33
1 Issiweř SIDI ak-d Musa: “Ruḥ, geɛɛed ssa, cek d řgens wenni dd-tessuffɣed zi temmurt n Miṣra, ɣar temmurt nni x jjuǧeɣ i Ibrahim d Isḥaq d Yaɛqub, nniɣ: ‘I zzariɛet nnek ad tt wceɣ.’ ■ 2 Necc ad ssekkeɣ zzat i uɣembub nnek Lmalak - ad aẓẓřeɣ x Ikenɛaniyyen d Imuriyyen d Iḥittiyyen d Ifiriziyyen d Iḥiwiyyen d Iyibusiyyen - 3 ɣar ict n temmurt ifeyyḍen s uɣi d tamment. Necc s imant inu war ttgiɛɛideɣ akidwem, minzi kenniw d ijj n řgens iqseḥ, ḥima war kenniw tᵉtteḥḥiɣ deg webrid.” ■ 4 Umi isřa řgens awař-a aɛeffan, ceḍnen uca uřa d ijj ma igga ɛad řehzuṭ nnes. 5 Aqa inna SIDI i Musa: “Ini i ayt n Israil: ‘Kenniw d ijj n řgens iqseḥ. Mařa geɛɛdeɣ jar awem mɣir ijj n wermac, ad kenniw teḥḥiɣ. Xenni řexxu kkes řehzuṭ nwem, aqa Necc ad ssneɣ min d ac ɣa ggeɣ.’ ” 6 Kksen ayt n Israil řehzuṭ nsen zeg wedrar n Hurib. 7 Iksi Musa Aqiḍun uca iwta Aqiḍun barra i řmargeḥ n řɛeskar, iggʷej aṭṭas x řmargeḥ, uca iřaɣa as ‘Aqiḍun n Umsagar’. Kuř ijj wenni tuɣa yarezzun SIDI, iffeɣ ɣar Uqiḍun n Umsagar, wenni iǧan barra i řmargeḥ. 8 Umi iffeɣ Musa ɣar Uqiḍun ikkar marra řgens, bedden barra, kuř ijj ɣar wadaf n uqiḍun nnes, uca nitni xzaren di Musa ařami yudef deg Uqiḍun. 9 Umi yudef Musa deg Uqiḍun, aqa aqellij n useynu ihwa, ibedd ɣar wadaf n Uqiḍun uca Netta issiweř ak-d Musa.
10 Uca marra řgens iẓra aqellij n useynu ibedd ɣar wadaf n Uqiḍun, xenni ikkar marra řgens uca yuḍar kuř ijj ɣar wadaf n uqiḍun nnes.
11 Issiweř SIDI ak-d Musa aɣembub deg uɣembub, amecnaw mammec issiweř bnadem ak-d umeddukkeř nnes. Xenni iɛqeb-dd ɣar řmargeḥ n řɛeskar, maca amsexxar nnes Yacuwa, mmis n Nun, ɛemmarṣ war ibeɛɛed x řwest n Uqiḍun.
Aɛuǧi n SIDI
12 Inna Musa i SIDI: “Xzar, Cek tennid ayi: ‘Ndeh řgens-a!’, maca Cek war d ayi tessecned wi kidi i ɣa tessekked. Cek tennid: ‘Necc ssneɣ cek s yisem nnek!’ uřa: ‘Tufid arḍa di tiṭṭawin inu!’
13 Řexxu xenni, mařa ufiɣ řxaḍar di tiṭṭawin nnek, zawgeɣ Cek ad ayi tessecned abrid nnek, ḥima ad Cek ssneɣ, maḥend ad afeɣ arḍa di tiṭṭawin nnek. Xzar, cceɛb-a d řgens nnek!”
14 Inna: “Udem inu ad yuyur akidek u Necc ad cek ssareyyḥeɣ.”
15 Xenni yarra-dd xas: “Mařa udem nnek war kidneɣ ittriḥ, war ttejji xenni ad ngeɛɛed ssa!
16 Mammec i ɣa ssnen belli aqa ufiɣ arḍa di tiṭṭawin nnek, necc d řgens nnek? Ma war iǧi minzi Cek truḥed akidneɣ, aqa neccin, necc d řgens nnek, nfarrez x kuř řgens i iǧan x wudem n temmurt?” ■
17 Inna SIDI i Musa: “Ɛawed ad ggeɣ awař-a i tennid umi tufid arḍa di tiṭṭawin inu uca ssneɣ cek s yisem nnek.”
18 Uca inna Musa: “Zawgeɣ Cek, scen ayi aɛuǧi nnek!”
19 Inna: “Necc ad sseɛduɣ marra tcuni inu zzatek uca ad ɛeyydeɣ Isem n SIDI zzat i uɣembub nnek uca ad ḥinneɣ x wi i ɣa ḥinneɣ, ad areḥmeɣ x wi i ɣa areḥmeɣ.” ■ 20 Inna ɛawed: “Cek war tzemmared ad tẓared udem inu, minzi war d ayi iẓarr bnadem uca ad iqqim iddar.” 21 Xas uca inna SIDI: “Xzar, zzat inu amcan mani i ɣa tbedded x teṣḍart. 22 Xmi i ɣa iɛdu uɛuǧi inu, ad cek ggeɣ deg ijj n ufeǧiq n teṣḍart uca ad cek dřeɣ s třeqqa n ufus inu ař dd-ẓwiɣ. 23 U xmi i ɣa kkseɣ afus inu, xenni ad ayi tẓared zi ḍeffar, maca war tẓarred udem inu!”