1 Musa issmun marra tamesmunt n ayt n Israil uca inna asen: “Ina d awařen nni yumur SIDI ḥima ad ten teggem. ^■   2 Setta n wussan ad tegged řxedmet u deg wass wiss sebɛa ad awem yiři iqeddes, aqa d ssebt, arraḥet tmun i SIDI. Kuř ijj wenni dayes i ɣa iggen ca n řxedmet, ad ittwaneɣ. ^■   3 War tesruɣim kenniw timessi di marra tizeddiɣin nwem deg wass n ssebt.” ^■  

4 Issiweř Musa ak-d marra tamesmunt n ayt n Israil, inna: “D wa d min yumur SIDI, umi inna: ^□   5 ‘Ksim zi min ɣarwem ict n tewhibt n usgeɛɛed i SIDI. Kuř ijj wenni umi yennurzem wuř nnes ad tt yawi, aqa-tt d tawhibt n usgeɛɛed i SIDI: ureɣ d nnuqart d nnḥas, ^■   6 afiřu adeḥmi d urjuwani d uzeggʷaɣ iḥedqen d řeqṭen azdad d ccɛar n iɣayḍen, ^■   7 iřmawen izeggʷaɣen n icarriyyen d iřmawen n ddenfiřat d ukeccuḍ n ukasiya, ^■   8 zzect i tfawt, řeɛṭur i zzect n wedhan u i řebxur ittfuḥen, ^■   9 iẓra n biril d iẓra iɣřan maḥend ad ten ggen x upalṭu u x tejmect. ^■  

10 Marra inni iǧan jar awem s wuř d amiɣis, ad dd-asen ad ggen marra min yumur SIDI:

11 Tazeddiɣt, Aqiḍun nnes d tseqqaft nnes d tsennarin nnes d tfeřwin nnes d tḥenya nnes n uɛarreḍ d ipilaren nnes d tyarsawin nnes, ^■  

12 d Ttabut ak-d iɛumad nnes i tarebbut d tqebbart n weṣřaḥ d uřeḥḥaf i dduri,

13 d tzewḍa ak-d iɛumad nnes i tarebbut d marra řeqcuɛ nnes d weɣrum n wescan, ^■  

14 d řqendiř i tfawt d řeqcuɛ nnes d teftiřin nnes d zzect i tfawt

15 d uɛalṭar n řebxur ak-d iɛumad nnes i tarebbut d zzect i wedhan d řebxur ittfuḥen d arwaq n wadaf ɣar wadaf n Tzeddiɣt, ^■  

16 d uɛalṭar n wecmaḍ d tracca nnes n nnḥas d iɛumad nnes i tarebbut d marra řeqcuɛ nnes d tbanyut s uḍar nnes, ^■  

17 d řizarat n řemraḥ, ipilaren nnes ak-d tyarsawin nsen d arwaq i wadaf n řemraḥ, ^■  

18 d řewtad n Tzeddiɣt d řewtad n řemraḥ d ifiřan nsen, ^■  

19 arruḍ i řxedmet deg Uqeddas, arruḍ iqeddsen n ukehhan Harun d warruḍ n iḥenjiren nnes maḥend ad xedmen am ikehhanen.’ ”^■   20 Xenni ffɣen nitni, marra tamesmunt n ayt n Israil, ggʷejen zi zzat n uɣembub n Musa.

21 Xenni yusa-dd kuř aryaz, wenni umi inhezz wuř nnes, u marra wenni umi innurzem buḥbeř nnes, uca iwyen-dd nitni tawhibt n usgeɛɛed tenni ssgeɛɛden nitni ɣar SIDI, d tenni i ɣa yiřin i Uqiḍun n Umsagar u i tsexxart i dayes u i warruḍ iqeddsen. 22 Ammu dd-usin iryazen jmiɛ ak-d temɣarin, marra inni umi innurzem wuř uca iwyen-dd timessakin d texrazin n umezzuɣ d tinzar d txudan n ucemmiɛ d tseddyin s wedmam n wureɣ d marra řeqcuɛ n wureɣ, wah kuř ijjen yiwi-dd ict n tewhibt n wenhezzi n wureɣ i SIDI. 23 Marra wi ɣar ittwaf ufiřu adeḥmi d urjuwani d uzeggʷaɣ iḥedqen niɣ řeqṭen azdad niɣ ccɛar n iɣayḍen niɣ iřmawen izeggʷaɣen n icarriyyen niɣ iřmawen n ddenfiřat, iwyen-dd man aya. 24 Marra wi issgeɛɛden tawhibt n nnuqart niɣ n nnḥas, iwyen tawhibt-a n usgeɛɛed ɣar SIDI, d marra wi ɣar ittwaf ukeccuḍ n ukasiya i marra řxedmet n tsexxart, iwyen man aya.

25 Marra timɣarin s wuř amiɣis, ttqarḍcent s ifassen nsent uca nitenti iwyent-i-dd min qareḍcent: n ufiřu adeḥmi d urjuwani d uzeggʷaɣ iḥedqen d řeqṭen azdad. ^□  ■   26 Marra timɣarin nni umi inhezz wuř nsent s tiɣit, qareḍcent ccɛar n iɣayḍen.

27 Imɣaren iwyen-dd iẓra n biril d iẓra iɣřan ḥima ad ten ggen x upalṭu u x tejmect, 28 řeɛṭur d zzect i tfawt d zzect i wedhan u i řebxur ittfuḥen. ^■  

29 Ayt n Israil wcin s řxaḍar i SIDI, marra iryazen d temɣarin inni umi inhezz wuř nsen maḥend ad wcen s řxaḍar i marra řxedmet tenni yumur SIDI ḥima ad tᵉttwagg s ufus n Musa.

30 Xenni inna Musa i ayt n Israil: “Xzarem, SIDI iřaɣa-dd i Baṣaliyil, mmis n Uri, mmis n Ḥur, zi řaǧ n Yahuda, s yisem nnes. ^■   31 Iccur i-t Arruḥ n AREBBI s tiɣit d řeɛqeř d tussna u s marra min ittxeṣṣan n tzemmar n ṣṣnayeɛ ^■   32 i uxemmem n ireqqamen s lfenn u ḥima ad ten yegg s wureɣ d nnuqart d nnḥas ^■   33 u i uneqqac n iẓra iɣřan d usarsi nsen u i uneqqac n ukeccuḍ ḥima ad igg marra ireqqamen s lfenn. ^■   34 Igga deg wuř nnes tawengit i useřmed, deg wuř nnes u deg wuř n Ahuliyab, mmis n Axisamak, zi řaǧ n Dan. 35 Iccur i-ten s tiɣit n wuř, maḥend ad ggen marra řxedmet: taneqqact, arcam, amudi s řeqṭen adeḥmi d urjuwani d uzeggʷaɣ iḥedqen d řeqṭen azdad, uřa d taxeyyaḍt, wah, aqa aten d yenni ittṣennaɛen ɛřam kuř řxedmet d yenni dd-ittsaqaren arcamen s lfenn. ^■