1 Řami iẓra řgens belli Musa iɛeṭṭař war dd-ihwi zeg wedrar, inneyru-dd řgens ɣar Harun, nnan as: “Kkar, egg aneɣ irebbiten inni i ɣa yuyuren zzatneɣ, minzi Musa aya, aryaz wenni d aneɣ dd-issuffɣen zi Miṣra, war nessin min t yuɣin.” ^■   2 Harun inna asen: “Qeřɛem tixrazin n wureɣ nni iǧan deg imejjan n temɣarin nwem u n iḥenjiren nwem uřa n yessitwem, awyem tent-i-dd ɣari.” 3 Ikkes marra řgens tixrazin n wureɣ nni iǧan deg imejjan nsen uca iwyen as tent i-dd ɣar Harun. 4 Netta iksi tent zeg ifassen nsen uca icekkeř i-t s imeydi, igga zzayes ijj n uyenduz n ufessi. Řexdenni nnan: “A Israil, wa d arebbi nnek, wenni cek-dd issuffɣen zi temmurt n Miṣra.” ^□   5 Řami t iẓra Harun, ibna ijj n uɛalṭar zzat i uyenduz uca iřaɣa Harun, inna: “Tiwecca ad yiři d řɛid i SIDI.” 6 Tiwecca nnes kkaren zic uca ssbexxaren tiɣarṣa n wecmaḍ uca qeddmen akidsent ɛawed tiɣarṣa n řehna. Xenni iqqim řgens, icca, iswa, ikkar maḥend ad yegg řefrayej. ^■  

7 Xas uca issiweř SIDI ak-d Musa: “Uyur, hwa, minzi řgens nnek, wenni dd-tessuffɣed zi temmurt n Miṣra, aqa igga min war iḥřin. ^■   8 Aqa ffɣen deɣya x webrid nni x ten weṣṣiɣ. Ggin ijj n uyenduz n ufessi i yixef nsen uca aḍaren as, qeddmen as tiɣarṣa uca nnan: ‘A Israil, wanita d arebbi nnek, wenni cek dd-issuffɣen zi temmurt n Miṣra.’ ” ^■   9 Inna SIDI i Musa: “Necc ẓriɣ řgens-a, xzar, aqa-t d ijj n řgens iqseḥ! ^■  

10 Řexxu ejj ayi ad raḥeɣ, ad areɣ aɣḍab inu xasen uca ad ten teḥḥiɣ, u Necc ad cek arreɣ d ijj n řgens imɣar.”

11 Musa izawg zzat i wudem n SIDI, AREBBI nnes, inna: “A SIDI, mayemmi i ɣa yareɣ weɣḍab nnek x řgens nnek, wenni dd-tessuffɣed zi temmurt n Miṣra s yijj n jjehd imɣar u s ufus ijehden? ^■  

12 Mayemmi ssawařen Imiṣriyyen jar asen, qqaren: ‘Netta issuffeɣ i-ten s nneyyet taɛeffant maḥend ad ten ineɣ x idurar u maḥend ad ten iteḥḥa zeg wudem n temmurt?’ Dweř x řḥaduq n weɣḍab nnek uca ndem x tuɛeffna i texsed ad tarred x řgens nnek. ^■  

13 Fekkar di Ibrahim d Isḥaq d Israil, imsexxaren nnek, inni umi tejjuǧed s Yixef nnek u tessiwřed akidsen: ‘Necc ad arniɣ zzariɛet nwem amecnaw itran n ujenna uca ad wceɣ i zzariɛet nnek marra tammurt-a i xef ssiwřeɣ uca nitni ad tt ṭṭfen d ict n řwart i řebda.” ^■  

14 Indem SIDI x tuɛeffna i tuɣa inna ad tt yegg x řgens nnes.

15 Idweř-dd Musa, ihwa-dd zeg wedrar s tnayen n teřwiḥin n Cchadet deg ufus nnes. Tiřwiḥin-a ttwarint x tnayen n iɣezdisen nsent: ttwarint x yijj n uɣezdis u x uɣezdis nneɣni.

16 Tiřwiḥin tuɣa atent d řxedmet n AREBBI uca tira nni ineqcen di teřwiḥin d tira n AREBBI s yixef nnes. ^■  

17 Isřa Yacuwa i řḥess n řgens isɣuyyu uca inna i Musa: “Xzar, řḥess n umenɣi di řmargeḥ n řɛeskar.”

18 Maca netta inna: “War iǧi d řḥess n usřewřiw ɣar řeɣřeb niɣ d řḥess n usɣuyyi ɣar txessart, maca min ttesřiɣ d řḥess n ddenb ideqřen.”

19 Uca imsar, am dd-ireḥḥeg ɣar řmargeḥ n řɛeskar uca iẓra ayenduz d ccḍiḥ s nnubtat, yarɣa weɣḍab n Musa uca inḍar tiřwiḥin zeg ifassen nnes, yarẓa i-tent ɣar iḍaren n wedrar. ^■   20 Iṭṭef ayenduz nni ggin, isscemḍ i-t di tmessi, ařami idweř d iɣɣeḍ uca izuzzar i-t x wudem n waman uca yarra ayt n Israil ad swen. ^■   21 Inna Musa i Harun: “Min zzayek igga řgens-a ařami d as dd-tiwyed ijj n ddenb d ameqqran aṭṭas?” 22 Harun inna: “War yareqq weɣḍab n sidi inu! Cek tessned řgens-a, aqa-t di řɣar. ^■   23 Nnan ayi: ‘Egg aneɣ irebbiten inni i ɣa yuyuren zzat i uɣembub nneɣ, minzi Musa wanita, aryaz wenni d aneɣ dd-issuffɣen zi temmurt n Miṣra, war nessin min t yuɣin.’ 24 Xenni nniɣ asen: ‘Wi ɣar iǧa ureɣ, ad t-i-dd ikkes, uca ad ayi t yewc!’ Uca nḍareɣ t di tmessi uca iffeɣ-dd uyenduz aya.”

25 Umi iẓra Musa, aqa řgens idweř d imfelles, minzi Harun ijja afelles nsen ad idweř d taḍeḥḥact jar řɛedyan nsen, 26 ibedd Musa ɣar wadaf n řmargeḥ, inna: “Man wen i iǧan i SIDI, as-dd da ɣari!” Uca munen-dd ɣares marra iḥenjiren n Lawi. 27 Inna asen: “Ammu i iqqar SIDI, AREBBI n Israil! Sars kuř ijj ssif nnes x tmeṣṣaḍt nnes, ɛdum uca ɛeqbem x řmargeḥ zeg wadaf ɣar wadaf nneɣni uca ad ineɣ kuř ijj umas d kuř ijj umeddukkeř nnes d kuř ijj umqarreb nnes!” 28 Tarwa n Lawi ggin ɛlaḥsab awař n Musa. Deg wass nni wḍan ɛřaḥař teřt-ařaf n yeryazen n řgens. 29 Musa inna: “Ksim ifassen nwem ass-a ɣar SIDI, kuř ijj x mmis u x umas u ass-a nnit Netta aqa ibarek i kenniw!”

30 Tiwecca nnes inna Musa i řgens: “Kenniw teggim ijj n ddenb imɣar. Ɛad necc ad ařyeɣ řexxu ɣar SIDI, balak ad ṭṭfeɣ aṣřaḥ x ddenb nwem.” 31 Idweř-dd Musa ɣar SIDI uca inna as: “Wayyaw, řgens-a igga ijj n ddenb imɣar, minzi ggin ijj n arebbi n wureɣ i yixef nsen. 32 Řexxu, ɣfar asen i ddenb nsen! Niɣ mḥa ayi zeg wedlis nnek ittwannḍen nni turid.” 33 Inna SIDI i Musa: “Wenni xafi ixḍan, d wa i ɣa mḥiɣ zeg wedlis inu ittwannḍen. 34 Ruḥ řexxu, awi řgens-a ɣar mani d ac nniɣ. Aqa Lmalak inu ad iraḥ zzat nnek! Deg wass n uxeǧeṣ inu ad asen xeǧṣeɣ ddnub nsen!” 35 SIDI iwta řgens, minzi ggin ayenduz nni igga Harun.