31
1 Issiweř SIDI ak-d Musa, inna: 2 “Xzar, Necc řaɣiɣ-dd x Baṣaliyil, mmis n Uri, mmis n Ḥur, zi teqbič n Yahuda s yisem nnes. ■ 3 Ccureɣ t s Arruḥ n AREBBI, s tiɣit, s řeɛqeř, s tussna u s marra min ittxeṣṣan n tzemmar n ṣṣnayeɛ 4 ḥima ad ixemmem ireqqamen s lfenn, maḥend ad ten tteggen s wureɣ d nnuqart d nnḥas, 5 u s wenqac n yeẓra iɣřan maḥend ad ten ggen di tcuyar nsen, u s wenjar n ukeccuḍ, ḥima ad ggen marra řxedmet. 6 Aqa Necc ggiɣ akides Ahuliyab, mmis n Axisamak, zi řaǧ n Dan. Deg wuř n marra inni ɣar iǧa wuř d amiɣis, ggiɣ tiɣit. Nitni ad ggen marra min xef weṣṣiɣ: 7 Aqiḍun n Umsagar, Ttabut n Cchadet, taqebbart n weṣřaḥ wenni xas iǧan, u marra řeqcuɛ n Uqiḍun: 8 tazewḍa ak-d marra řeqcuɛ nnes, d řqendiř iṣfan s marra řeqcuɛ nnes d uɛalṭar n řebxur, 9 aɛalṭar n wecmaḍ ak-d marra řeqcuɛ nnes d tbanyut s uḍar nnes,
10 arruḍ n řxedmet d warruḍ iqeddsen n Harun, akehhan, d warruḍ n iḥenjiren nnes, maḥend ad sexxaren am ukehhan
11 d zzect i wedhan, d řebxur ittfuḥen i Zzawect Iqeddsen. Ɛlaḥsab marra minzi cek umureɣ ad ten ggen.”
12 Issiweř SIDI ak-d Musa, inna:
13 “Cek, siweř ak-d ayt n Israil, ini: ‘Ad teḥḍam ussan n ssebt inu minzi ssebt d řeɛřamet jar ayi d kenniw, i marra jjiřat nwem, ḥima ad tessnem belli Necc d SIDI, wenni kenniw issqeddsen.
14 Ḥḍam ass n ssebt, minzi iqeddes i iǧa i kenniw! Wenni t i ɣa issfesden, ad t nɣen nican, minzi man wen ma i ɣa iggen dayes ca n řxedmet, d wenni i ɣa qeḍɛen zi řwest n řgens nnes. □ ■
15 Setta n wussan ad tegged řxedmet uca deg wass wiss sebɛa ad yiři d ssebt, arraḥet tmun, tqeddes i teǧa i SIDI! Kuř ijj wenni i ɣa iggen ca n řxedmet deg wass n ssebt, ad t nɣen nican.
16 Ayt n Israil ad ḥḍan ass n ssebt, ad ḥḍan ssebt di marra jjiřat nsen am ijj n Řɛahd i řebda.
17 Ad tiři d ict n řeɛřamet jar ayi d ayt n Israil, minzi di setta n wussan igga SIDI ajenna d temmurt, u deg wass wiss sebɛa yareyyeḥ, yarra nnefs.” ■
18 Řami ikemmeř awař akides x wedrar n Sina, iwca i Musa tnayen n teřwiḥin n Cchadet. Tuɣa tiřwiḥin nni zeg weẓru, ttwarint s uḍaḍ n AREBBI. ■