1 Issiweř SIDI ak-d Musa, inna:

2 “Wa d azerf n bu-řbarṣ i wass n usizdeg nnes. Ittxeṣṣa ad ittwandeh ɣar ukehhan ^■   3 uca ad iffeɣ ukehhan ɣar barra i řmargeḥ n řɛeskar. Xmi t i ɣa ixzar ukehhan uca iẓra belli aqa iggenfa wuḍun n řbarṣ n bu-řbarṣ, 4 xenni ad issekk ukehhan maḥend ad ksin i wenni i ɣa ittwasizedgen, tnayen n ijḍaḍ iddaren, izdigen, uřa d akeccuḍ n tcejjart n tengelt, d uzeggʷaɣ iḥedqen, d tɛelǧet. ^□   5 Ad yumur ukehhan maḥend ad ittwaɣarṣ ijj n wejḍiḍ deg ict n řqecɛet n třaxt, sennej i waman ittazzřen. 6 Xenni ad iksi ajḍiḍ iddaren d ukeccuḍ n tcejjart n tengelt d uzeggʷaɣ iḥedqen d tɛelǧet uca ad ten issuf ak-d wejḍiḍ iddaren deg idammen n wejḍiḍ i ittwaɣarṣen sennej i waman ittazzřen. 7 Ad irucc sebɛa n twařawin x wenni ittwasizedgen zi řbarṣ. Xenni ad t ibarreḥ d amezdag uca ad yarxu i wejḍiḍ iddaren maḥend ad iḍew sennej i wudem n yeyyar. 8 Uca wenni ittwasizedgen ad iṣebben arruḍ nnes uca ad iḥeff marra acewwaf nnes, ad issird ixef nnes s waman. Xenni ad yiři izdeg. Awarni as ad yadef di řmargeḥ n řɛeskar uca ad izdeɣ barra i uqiḍun nnes ɛad sebɛa n wussan.

9 Deg wass wiss sebɛa ad iḥeff marra acewwaf n uzeǧif nnes, d tmart nnes, d timmiwin n tiṭṭawin nnes, wah, ad iḥeff marra acewwaf nnes, ad iṣebben arruḍ nnes uca ad issird arrimet nnes s waman, xenni ad yiři izdeg.

10 Deg wass wiss tmenya ad iksi tnayen n izmaren kemmřen d ict n texsi icnan qaɛ n ijj useggʷas ak-d třata zi ɛecra n ijj n ifa n waren azdad am tewhibt n řɣiǧet ixeǧḍen s zzect, u ɛawed ijj n ulux n zzect.

11 Akehhan, wenni t issizedgen, ad yarr aryaz nni ittxeṣṣa ad ittwasizdeg ak-d marra aya zzat i wudem n SIDI ɣar wadaf n Uqiḍun n Umsagar.

12 Ad iksi ukehhan izmar nni uca ad t-i-dd issqarreb am tɣarṣt n umarwas ak-d ulux n zzect uca ad t issenhezz am tewhibt n wenhezzi zzat i wudem n SIDI.

13 Xenni ad iɣarṣ i izmar nni deg wemcan mani ɣarrṣen taɣarṣt n ddenb d tɣarṣt n wecmaḍ, deg wemcan amqeddas. Minzi taɣarṣt n umarwas, am tɣarṣt n ddenb, i ukehhan i teǧa, aqa-tt d tamqeddast qaɛ. ^■  

14 Ad iksi ukehhan cwayt zeg idammen n tɣarṣt n umarwas uca akehhan ad ten igg x iɣes n umezzuɣ afusi n wenni i ɣa ittwasizedgen uřa x yimez n ufus nnes afusi u x yimez n uḍar nnes afusi.

15 Amenni i ɣa iksi ukehhan ca zeg ulux n zzect uca ad tt inɣeř x třeqqa n ufus nnes azeřmaḍ.

16 Ad issuf ukehhan aḍaḍ nnes afusi s zzect nni ɣares deg ufus nnes azeřmaḍ uca ammu i ɣa irucc s uḍaḍ nnes cwayt zi zzect sebɛa n twařawin zzat i wudem n SIDI.

17 Uca min iqqimen zi zzect nni ɣares deg ufus nnes, ad tt igg ukehhan x iɣes n umezzuɣ afusi n wenni i ɣa ittwasizedgen uřa x yimez n ufus nnes afusi u x yimez n uḍar nnes afusi, x idammen n tɣarṣt n umarwas i xasen igga qbeř.

18 Min iqqimen n zzect nni iǧan ɣar ukehhan deg ufus nnes, ad tt inɣeř x uzeǧif n wenni i ɣa ittwassizedgen uca ammu i xas ɣa ifdi ukehhan zzat i wudem n SIDI. ^□  

19 Ad issewjed ukehhan xenni taɣarṣt n ddenb uca ad ifdi x wenni ittwasizedgen zi řexmej nnes. Awarni as ad iɣarṣ i tɣarṣt n wecmaḍ. 20 Ad issbexxar ukehhan taɣarṣt n wecmaḍ d tewhibt n řɣiǧet x uɛalṭar. Ammu i xas ɣa ifdi ukehhan uca ad yiři izdeg.

21 Mařa netta iẓřeḍ uca afus nnes war t issiweḍ, xenni ad iksi ijj n yizmar am tɣarṣt n umarwas maḥend ad xas ifdi am t igga d tewhibt n wenhezzi, uřa d ict n teɛcart n ijj n ifa waren azdad am tewhibt n řɣiǧet ixeǧḍen s zzect, ak-d ijj n ulux n zzect 22 d tnayen n tejlilliḥin niɣ tnayen n idbiren imeẓaynin, anect izemmar ufus nnes ad issiweḍ. Ict ad tiři d taɣarṣt n ddenb u tenneɣni ad tiři d taɣarṣt n wecmaḍ. 23 Deg wass wiss tmenya ad ten yawi di ṭṭweɛ n usizdeg nnes ɣar ukehhan ɣar wadaf n Uqiḍun n Umsagar, zzat i wudem n SIDI. 24 Ad iksi ukehhan izmar n tɣarṣt n umarwas d ulux nni n zzect uca akehhan ad ten issenhezz am tewhibt n wenhezzi zzat i wudem n SIDI. 25 Xenni ad iɣarṣ i izmar n tɣarṣt n umarwas uca akehhan ad iksi cwayt zeg idammen n tɣarṣt n umarwas, ad t yarr x iɣes n umezzuɣ afusi n wenni ittwasizedgen uřa x yimez n ufus nnes afusi u x yimez n uḍar nnes afusi. 26 Ad ifarreɣ ukehhan ca n zzect x třeqqa n ufus aẓeřmaḍ n yixef nnes. 27 S uḍaḍ nnes afusi ad irucc ukehhan s zzect nni ɣares deg ufus nnes aẓeřmaḍ sebɛa n twařawin zzat i wudem n SIDI. 28 Akehhan ad igg cwayt zi zzect nni ɣares iǧan deg ufus nnes x iɣes n umezzuɣ afusi n wenni ittwasizedgen uřa x yimez n ufus nnes afusi u x yimez n uḍar nnes afusi, deg wemcan nnit mani ttwaggen idammen n tɣarṣṭ n umarwas qbeř. 29 Min iqqimen zi zzect nni ɣar ukehhan deg ufus nnes, ad t igg x uzeǧif n wenni ittwasizedgen maḥend ad xas ifdi zzat i wudem n SIDI. 30 Xenni ad issewjed ijj zi tnayen n tejlilliḥin niɣ zeg idbiren imeẓyanen, anect umi izemmar ufus nnes ad t issiweḍ. 31 Zi min d as ɣa issiweḍ ufus nnes, ad yiři ijj i tɣarṣt n ddenb u wenneɣni i taɣarṣt n wecmaḍ, sennej i tewhibt n řɣiǧet. Ammu i ɣa ifdi ukehhan x wenni ittwasizedgen zzat i wudem n SIDI.”

32 Wa d azerf i wenni di iǧa wuḍun n řbarṣ uca afus nnes war izemmar ad issiweḍ i usizdeg nnes.

33 Issiweř SIDI ak-d Musa d Harun, inna:

34 “Xmi i ɣa tadfem di temmurt n Kenɛan, tenni d awem ɣa wceɣ d agřa, uca mařa ggiɣ necc uḍun n řbarṣ x ca n taddart n temmurt tenni ɣarwem d agřa, 35 ad dd-yas xenni wenni ɣar teǧa taddart nni, ad ixebbar akehhan, ad yini: ‘Ittɣiř ayi-dd axmi din ca n wuḍun di taddart.’ 36 Xenni akehhan ad issekk maḥend ad ssexwan taddart qbeř ma dd ɣa yas ukehhan s yixef nnes ḥima ad ixemm uḍun, ḥima war ittwasexmij marra min iǧan di taddart. Awarni as ad dd-yadef ukehhan maḥend ad ixemmem taddart. 37 Mařa ixzar uḍun uca iẓra aqa uḍun n řeḥyuḍ n taddart banen-dd dayes iḥufar zzizwen niɣ zewɣen, uǧɣen x wudem n řḥiḍ, 38 xenni ad iffeɣ ukehhan zi taddart nni zi wadaf n taddart uca ad iqqen taddart sebɛa n wussan. 39 Deg wass wiss sebɛa ad dd-idweř ukehhan uca mařa iẓra aqa uḍun ibezzeɛ x řeḥyuḍ n taddart, 40 xenni ad iweṣṣa ukehhan maḥend ad kksen iẓra mani iřseq wuḍun u ad ten nḍaren deg ijj n wemcan ixemjen barra i tendint. 41 Ad yejj ad qeccaren daxeř n taddart, ɣar marra iɣezdisen nnes, uca ad zeǧɛen abeǧaɛ i qeccaren, barra i tendint deg ijj n wemcan d amexmuj. 42 Xenni ad ksin iẓra nneɣni, ad ten ggen deg wemcan n iẓra \add nni iheřcen uca ad ksin abeǧaɛ nneɣni maḥend ad zzayes ḥenncen taddart. 43 Mařa uḍun idweř-dd uca issfuffi ɛawed di taddart awarni ma kksen iẓra u qeccaren taddart awarni řami tt ḥenncen, 44 xenni ad dd-yas ukehhan ad ixzar. Mařa iẓra, aqa uḍun ibezzeɛ di taddart, xenni aqa din ijj n řbarṣ iqesḥen di taddart. Aqa-tt texmej. 45 Ad hedmen taddart, iẓra nnes d tḥenya nnes d marra tarrist n taddart uca ad ssiggʷejen aya barra i tendint ɣar ijj n wemcan d amexmuj. 46 Wi i ɣa yadfen ɣar taddart deg ijj n wass zeg wussan awarni řami tᵉttwabelleɛ taddart, netta ad yiři ixmej ař tameddit. 47 Uca wenni i ɣa iṭṭṣen di taddart, ad iṣebben arruḍ nnes u wenni i ɣa iccen di taddart, ad issird arruḍ nnes. 48 Mařa yudef ukehhan maḥend ad tt ixzar uca iẓra aqa uḍun war imɣir di taddart, awarni řami ḥenncen taddart, xenni ad ibarreḥ ukehhan belli taddart tezdeg, minzi uḍun ittwasgenfa. 49 Ad iksi tnayen n ijḍaḍ d ukeccuḍ n tcejjart n tengelt d uzeggʷaɣ iḥedqen d tɛelǧet, maḥend ad zzaysen ikkes ddenb x taddart. ^□   50 Ad iɣarṣ i yijj n wejḍiḍ deg ict n řqecɛet n třaxt, sennej i waman iddaren. 51 Ad iksi akeccuḍ n tcejjart n tengelt d tɛelǧet d uzeggʷaɣ iḥedqen uřa d ajḍiḍ iddaren uca ad issuf marra aya deg idammen n wejḍiḍ ittwaɣarṣen u deg waman iddaren uca ad irucc taddart sebɛa n twařawin. 52 Ammu i ɣa ikkes ddenb x taddart s idammen n wejḍiḍ, s waman iddaren d wejḍiḍ iddaren d ukeccuḍ n tcejjart n tengelt d tɛelǧet d uzeggʷaɣ iḥedqen. 53 Ad yejj ajḍiḍ iddaren ad iḍwa barra i tendint sennej i wudem n yeyyar. Ammu i ɣa ifdi x taddart nni uca ad tiři tizdig.”

54 Wa d azerf x marra řehřacat n řbarṣ u x wenḍaw n ucewwaf, 55 x řbarṣ n arruḍ u n taddart, 56 i yijj n uɛebbuz, i yict n tḥebbuct u i yijj n wengaz iccemřeř n teřmect.

57 Azerf-a aqa i tɣuri deg wass i di ɣa yiři ḥed ixmej niɣ deg wass i di ɣa yiři ḥed izdeg. Wa d azerf n řbarṣ.