ad ibyes taḥezzamt n řeqṭen uca ad yarekkeb areẓẓet n řeqṭen. Aqa man aya d arruḍ iqeddsen. Mařa ad ten yarḍ, ittxeṣṣa as ad issird arrimet nnes s waman. 5 Ad iksi zi tmesmunt n ayt n Israil tnayen n iɣayḍen imeẓyanin i tɣarṣt n ddenb d ijj n icarri i tɣarṣt n wecmaḍ. 6 Ad dd-issqarreb Harun ayenduz n tɣarṣt n wecmaḍ, wenni iǧan i yixef nnes, uca ad ifdi x yixef nnes u x taddart nnes. ^□  ■   7 Xenni ad iksi tnayen n iɣayḍen uca ad ten igg zzat i wudem n SIDI ɣar wadaf n Uqiḍun n Umsagar. 8 Ad inḍar Harun taqedduḥt x tnayen n iɣayḍen, ict n tqedduḥt x SIDI u ict n tqedduḥt x iɣayḍ innufsřen. 9 Ad dd-issqarreb Harun iɣayḍ nni x dd-tewḍa taqedduḥt i SIDI uca ad t issewjed d tɣarṣt n ddenb.

10 Iɣayḍ i x dd-tewḍa taqedduḥt n iɣayḍ innufsřen, ad t igg iddar zzat i wudem n SIDI maḥend ad xas ifdi uca xenni ad t issekk am iɣayḍ innufsřen ɣar řexřa.

11 Uca ad dd-issqarreb Harun ayenduz i tɣarṣt n ddenb, wenni tuɣa i yixef nnes, uca ad ifdi x yixef nnes u x aytbab n taddart nnes uca ad iɣarṣ i uyenduz n tɣarṣt n ddenb, wenni iǧan i yixef nnes.

12 Ad iksi ɛawed ijj n řmejmar iccur s řefḥem itteḥduduqen n uɛalṭar zzat i wudem n SIDI uca ad iccur tnayen n ifassen nnes s řebxur azdad ittfuḥen uca ad yawi marra aya daxeř i uřeḥḥaf.

13 Ad igg řebxur x tmessi zzat i wudem n SIDI ḥima aseynu n řefwar n řebxur ad ideř taqebbart n weṣřaḥ i iǧan x Cchadet uca war ggur ad immet.

14 Ad iksi cwayt zeg idammen n uyenduz uca ad ten irucc s uḍaḍ nnes x wudem n tqebbart n weṣřaḥ ɣar uɣezdis n ccarq uca ɛawed ad irucc cwayt zeg idammen sebɛa n twařawin s uḍaḍ nnes zzat i tqebbart n weṣřaḥ. ^■  

15 Xenni ad iɣarṣ i iɣayḍ wenni iǧan i řgens uca ad yawi idammen ɣar daxeř i uřeḥḥaf uca ad igg s idammen nnes amecnaw mammec igga s idammen n uyenduz uca ad ten irucc x tqebbart n weṣřaḥ u zzat i tqebbart n weṣřaḥ.

16 Ammu i ɣa ifdi x Uqeddas di ṭṭweɛ n řḥajjat ixemjen n ayt n Israil u di ṭṭweɛ n ixeṭṭan u ɛlaḥsab marra ddnub nsen. Ammu i ɣa yegg di ssibbet n Uqiḍun n Umsagar, wenni iǧan di řwest n marra timesřayin ixemjen nsen.

17 Uřa d ijj n bnadem ma ad yiři ɛad deg Uqiḍun n Umsagar, zeg wami i ɣa yadef maḥend ad ifdi deg Uqeddas ař ɣa iffeɣ ɛawed. Ammu i ɣa ifdi x yixef nnes u x marra agraw n řgens n Israil.

18 Ggur ad iffeɣ ař uɛalṭar i iǧan zzat i wudem n SIDI uca ad xas ifdi. Ad iksi cwayt zeg idammen n uyenduz u cwayt zeg idammen n iɣayḍ uca ad issars aya x waccawen n uɛalṭar di min d as dd-innḍen.

19 Sebɛa n twařawin ggur ad xas irucc s uḍaḍ nnes cwayt zeg idammen uca ad t issizdeg u ad t issqeddes zi řexmej n ayt n Israil. 20 Umi ikemmeř lfidya x Uqeddas u x Uqiḍun n Umsagar u x uɛalṭar, ggur ad dd-issqarreb xenni iɣayḍ iddaren. 21 Ad issars Harun afus nnes x uzeǧif n iɣayḍ iddaren uca tiwa i uya ad inɛem x marra řmuɛṣiyyet n ayt n Israil d marra ixeṭṭan nsen i dd-yusin ak-d marra ddnub nsen uca ad ten issars x uzeǧif n iɣayḍ uca ad t issekk ɣar řexřa s ufus n ijj n weryaz wenni isswejden i ddegga. 22 Uca iɣayḍ ggur ad yawi ak-d ixef nnes marra řmuɛṣiyyet nsen ɣar ict n jjihet texřa. Netta ad issekk iɣayḍ ɣar řexřa.

23 Xenni ggur ad yadef Harun ɣar Uqiḍun n Umsagar uca ad ikkes arruḍ n řeqṭen, wenni yarḍ ḥima ad yadef ɣar Uqeddas, uca ad ten yejj din. 24 Ad issird arrimet nnes s waman deg wemcan amqeddas uca ad yarḍ arruḍ nnes. Xenni ad iffeɣ, ad issewjed taɣarṣt n wecmaḍ nnes d tɣarṣt n řgens uca ad ifdi x yixef nnes u x řgens. 25 Ad issbexxar tadunt n tɣarṣt n ddenb x uɛalṭar.

26 Wi dd-isekken iɣayḍ innufsřen, ad iṣebben arruḍ nnes, ad issird arrimet nnes s waman. Awarni as ad yadef ɣar řmargeḥ n řɛeskar.

27 Uca ayenduz n tɣarṣt n ddenb d iɣayḍ n ṭɣarṣt n ddenb, i zi ittwasidfen idammen nsen maḥend ad zzaysen ittwafdi deg Uqeddas, ad ten ssuffɣen barra i řmargeḥ n řɛeskar uca ad zzaysen sscemḍen iřmawen nsen d weysum nsen d umessař nsen s tmessi. ^■   28 Wi ten ɣa isscemḍen, ad iṣebben arruḍ nnes, ad issird arrimet nnes s waman. Awarni as ad yadef ɣar řmargeḥ n řɛeskar.

29 Ta d ict n tewṣeyyet i řebda i kenniw. Deg uyur wiss sebɛa, deg wass wiss ɛecra n uyur, ad tesswaḍɛem ixef nwem uca war tteggem uřa d ict n řxedmet, niɣ wenni dd-ixeřqen di temmurt uřa d abarrani nni izeddɣen di řwest nwem. ^■   30 Minzi deg wass nni ad xawem ittwafdi maḥend ad tᵉttwasizedgem. Kenniw marra ad tᵉttwasizedgem zzat i wudem n SIDI. 31 Ad yiři d ijj wass n ssebt, arraḥet tmun i kenniw. Ad tesswaḍɛem ixef nwem, aqa-tt d ict n tewṣeyyet i řebda. 32 Akehhan, wenni dehnen u řeqqmen nitni deg wemcan n babas maḥend ad yiři d akehhan, ad ifdi uca ad yarḍ arruḍ n řeqṭen, arruḍ iqeddsen. 33 Ad ifdi x Zzawect Iqeddsen u x Tqiḍunt n Umsagar u x uɛalṭar. Ad ifdi ɛawed x marra ikehhanen u x marra řgens n wegraw. 34 Ta d ict n tewṣeyyet i řebda i kenniw ḥima ad tefdim ict n twařa deg useggʷas x marra ayt n Israil i marra ddnub nsen.” Uca igga am mammec yumur SIDI i Musa. ^■