1 “D man aya i d asen ɣa tegged ḥima ad ten tessqeddsed, maḥend ad ayi iřin d ikehhanen. Ksi ijj n uyenduz, ameẓyan n ufunas, d tnayen n wacraren icnan qaɛ ^■   2 u ɛawed aɣrum břa antun d řemsemnat břa antun ixeǧḍen s zzect d teřfaf břa antun ttwadehnent s zzect, tinni i ɣa tegged marra s waren azdad n yirden. 3 Ad tent tegged di tsuǧet uca ad tent tawyed di tsuǧet s uyenduz d tnayen n icarriyyen. 4 Ad dd-tessqarrbed Harun d iḥenjiren nnes ɣar wadaf n Uqiḍun n Umsagar uca ad ten tessirded s waman. 5 Ad teksid arruḍ, ad tessyarḍed Harun ijj n warruḍ n teřmect d useřḥam i upalṭu d upalṭu simant nnes d tejmect uca ad as tbeysed s tḥezzamt izewwqen n upalṭu. 6 Ad tessarsed areẓẓet x uzeǧif nnes u x areẓẓet ad tegged tamrist tamqeddast. 7 Ad teksid zzect i wedhan uca ad tt tzeǧɛed x uzeǧif nnes uca ad t tdehned. ^■   8 Xenni ad tawyed iḥenjiren nnes, ad asen tessyarḍed arruḍ n teřmect. 9 Ad asen tbeysed s tḥezzamt, i Harun d iḥenjiren nnes, uca ad asen tarekkbed ticuccay. Ad ɣarsen tiři tukehhant ɛlaḥsab ict n tewṣeyyet i řebda. Ad tařeqqmed Harun d iḥenjiren nnes. ^□  

10 Xenni ad tawyed amwa ameẓyan zzat i Uqiḍun n Umsagar u Harun d iḥenjiren nnes ad ssarsen ifassen nsen x uzeǧif n uyenduz. ^■  

11 Ad tɣarṣed i uyenduz zzat i wudem n SIDI, ɣar wadaf n Uqiḍun n Umsagar.

12 Xenni ad teksid idammen n uyenduz uca ad ten tegged s uḍaḍ nnek x waccawen n uɛalṭar uca ad tzeǧɛed marra idammen iqqimen ɣar iḍaren n uɛalṭar. ^□  

13 Ad teksid ɛawed marra tadunt tenni idřin adan d min yuyřen ɣar tsa, d tnayen n tiẓẓař ak-d tadunt i xasent iǧan uca ad tessbexxared aya x uɛalṭar. ^□  

14 Maca aysum n uyenduz d yiřem nnes d umessař nnes ad ten tesscemḍed s tmessi barra i řmargeḥ n řɛeskar, aqa d taɣarṣt n ddnub. ^■  

15 Xenni ad teksid ijj n ucarri uca Harun d iḥenjiren nnes ad ssarsen ifassen nsen x uzeǧif n icarri.

16 Ad tɣarṣed i icarri uca ad teksid idammen nnes, ad ten tzeǧɛed x uɛalṭar zi marra iɣezdisen nnes. ^■  

17 Ad tqessed icarri di iceǧiqen, ad tessirded adan nnes d icekrad nnes uca ad ten tegged x iceǧiqen nnes u x uzeǧif nnes.

18 Ad tessiɣed i icarri am ikmeř x uɛalṭar, aqa-t d taɣarṣt n wecmaḍ i SIDI, ict n řefwaḥet ittfuḥen, aqa-tt d ict n tewhibt n tmessi i SIDI.

19 Xenni ad teksid icarri nneɣni uca Harun d iḥenjiren nnes ad ssarsen ifassen nsen x uzeǧif n icarri.

20 Ad tɣarṣed i icarri uca ad teksid zeg idammen nnes uca ad tegged man aya x iɣes n umezzuɣ afusi n Harun u x iɣes n umezzuɣ afusi n iḥenjiren nnes u ɛawed x uḍaḍ n yimez n ufus nsen afusi u x uḍaḍ n yimez n uḍar nsen afusi uca ad tzeǧɛed iḍammen iqqimen x uɛalṭar zi kuř jjihet. 21 Xenni ad teksid zeg idammen inni iǧan x uɛalṭar u zi zzect i wedhan uca ad zzaysen trucced Harun d warruḍ nnes u akides ad trucced ɛawed iḥenjiren nnes d arruḍ n iḥenjiren nnes, ḥima ad yiři ittwaqeddes, netta d arruḍ nnes, uřa d tarwa nnes d arruḍ n tarwa nnes akides. 22 Ad teksid tadunt n icarri řa d tadunt ɣar unewwar řa tadunt nni idřin adan, uřa min yuyřen ɣar tsa d tnayen n tiẓẓař s tadunt i xasent iǧan d acekrud afusi, minzi wa d icarri i udeccen n ikehhanen. 23 Ksi ɛawed ict n tecnift n weɣrum d ict n temsemment n weɣrum ittwasswejden s zzect d ict n teřfeft zi tsuǧet n weɣrum břa antun i iǧan zzat i wudem n SIDI. 24 Sars man aya marra x ifassen n Harun u x ifassen n iḥenjiren nnes uca ad ten tessenhezzed zi ssa ɣar da am ict n tewhibt n wenhezzi zzat i wudem n SIDI. 25 Awarni as ad ten teksid zeg ifassen nsen uca ad tt tessbexxared x uɛalṭar, x tɣarṣt n wecmaḍ, ad tiři d ict n řefwaḥet ittfuḥen zzat i wudem n SIDI. Aqa-tt d ict n tewhibt n tmessi i SIDI. 26 Ad teksid idmaren n icarri i udeccen n Harun uca ad ten tsenhezzed zi ssa ɣar da am ict n tewhibt n wenhezzi zzat i wudem n SIDI. Tanita ad tiři d tasɣart nnek. 27 Ad tessqeddsed idmaren n wenhezzi uřa d ucekrud i dd-ittwassgeɛɛden, wenni ittwanhezzen zi ssa ɣar da d tenni ittwasgeɛɛden, inni iǧan zeg icarri n udeccen, inni iǧan i Harun uřa i iḥenjiren nnes. 28 Aya ad yiři i Harun d iḥenjiren nnes d ict n tewṣeyyet i řebda zi jjihet n ayt n Israil, minzi d tawhibt n usgeɛɛed i yeǧa. Aya ad yiři d tawhibt tenni i ɣa ssgeɛɛden ayt n Israil zi tɣarṣa nsen n řehna. Aqa-tt d tawhibt nsen n usgeɛɛed i SIDI. ^■  

29 Arruḍ iqeddsen n Harun ad yiři i iḥenjiren nnes awarni as, maḥend ad ten dehnen u ad ten ařeqmen dayes. 30 Man wen zeg iḥenjiren nnes i ɣa yiřin d akehhan deg wemcan nnes uca ad yadef ɣar Uqiḍun n Umsagar maḥend ad isexxar di Zzawect Iqeddsen, ad t yarḍ sebɛa n wussan.

31 Ad teksid icarri i udeccen uca ad tessenggʷed aysum nnes deg ijj n wemcan iqeddsen. 32 Harun d iḥenjiren nnes ad ccen aysum n icarri d weɣrum i iǧan di tsuǧet ɣar wadaf n Uqiḍun n Umsagar. ^■   33 Ad ccen zi min zi ittwagg wesřaḥ, ḥima ad ten řeqqmen u ad ten ssqeddsen. Maca ijj n ubarrani war zzayes ittett, minzi aqa-tt d ict n řḥajjet tamqeddest. ^■   34 Mařa iceṭṭ ca zeg weysum n tɣarṣa i udeccen niɣ zeg weɣrum ař ṣṣbeḥ, ad tesscemḍed min iceṭṭen di tmessi. Ittxeṣṣa war t ittett ḥed, minzi d ict n řḥajjet iqeddsen i yeǧa.

35 Ammu i ɣa tegged ak-d Harun u ak-d iḥenjiren nnes, ad tegged ɛlaḥsab marra min d ac umureɣ. Ad ten tařeqqmed sebɛa n wussan. 36 Kuř ass ad tesswejded ayenduz d taɣarṣt n ddenb i weṣřaḥ uca ad tekksed ddenb x uɛalṭar umi ɣa tessiwḍed aṣřaḥ xas uca xenni ad t tdehned maḥend ad t tessqeddsed. 37 Sebɛa n wussan ad tefdid aɛalṭar uca ad t tessqeddsed, xenni ad yiři d amqeddas qaɛ. Wenni i ɣa iḥadan aɛalṭar, ad yiři d amqeddas. 38 D man aya i ɣa tesswejded x uɛalṭar: tnayen n izmaren n ijj n useggʷas, kuř ass, řebda. ^■   39 Ad tesswejded ijj n yezmar di ṣṣbeḥ u izmar nneɣni ad t tesswejded jar uɛecci d ǧiřet. 40 I yijj n yezmar ksi ɛecra di tesɣart n ijj n ifa n waren azdad ixeǧḍen s zzect ddzen tt-i-dd zi zzitun, u arebɛa di tesɣart n ijj n uhinu n binu d tawhibt n useyyeb. ^□   41 Ad tɣarṣed i yezmar nneɣni jar beddu n wezyen n wass ař dd-tewḍa tmeddit. Ad ɣares tarnid tawhibt n řɣiǧet amecnaw tenni n ṣṣbeḥ u ɛawed tawhibt n useyyeb. Aqa-t d řefwaḥet ittfuḥen. Aqa-t d tawhibt n tmessi i SIDI. 42 Ad tiři d taɣarṣt n wecmaḍ řebda di marra jjiřat nwem ɣar wadaf n Uqiḍun n Umsagar zzat i wudem n SIDI, mani i ɣa ssmuneɣ akidwem maḥend akidek ssiwřeɣ din. 43 Ad mmsagareɣ din ak-d ayt n Israil uca ad ittwaqeddes s uɛuǧi inu. 44 Ad qeddseɣ Aqiḍun n Umsagar d uɛalṭar. Ad ssqeddseɣ ɛawed Harun d iḥenjiren nnes, ḥima ad ayi iřin d ikehhanen. 45 Ad zedɣeɣ jar ayt n Israil, ad asen iřiɣ d AREBBI ^■   46 uca ad ssnen belli Necc d SIDI, AREBBI nsen, wenni ten issuffɣen zi temmurt n Miṣra maḥend ad zedɣeɣ di řwest nsen. Necc d SIDI, AREBBI nsen.”