1 SIDI inna i Musa: “Qess i yixef nnek tnayen n teřwiḥin n weẓru amecnaw timezwura, uca Necc ad ariɣ x teřwiḥin nni awařen d ijjen nni tuɣa di teřwiḥin timezwura i tarẓid. ^■   2 Sewjed i ṣṣbeḥ uca geɛɛed di ṣṣbeḥ ɣar wedrar n Sina uca bedd din zzati x tqiccet n wedrar. 3 War iřiq ad igeɛɛed uřa d ijj n bnadem akidek, niɣ ad iban hedd deg wedrar am ikmeř. Uřa d uǧi d ifunasen d tfunasin war zemmaren ad arewsen ṭṭarf i wedrar.” ^□  ■  

4 Xenni iqess tnayen n teřwiḥin n weẓru amecnaw timezwura, uca ikkar Musa di ṣṣbeḥ zic uca igeɛɛed ɣar wedrar n Sina am mammec t iweṣṣa SIDI uca yiwi akis deg ufus nnes tnayen n teřwiḥin n weẓru.

5 Ihwa-dd SIDI deg useynu, ibedd akides din uca iřaɣa s Yisem n ‘SIDI’. 6 Iẓwa SIDI zzat i uɣembub nnes uca iɛeyyed: “SIDI, SIDI, Arebbi, arḥim, iccur s teḥnunect, ɣares ttasiɛ n řxaḍar, dayes aṭṭas n tmexsiwt icewwaren d řaman, ^■   7 d wenni iḥeṭṭan tamexsiwt nnes icewwaren i řuřuf, d wenni iɣeffaren řmuɛṣiyyet d xeṭṭu d ddnub, d wenni war ittbarrin wenni itteggen ddenb, d wenni dd-yarezfen řmuɛṣiyyet n ibabaten deg iḥenjiren u deg iḥenjiren n iḥenjiren nsen ař jjiř wiss třata d wiss arebɛa.” ^■  

8 Musa iqeǧeq iqwes s uzeǧif ɣar temmurt uca yuḍar. 9 Inna: “A Sidi, mařa ufiɣ xenni arḍa di tiṭṭawin nnek, ad yuyur xenni Sidi inu di řwest nneɣ, minzi řgens iqseḥ. Ɣfar aneɣ řmuɛṣiyyet nneɣ u qbeř aneɣ d řwart nnek!” ^■  

10 Uca Netta inna: “Xzar, Necc ad ggeɣ Řɛahd. Zzat i marra řgens ad ggeɣ řeɛjayeb war ittwaggen ca di marra tammurt u jar marra řegnus, ařami marra řgens di řwest nnes i zi teǧid, ad iẓar min igga SIDI, minzi min ɣa ggeɣ akidek ad isseggʷed aṭṭas. ^■  

11 Ḥḍa min x cek weṣṣiɣ ass-a! Xzar, ad aẓẓřeɣ zzat i uɣembub nnek x Imuriyyen d Ikenɛaniyyen d Iḥittiyyen d Ifiriziyyen d Iḥiwiyyen d Iyibusiyyen.

12 Ɣarek ad ttegged řɛahd ak-d umezduɣ n temmurt mani i ɣa tadfed, ḥima netta war d ac ittiři d taxceft di řwest nnek. ^■  

13 Ittxeṣṣa awem ad tɣeḍřem iɛalṭaren nsen u ad tarẓam imayḍuten nsen iqeddsen u ad thedmem tirebbin nsen n cwarti.

14 War ttaḍar i arebbi nneɣni, minzi SIDI, wenni umi qqaren ‘Anessam’, aqa-t d ijj n Arebbi ittasmen. ^□  ■  

15 Ɣarek ad tegged řɛahd ak-d imezdaɣ n temmurt, uca xenni ad ssfesden ixef nsen umi ɣa dewřen awarni i irebbiten nsen, ad qeddmen tiɣarṣa i irebbiten nsen, uca ad cek ɛarḍen i macca n tɣarṣa nsen

16 uca ad teksid tiḥenjirin nsen d timɣarin i iḥenjiren nnek uca ad ssfesdent tḥenjirin nsen ixef nsent umi ɣa dewřen awarni i irebbiten nsent uca ad arrent iḥenjiren nnek ad dewřen awarni i irebbiten nsent. ^■  

17 War ttegg i yixef nnek arebbi n ufessay. ^□  

18 Ad teḥḍiḍ Řɛid n Weɣrum břa Antun: sebɛa n wussan ad tecced aɣrum břa antun, di řweqt ittwaggen deg uyur Abib, am mammec cek weṣṣiɣ, minzi deg uyur Abib i dd-teffɣed zi Miṣra. ^■  

19 Marra min yarezzmen řemřawet d amezwaru Inu, marra iwetman n řebhayem nnek, arzam n řemřawet d amezwaru, am wenni n ufunas, am wenni n wuǧi. ^■   20 Mařa amenzu n weɣyuř yarzem řemřawrat d amezwaru, ad t tefdid s yijj zeg wuǧi. Mařa war t tefdid, ad as tarẓed iri. Ad tefdid marra imenza n iḥenjiren nnek. War iɛeddeř ad ḍharen s ifassen xwan zzat i wudem inu. ^■  

21 Setta n wussan ad txedmed, maca deg wass wiss sebɛa ad tareyyḥed. Uřa di řweqt n tyarza d tmeyra ad tareyyḥed. ^■  

22 Ad tegged Řɛid n Simanat, aqa-t d Řɛid n Tmenzut n tmeyra n yirden, uřa d Řɛid n Usmuni ɣar uneggar n useggʷas. ^■  

23 Kuř aryaz ad dd-iban třata n twařawin deg useggʷas zzat i wudem n Sidi, SIDI, AREBBI n Israil, ^■   24 minzi zzat i uɣembub nnek ad kkseɣ tasɣart n řwart x řegnus uca ad sswesɛeɣ iymiren nnek uca uřa d ijjen ma ad immeẓri ad yacar tammurt nnek, xmi i ɣa tgeɛɛded třata n twařawin deg useggʷas ḥima ad dd-tbaned zzat i wudem n SIDI, AREBBI nnek.

25 War ttqeddem idammen n tɣarṣt inu ak-d min ixemmaren. Taɣarṣt n Řɛid n Useɛdu war ttnusi ǧiřet ař ṣṣbeḥ. ^■  

26 Tamezwarut n tmenzut n wudem n temmurt nnek ad tt-i-dd-tawyed ɣar Taddart n SIDI, AREBBI nnek. War snenni iɣayḍ d ameẓyan s uɣi n yemmas.” ^■  

27 Inna SIDI i Musa: “Ari awařen-a i yixef nnek, minzi am mammec qqaren wawařen-a, aqa ggiɣ Řɛahd akidek u ak-d Israil.” 28 Uca tuɣa din ak-d SIDI arebɛin n wussan d arebɛin n ǧyaři. War icci aɣrum niɣ iswa aman. Uca yura di teřwiḥin awařen n Řɛahd, ɛecra n wawařen. ^■  

29 Řami dd-ihwa Musa zeg wedrar n Sina, am tuɣa tnayen n teřwiḥin n Cchadet deg ifassen n Musa am dd-ihwa zeg wedrar, imsar aqa war issin Musa belli tiřmect n uɣembub nnes tareqq řami tuɣa akides issawař. ^■   30 Harun d marra ayt n Israil ṣewḍen ɣar Musa, u xzar, tiřmect n wudem nnes tuɣa tareqq, ggʷeden ad ɣares dd-qarrben. 31 Iřaɣa dd-xasen Musa uca idweř-dd Harun d marra imɣaren n tmesmunt ɣares uca issiweř Musa akidsen. 32 Awarni as qarrben-dd marra ayt n Israil uca netta yumur i-ten marra min xef issiweř SIDI akides deg wedrar n Sina. 33 Řami ikemmeř Musa awař nnes akidsen, igga ařeḥḥaf x wudem nnes, ^■   34 Xmi i ɣa yiři Musa zzat i wudem n SIDI ḥima ad kides issiweř, ikkes ařeḥḥaf, ařami dd-iffeɣ ɛawed. U řami dd-iffeɣ ɣar barra, issiweř ak-d ayt n Israil min d as yumur SIDI. 35 Uca ẓrin ayt n Israil aɣembub n Musa, aqa tiřmect n wudem nnes tareqq, xenni yarra Musa ařeḥḥaf x wudem nnes, ařami dd-yudef ɛawed ḥima akides issiweř.