1 “Ad tegged ɛawed aɛalṭar n řebxur. Ad t tegged zeg ukeccuḍ n tcejjart n ukasiya. ^■   2 Tuzzeggart ad tiři d ijj n uɣiř, u tiru ɛawed d ijj n uɣiř. Ad yiři uɛalṭar s arebɛa n tɣemmura. Řuɛřa nnes ad yiři d tnayen n iɣaǧen u accawen nnes ad iřin d ijjen akides. ^□   3 Ad t tɣeǧfed s wureɣ iṣfan, udem nnes n sennej d iɣezdisen nnes i d as dd-innḍen d waccawen nnes. Ad as tegged ijj n zzwaq n wureɣ i d as dd-innḍen. 4 Ad as tegged tnayen n texrazin n wureɣ sadu zzwaq nnes. Ad tent tegged ɣar tnayen n iɣezdisen nnes, ɣar tnayen n tɣemmar nnes. Ad iřint i iɛumad ḥima ad zzaysen arbun aɛalṭar n řebxur. 5 Ad tegged tnayen n iɛumad i tarebbut zeg ukeccuḍ n ukasiya uca ad ten tɣeǧfed s wureɣ. 6 Ad t tessarsed zzat i uřeḥḥaf i iǧan zzat i Ttabut n Cchadet, zzat i tqebbart n weṣřaḥ tenni iǧan x Cchadet, mani kik i ɣa msagareɣ. 7 Ad issbexxar Harun řebxur ittfuḥen kuř ṣṣbeḥ. Řami iɛdeř tiftiřin, ad issbexxar. ^■   8 Meřmi i ɣa issareɣ Harun tiftiřin jar beddu n wezyen n wass ař dd-tewḍa tmeddit, ad yejj řebxur ad ibexxar. Ad yiři d ijj n řebxur i řebda zzat i wudem n SIDI i marra jjiřat nwem. 9 Kenniw war xas tessgeɛɛdem ca řebxur war iǧin nneɣ, niɣ taɣarṣt n wecmaḍ niɣ tawhibt n řɣiǧet u war xas ttzeǧaɛem tawhibt n useyyeb.

10 Harun ad isseṣřeḥ accawen nnes ict n twařa deg useggʷas s idammen n tɣarṣa n ddnub i weṣřaḥ. Ad isseṣřeḥ ict n twařa deg useggʷas i marra jjiřat nwem. Aqa-t d amqeddas qaɛ i SIDI.

11 Issiweř SIDI ak-d Musa, inna:

12 “Xmi i ɣa teksid řqedd n ayt n Israil, řqedd n yenni ittwařaɣan i umenɣi, xenni nitni ad wcen, kuř ijj i yixef nnes, ttaman n weṣřaḥ i SIDI ɣar useddi nsen, ḥima war tᵉttiři jjriḥect jar asen x minni ten i ɣa tḥesbed. ^■  

13 D man aya ad wcen nitni, kuř ijj wenni i ɣa iẓwan ɣar yenni ittwařaɣan: azyen n uciql ɛlaḥsab aciql n Zzawect Iqeddsen - aciql-a d ɛicrin n ijirat - uřa d azyen n uciql d tawhibt n usgeɛɛed i SIDI. ^■  

14 Kuř ijj wenni i ɣa iẓwan ɣar yenni ittwařaɣan, zi ɛicrin iseggʷusa sennej, ad issgeɛɛed tawhibt n SIDI.

15 Bu-wagřa war ittic ktar uřa amezřuḍ war issenqis zeg wezyen n uciql, xmi i ɣa tessgeɛɛdem tawhibt n SIDI i weṣřaḥ x řeɛmur nwem.

16 Xenni ad teksid nnuqart n weṣřaḥ n ayt n Israil uca ad tt tfarzed i tsexxart n Uqiḍun n Umsagar. Ad tiři d řidaret i ayt n Israil zzat i wudem n SIDI i weṣřaḥ i řeɛmur nwem.” ^■  

17 Issiweř SIDi ak-d Musa, inna:

18 “Ad tegged ɛawed tbanyut n nnḥas i usird d uḍar nnes. Ad tt tessarsed jar Uqiḍun n Umsagar d uɛalṭar uca ad dayes tegged aman,

19 maḥend Harun d iḥenjiren nnes ad zzayes ssirden ifassen nsen d iḍaren nsen. 20 Xmi i ɣa yadfen ɣar Uqiḍun n Umsagar ad ssirden s waman ḥima war ttmettin ca, niɣ xmi i dd ɣa qarrben ɣar uɛalṭar maḥend ad sexxaren xmi i ɣa ssbexxaren tawhibt n tmessi i SIDI. 21 Xenni ad ssirden ifassen nsen d iḍaren nsen ḥima war ttmettin ca. Man aya ad asen yiři d ict n tewṣeyyet i řebda, i netta u i zzariɛet nnes, i marra jjiřat nsen.”

22 Issiweř SIDI ak-d Musa, inna:

23 “Cek, ksi řexxu ɣarek řeɛṭur icnan aṭṭas: xems-mya n ciqlu n mirru yuzzřen d řqedd n wezyen n manawenni, aqa-t d mitayen u-xemsin ciqlu zi řqarfa ittfuḥen u mitayen u-xemsin ciqlu zeg uɣanim uḥemmum ittfuḥen, 24 xemsa-mya n qassiya iwezznen ɛlaḥsab aciql n Zzawect Iqeddsen, d ijj n uhinu n zzect n zzitun. 25 Egg zzaysen ict n zzect tamqeddast i wedhan, ijj n řeɛṭur ittwaggen ɛlaḥsab ṣṣenɛet n uɛeṭṭar. Ad tiři d ict n zzect tamqeddest i wedhan. 26 S man aya ad tdehned Aqiḍun n Umsagar, Ttabut n Cchadet, 27 tazewḍa ak-d marra řeqcuɛ nnes d řqendiř ak-d marra řeqcuɛ nnes d uɛalṭar n řebxur, 28 d uɛalṭar n wecmaḍ ak-d marra řeqcuɛ nnes d tbanyut ak-d uḍar nnes. 29 Ad tessqeddsed marra aya ḥima ad yiři d amqeddas qaɛ. Marra wi i ɣa iḥadan zi man aya, ad yiři d amqeddas. 30 Ad tdehned Harun d iḥenjiren nnes uca ad ten tessqeddsed ḥima ad ayi iřin d ikehhanen. 31 Ad tessiwřed ak-d ayt n Israil uca ad tinid: “Ta ad tiři d ict n zzect tamqeddast i wedhan i Necc di marra jjiřat nwem. ^□   32 War ittxiṣṣa arrimet n bnadem ad xas tt farrɣen, u mammec teǧa war zzayes tteggem učmas. Tamqeddast i teǧa uca ad tiři d tamqeddast i kenniw. 33 Wenni i ɣa isswejden ict n zzect n wedhan amecnaw tanita uca ad zzayes tmesḥed x yijjen zi barra, ad ittwaqess zi řgens nnes.”

34 Inna SIDI i Musa:

“Ksi i yixef nnek řebxur ittfuḥen: tuddimin n userɣaɣ d waccaren ittfuḥen d ɣalba, řebzar ittfuḥen d jjawi iṣfan. Ad yiři řqedd nnes am řqedd n wenneɣni. 35 Egg zzayes ijj n řeɛṭur amecnaw tenni igga uɛeṭṭar: ittwameǧed, iṣfa, imqeddes. 36 Ḥri-dd zzayes taneɣda tazdadt uca sars ca zzayes zzat i Cchadet deg Uqiḍun n Umsagar mani akidek i ɣa msagareɣ. Ad awem tiři d tamqeddast qaɛ. 37 Řeɛtur nni i ɣa tegged, war t tteggem s uxeǧeḍ nni i yixef nwem. Ad yiři i cek d amqeddas i SIDI. 38 Man wen i ɣa iggen ca amecnaw wanita uca ad t icemm, ad ittwaqess zi řgens nnes.”