1 Issiweř SIDI ak-d Musa d Harun, inna:

2 “Mařa ḥed ɣares di teřmect n arrimet nnes aɛebbuz, niɣ ict n tḥebbuct, niɣ ijj n wengaz iccemřeř n teřmect, uca wanita izemmar ad idweř d uḍun n řbarṣ di teřmect n arrimet nnes, ad ittwandeh ɣar Harun, akehhan, niɣ ɣar yijjen zeg iḥenjiren nnes, ikehhanen. 3 Akehhan ad ixzar ɣar wuḍun di teřmect n arrimet nnes uca mařa iẓra aqa iẓuṭṭan deg wemcan n wuḍun dewřen d icemřařen uca iban wuḍun ɛad yuǧeɣ x teřmect n arrimet nnes, aqa xenni d uḍun n řbarṣ. Xmi t ɣa iẓar ukehhan, ad t ibarreḥ d amexmuj. 4 Maca mařa angaz iccemřeř di teřmect n arrimet nnes d acemřař u war yuǧiɣ x teřmect u iẓeṭṭan war dwiřen d icemřařen, xenni akehhan ad ibelleɛ x wenni di iǧa uḍun nni sebɛa n wussan. 5 Mařa iẓra i-t ukehhan deg wass wiss sebɛa uca iẓra aqa uḍun amenni iqqim, war imɣir wuḍun di teřmect, xenni ad t ibelleɛ ukehhan ɛawed sebɛa n wussan nneɣni. 6 Deg wass wiss sebɛa ad t iẓar ukehhan ɛawed uca mařa iban aqa uḍun yarsa uca war imɣir ɛad ktar x teřmect, xenni akehhan ad t ibarreḥ d amezdag. Tuɣa-tt d ict n tfuriy. Ad issird arruḍ nnes uca ad yiři izdig. 7 Maca mařa imɣar wuḍun aṭṭas x teřmect awarni t iẓra ukehhan di ṭṭweɛ n usizdeg nnes, ittxeṣṣa ad isscen ixef nnes i ukehhan twařa nneɣni. 8 Mařa iẓra ukehhan, aqa řehřac imɣar x teřmect, ad t ibarreḥ d amexmuj. Aqa-t d řehřac n řbarṣ i iǧa.

9 Mařa uḍun n řbarṣ aqa-t deg ijj n bnadem, ad t awyen ɣar ukehhan.

10 Mařa iẓra ukehhan, aqa aɛebbuz iban imřeř di teřmect uca iẓeṭṭan d icemřařen uca iban-dd weysum iddar deg uɛebbuz,

11 aqa-t d řbars ittutusen di teřmect n arrimet nnes uca akehhan ad zzayes ibarreḥ d amexmuj. War xas ittbelliɛ ca, minzi netta aqa ixmej.

12 Mařa yuyur řbarṣ x tiřmect marra uca idřa řbarṣ marra tiřmect n wenni ɣar iǧa uḍun zeg uzeǧif nnes ař iḍaren nnes, ař mani izemmar ad iẓar ukehhan s tiṭṭawin nnes,

13 uca iẓra i-t ukehhan, iẓra řbars idřa marra arrimet nnes, xenni netta ad ibarreḥ d amezdag i wenni di iǧa wuḍun. Tiřmect aqa-tt d tacemřač qaɛ. Netta aqa izdig.

14 Maca deg wass mani dayes i ɣa dd-iban weysum iddar, ad yiři ixmej.

15 Mařa iẓra ukehhan aysum nni iddar, ad t ibarreḥ d amexmuj. Aysum iddaren ixmej, aqa-t d řehřac n řbarṣ.

16 Maca xmi i ɣa ibeddeř weysum iddaren u idweř d acemřař, ittxeṣṣa as ad dd-yas ɣar ukehhan.

17 Mařa iẓra i-t ukehhan uca aqa amcan n uḍun imřeř, ad ibarreḥ ukehhan d amezdag i wenni di iǧa řehřac. Netta aqa izdig.

18 Mařa din x teřmect n weysum ict n tḥebbuct u tᵉttwasgenfa tanita,

19 uca deg wemcan n tḥebbuct idweř d ijj n uɛebbuz imřeř niɣ d ijj n wengaz iccemřeř, acemřař iruḥ ɣar tezweɣ, xenni ad iẓar ukehhan man aya. 20 Xmi t i ɣares i ɣa ixzar ukehhan uca iẓra aqa-t sadu teřmect uca iẓeṭṭan nnes d icemřařen, xenni akehhan ad t ibarreḥ d amexmuj, aqa-t d uḍun n řbarṣ wenni yuyuren s tḥebbuct. 21 Maca mařa iẓra i-t ukehhan uca war dayes yufi uřa d ijj n uẓeṭṭu d acemřař uca war idwiř yuǧeɣ x teřmect, maca idweř yarsa, xenni ad xas ibelleɛ ukehhan sebɛa n wussan. 22 Mařa tuyur x teřmect marra, xenni akehhan ad t ibarreḥ d amexmuj. Aqa-t d uḍun n řbarṣ. 23 Maca mařa angaz iccemřeř n teřmect iqqim deg wemcan nnes, war imɣir ca, aqa-t d ccamet n tḥebbuct uca akehhan ad t ibarreḥ d amezdag.

24 Niɣ mařa idweř di teřmect n arrimet ijj n uyezzim n wecmaḍ uca aysum iddaren n uyezzim n wecmaḍ idweř d ijj n wengaz iccemřeř, acemřař iruḥ ɣar tezweɣ niɣ d acemřař, 25 uca iẓra ukehhan man aya, uca xzar, iẓeṭṭan i iǧan deg wengaz iccemřeř aqa dewřen d icemřařen, uca iban-dd d amcan n wengaz yuǧeɣ di teřmect, aqa-t d řbarṣ wenni dd-iffɣen zeg uyezzim n wecmaḍ. Akehhan ad t ibarreḥ d amexmuj. Aqa-t d uḍun n řbarṣ. 26 Maca mařa akehhan iẓra man aya uca war ittwiři iẓeṭṭan icemřařen deg wengaz iccemřeř uca iẓra angaz war yuǧiɣ x teřmect uca tenneyřa, xenni ad xas ibelleɛ ukehhan sebɛa n wussan. 27 Deg wass wiss sebɛa ad t ixzar ukehhan uca mařa imɣar wengaz ktar x teřmect, akehhan ad t ibarreḥ d amexmuj. Aqa-t d uḍun n řbarṣ. 28 Maca mařa angaz immřeř iqqim deg wemcan nnes, war imɣir x teřmect uca yarsa, aqa-t d aɛebbuz n wecmaḍ. Akehhan ad t ibarreḥ d amezdag, minzi aqa-tt d ccamet n wecmaḍ.

29 Mařa ijj n weryaz niɣ ict n temɣart dayes uḍun deg uzeǧif niɣ di tmart 30 uca ixzar ukehhan uḍun, u xzar, aqa ittban yuǧeɣ di teřmect uca dayes iẓeṭṭan iwarɣen d izdaden, xenni akehhan ad t ibarreḥ d amexmuj. Aqa-t d anḍaw n ucewwaf, aqa-t d řbarṣ n uzeǧif niɣ n tmart. 31 Maca mařa ixzar ukehhan uḍun n wenḍaw n ucewwaf, iẓra aqa war yuǧiɣ di teřmect uca war dayes iẓeṭṭan ibarcanen, xenni ad xas ibelleɛ ukehhan x wenni di iǧa wuḍun n wenḍaw n ucewwaf sebɛa n wussan. 32 Ad iẓar ukehhan uḍun deg wass wiss sebɛa uca mařa iẓra, aqa anḍaw n ucewwaf war imɣir, war dayes yufi iẓeṭṭan iwarɣen uca anḍaw n ucewwaf war yuǧiɣ x teřmect, 33 xenni netta ad iḥeff i yixef nnes, maca amcan n wenḍaw n ucewwaf war t ittḥeffi ca uca akehhan ad ibelleɛ x wenni di iǧa wenḍaw n ucewwaf ɛad ict n twařa nneɣni i yijj n řmijař n sebɛa n wussan. 34 Deg wass wiss sebɛa ad ixzar ukehhan anḍaw n ucewwaf. Mařa iẓra aqa anḍaw n ucewwaf war imɣir ca, war yuǧiɣ x teřmect, xenni akehhan ad t ibarreh d amezdag. Ad issird arruḍ nnes uca ad yiři izdig. 35 Maca mařa anḍaw n ucewwaf imɣar aṭṭas x teřmect awarni i usizdeg nnes, 36 uca xmi ɣares i ɣa ixzar ukehhan uca iẓra anḍaw n ucewwaf imɣar x teřmect, xenni war yarezzu ukehhan x iẓeṭṭan iwraɣen ɛad. Netta aqa ixmej. 37 Maca mařa anḍaw n ucewwaf aqa iban-dd ibedd di tiṭṭawin nnes uca ffɣen-dd zzayes iẓeṭṭan ibarcanen, xenni aqa iggenfa s wenḍaw n ucewwaf uca netta aqa izdeg. Akehhan ad t ibarreḥ d amezdag.

38 Mařa banen-dd imucan ccemřeřen, iccemřeřen d icemřařen, di teřmect n ijj n weryaz niɣ n ict n temɣart, 39 uca iẓra ukehhan man aya uca iẓra aqa di teřmect n arrimet banen-dd imucan arsan, icemřařen, xenni aqa-tt d ict n tfuri n teřmect.Netta aqa izdeg.

40 Mařa iwḍa ucewwaf n uzeǧif n ijj n weryaz, aqa d aqeccar, xenni netta aqa izdig. 41 Mařa tanyart nnes iwḍa as ucewwaf, aqa tanyart nnes teqquccar, xenni netta aqa izdig. 42 Maca mařa din ijj n uḍun imřeř iruḥ ɣar tezweɣ x uzeǧif aqeccar niɣ x tenyart taqeccart, aqa xenni d řbarṣ nni dd-iffɣen x uzeǧif nnes aqeccar niɣ x tenyart nnes taqeccart. 43 Mařa ixzar i-t ukehhan uca iẓra aqa aɛebbuz n wuḍun imřeř, iruḥ ɣar tezweɣ x uzeǧif nnes aqeccar niɣ x tenyart nnes taqeccart, ittban-dd am řbarṣ n teřmect n arrimet, 44 xenni aqa aryaz d bu-řbarṣ i iǧa, netta aqa ixmej. Akehhan ad t ibarreḥ d amexmuj, uḍun aqa-t x uzeǧif nnes.

45 Ittxeṣṣa ad ittwacarreg warruḍ n bu-řbarṣ i di iǧa wuḍun uca ad iḍřeq i ucewwaf x uzeǧif nnes, ad iffar ayencic n sennej nnes, ad iřaɣa: ‘Amexmuj! amexmuj!’ ^■   46 Marra ussan i dayes i ɣa yiři wuḍun, ad yiři ixmej. Netta d amexmuj. Netta ad izdeɣ weḥḥdes uca tzeddiɣt nnes ad tiři barra i řmargeḥ n řɛeskar.

47 Mařa uḍun n řbarṣ deg ijj n warruḍ, deg ijj n warruḍ n taḍuft niɣ deg ijj n warruḍ n řeqṭen, 48 niɣ deg ufiřu d azirar niɣ deg ufiřu immuden, niɣ s řeqṭen niɣ s taḍuft, niɣ ɣar yiřem, niɣ ɣar mammec ma yiřem ittwasxedmen, 49 u ticti ittwawten deg warruḍ niɣ deg yiřem, niɣ ɣar ufiřu d azirar niɣ ɣar ufiřu immuden, niɣ di mammec ma n řqecɛet nni tteggen s yiřem, tezzizu niɣ tezweɣ, aqa-t d uḍun n řbarṣ. Ad ittwascen aya i ukehhan. 50 Akehhan ad ixzar ɣar wemcan n uḍun uca min iḍnen ad t ibelleɛ sebɛa n wussan. 51 Deg wass wiss sebɛa ad ixzar ɣar wuḍun. Mařa imɣar uḍun deg warruḍ, niɣ ɣar ufiřu d azirar niɣ ɣar ufiřu immuden, niɣ deg yiřem n mammec ma řqecɛet nni tteggen s yiřem, aqa uḍun d řbars iqesḥen i yeǧa, aqa ixmej. 52 Ad issecmeḍ arruḍ niɣ afiřu d azirar niɣ afiřu immuden, niɣ n taḍuft niɣ n řeqṭen i iǧa, niɣ mammec ma řqecɛet nni tteggen s yiřem i dayes tuɣa uḍun, minzi aqa-t d řbarṣ iqesḥen. Ittxeṣṣa ad ittwasecmeḍ s tmessi. 53 Maca mařa iẓra ukehhan man aya uca aqa uḍun war imɣir ca deg warruḍ, niɣ deg ufiřu d azirar niɣ deg ufiřu immuden, niɣ di mammec ma řqecɛet nni tteggen s yiřem, 54 xenni ad yumur ukehhan ad ssirden min di yeǧa wuḍun, uca awarni i man aya ad xas ibelleɛ twařa nneɣni řqedd n sebɛa n wussan. 55 Mařa iẓra ukehhan uḍun awarni i usird, uca iẓra uḍun war ibeddeř ca uca uḍun war imɣir, aqa man aya ixmej. Ittxeṣṣa ad t tessecmeḍed s tmessi. Aqa uḍun idweř yuǧeɣ ittᵉtt ɣar ḍeffar niɣ ɣar zzat. 56 Maca mařa ixzar ukehhan man aya uca iẓra belli uḍun yarsa awarni i usird, xenni ad t iqess zeg warruḍ, niɣ zeg yiřem, niɣ zeg ufiřu d azirar niɣ zeg ufiřu immuden. 57 Maca mařa iban wuḍun twařa nneɣni deg warruḍ, niɣ ɣar ufiřu d azirar niɣ ɣar ufiřu immuden, niɣ di mammec ma řqecɛet nni tteggen s yiřem, aqa idduqqez řbarṣ. Ittxeṣṣa ad tessecmeḍ s tmessi min dayes i iǧan uḍun. 58 Arruḍ, niɣ afiřu d azirar niɣ afiřu immuden, niɣ mammec ma řqecɛet nni tteggen s yiřem, wenni tessirded uca iruḥ xas wuḍun, ad t tessirded twařa nneɣni uca xenni ad yiři izdig.” 59 Wa d azerf n wuḍun n řbarṣ n warruḍ n taḍuft niɣ n řeqṭen, niɣ n ufiřu d azirar niɣ n ufiřu immuden, niɣ n mammec ma n řqecɛet nni tteggen s yiřem, maḥend xenni ad barrḥen s tezdeg nnes niɣ s řexmej nnes.