1 Baṣaliyil d Ahuliyab d kuř aryaz s wuř amiɣis, umi iwca SIDI tiɣit d řeɛqeř maḥend ad ssnen mammec i ɣa ggen marra řxedmet i tsexxart n Zzawect Iqeddsen, ggin marra am mammec ten yumur SIDI. 2 Musa iřaɣa-dd i Baṣaliyil d Ahuliyab d kuř aryaz s wuř amiɣis, umi igga SIDI tiɣit deg wuř nnes, uřa marra wenni umi inhezz wuř nnes, maḥend ad dd-yas ɣar řxedmet uca ad tt igg.

3 Nitni ksin zi zzat n wudem n Musa marra tawhibt nni ssgeɛɛden ayt n Israil i řxedmet i tsexxart n Zzawect Iqeddsen maḥend ad zzayes tt ggen. Uca aqa ɛad ggin ad as dd-awyen kuř ṣṣbeḥ tiwhibin s řxaḍar. 4 Xenni usin-dd marra iryazen imiɣisen, inni tuɣa iceɣřen x marra řxedmet n Zzawect Iqeddsen, kuř ijj zi řxedmet nni ggin nitni, ^□   5 uca ssiwřen ak-d Musa, nnan: “Řgens yiwi-dd ktar zi min ittxeṣṣan di ṭṭweɛ n řxedmet nni i d aneɣ yumur SIDI ḥima ad tt negg.” 6 Xenni yumur Musa ḥima ad barrḥen di řmargeḥ n řɛeskar, ad inin: “War tejji aryaz niɣ tamɣart ɛad ad yegg ca n řxedmet tenni i ɣa issgeɛɛed d tawhibt i Zzawect Iqeddsen!” Ammu i issbedd Musa řgens ad yawi ɛad ktar, 7 minzi cfa timesřayin nni dd-iwyen i marra řxedmet i ɣa ggen, aqa tceṭṭ ɛad ktar.

8 Jar yenni ɣar tuɣa řxedmet, aqa marra imiɣisen n wuř ggin Tazeddiɣt zi ɛecra n tjartiřin n řeqṭen azdad imuden u zeg ufiřu adeḥmi d urjuwani d uzeggʷaɣ iḥedqen ak-d ikiruben inni xasent igga am ijj n warcam n ufennan. ^□   9 Tuzzeggart n ict n tjartiřt tuɣa-tt tmentɛac n iɣaǧen u tiru n ict n tjartiřt tuɣa-t arebɛa n iɣaǧen u marra tijartiřin ɣarsent d řeɛbar d ijj. ^■  

10 Issmun xemsa n tjartiřin ict ak-d tenneɣni uca xemsa n tjartiřin issmun i-tent ɛawed ict ak-d tenneɣnit. ^□  

11 Xenni igga tisarawin ideḥmaniyyen di tma n yict n tjartiřt ɣar ṭṭarf ɣar useřqi uca amenni tent igga ɛawed di tma n tjartiřt nneɣni ɣar ṭṭarf, ɣar mani iǧa useřqi nneɣni. ^■  

12 Igga xemsin n tsarawin x tma n yict n tjartiřt d xemsin n tsarawin ɣar ṭṭarf n tjartiřt mani i ɣa tmun ak-d tenneɣnit. Tisarawin ṭṭfent nican ict di tenneɣnit. ^■  

13 Igga ɛawed xemsin n tsennarin n wureɣ uca issmun tijartiřin ict i tenneɣni s tsennarin uca ammu tedweř Tzeddiɣt d ict. ^■  

14 Igga ɛawed tijařtiřin n ccɛar n iɣayḍen, ad iřint d Aqiḍun x Tzeddiɣt. Igga ḥiṭac n tjartiřin.

15 Tuzzeggart n ict n tjartiřt tuɣa-tt třatin n iɣaǧen u tiru n ict n tjartiřt d arebɛa n iɣaǧen. Ḥiṭɛac n tjartiřin ɣarsent řeɛbar d ijj.

16 Netta issmun xemsa n tjartiřin weḥḥedsent u ɛawed setta n tjartiřin weḥḥedsent.

17 Igga xemsin n tsarawin x tma n tjartiřt taneggarut ɣar ṭṭarf n useřqi ak-d tenneɣni uca igga ɛawed xemsin n tsarawin x tma n tjartiřt ɣar ṭṭarf n useřqi nneɣni.

18 Igga ɛawed xemsin n tsennarin n nnḥas ḥima ad issmun Aqiḍun maḥend ad t yarr d ijjen. ^■  

19 Igga ɛawed ict n tseqqaft n iřmawen izeggʷaɣen n icarriyyen i Uqiḍun uca sennej i man aya ict n tseqqaft n iřmawen n ddenfiřat. ^■  

20 Igga tifeřwin i Tzeddiɣt s ukeccuḍ n ukasiya tinni ibedden nican. ^■   21 Tuzzeggart n ict n tefřewt tuɣa-tt ɛecra n iɣaǧen u tiru n yict n tefrewt d ijj n uɣiř d wezyen. ^■   22 Kuř tafřewt ɣares tnayen n iḍaren, inni issmunen ict ak-d tenneɣni am twečmatin. Ammu i igga s marra tifeřwin n Tzeddiɣt. ^■   23 Igga tifeřwin i Tzeddiɣt, ɛicrin n tfeřwin ɣar jjihet n ljanub, ɣar yeffus. ^■   24 Igga ɛawed arebɛin n tyarsawin n nnuqart sadu ɛicrin n tfeřwin, tnayen n tyarsawin sadu ict n tefřewt i tnayen n iḍaren nnes, uřa d tnayen n tyarsawin sadu tafřewt nneɣni i tnayen n iḍaren nnes. ^■   25 Igga ɛawed ɛicrin n tfeřwin i uɣezdis nneɣni n Tzeddiɣt, ɣar uɣezdis n ccamal ^■   26 s arebɛin n tyarsawin nnes n nnuqart: tnayen n tyarsawin sadu ict n tefrewt d tnayen n tyarsawin sadu tefrewt nneɣni. ^■   27 I iɣezdisen n ḍeffar n Tzeddiɣt, ɣar uɣezdis n řɣarb, igga setta n tfeřwin. ^■   28 Igga tnayen n tfeřwin d tifeřwin i tɣemmura n Tzeddiɣt ɣar tnayen n iɣezdisen ɣar ḍeffar. ^■   29 Zi swadday tuɣa řeṣqent am wacniwen uca ammu tent tuɣa d icten ař dd-dewřent sennej deg ict n texrazt. Ammu i igga s tnayen idsent i tnayen n tɣemmura. ^■   30 Ammu i din tuɣa tmenya n tfeřwin s tyarsawin nsent n nnuqart, aqa atent d seṭṭac n tyarsawin: tnayen n tyarsawin sadu kuř tafřewt. ^■   31 Igga ɛawed tiḥenya n uɛarreḍ zeg ukeccuḍ n ukasiya, xemsa n tfeřwin ɣar ijj n uɣezdis n Tzeddiɣt ^■   32 u xemsa n tḥenya n uɛarreḍ i tfeřwin ɣar uɣezdis nneɣni n Tzeddiɣt d xemsa n tḥenya n uɛarreḍ i tfeřwin n Tzeddiɣt ɣar tnayen n iɣezdisen n ḍeffar ɣar řɣarb. ^■   33 Taḥnact n uɛarreḍ di řwest igga i-tt ad teẓwa zi řwest n tfeřwin zeg ixef ař wenneɣni. ^■   34 Iɣeǧef tifeřwin s wureɣ uca igga tixrazin nsent n wureɣ maḥend ad daysent ssidfen tiḥenya n uɛarreḍ uca uřa d tiḥenya n uɛarreḍ icellel i-tent s wureɣ. ^■  

35 Igga ijj n uřeḥḥaf s ufiřu adeḥmi d urjuwani d uzeggʷaɣ iḥedqen u s řeqṭen azdad imuden uca igga i-t d ijj n warcam n ufennan, s ikiruben xas. ^■   36 Igga as arebɛa n ipilaren n ukeccuḍ n ukasiya uca iɣeǧef i-ten s wureɣ. Tisennarin nsen tuɣa atent n wureɣ. Issefsi i ipilaren arebɛa n tyarsawin nsent n nnuqart. ^■  

37 Igga ijj n arwaq i wadaf n Uqiḍun s ufiřu adeḥmi d urjuwani d uzeggʷaɣ iḥedqen u s řeqṭen azdad imuden, amecnaw ijj n umudi n uxeyyaḍ, ^■   38 s xemsa n ipilaren nnes d tsennarin nnes. Iɣeǧef tizeǧifin nsen d iqeḍban nsen i useřqi s wureɣ. Tiyarsawin nsen tuɣa atent n nnḥas. ^■