1 Issiweř SIDI ak-d Musa, inna:

2 “Siweř ak-d ayt n Israil, ini: “Xmi i ɣa teksi ict n temɣart ddeyset uca turuw-dd aḥenjir, ad tiři texmej sebɛa n wussan. Ad tiři texmej am deg wussan n weɛzař xmi xas idammen. 3 Deg wass wiss tmenya ittxeṣṣa ad ittwaxten aysum n řeɛdařyet nnes. ^■   4 Awarni i man aya ad teqqim třata u-třatin n wussan deg idammen n usizdeg nnes. War tᵉttḥidi walu zi min iǧan iqeddes u war tᵉttraḥ ɣar Zzawect Iqeddsen ař ɣa ttwakemmřen wussan n usizdeg nnes. 5 Mařa turuw-dd taḥenjirt, ad tiři texmej tnayen n simanat, amecnaw deg wussan n weɛzař nnes. Awarni man aya ad teqqim setta u-settin n wussan deg idammen n usizdeg nnes. ^□   6 Xmi i ɣa ttwakemmřen wussan n usizdeg n mmis niɣ n yeǧis, xenni ad tawi ijj n izmar n ijj n useggʷas am tɣarṣt n wecmaḍ niɣ ijj n wedbir d ameẓyan niɣ ijj n tejlilliḥt am tɣarṣt n ddenb ɣar ukehhan ɣar wadaf n Uqiḍun n Umsagar. 7 D netta ad dd-issqarreb man aya zzat i wudem n SIDI uca ad xas ifdi. Xenni ad ttwasizdeg s řɛunṣar n idammen nnes. Wa d azerf i tenni i ɣa yarwen ijj n mmis niɣ ict n yeǧis. ^□   8 Mařa war tiwiḍ ad tawi ijj zeg wuǧi, xenni ad tᵉṭṭef tnayen n tejlilliḥin niɣ tnayen n idbiren imeẓyanen, ijj i tɣarṣt n wecmaḍ u ijj i tɣarṣt n ddenb, uca akehhan ad xas ifdi. Xenni ad tiři tizdeg.” ^□