1 Issiweř SIDI ak-d Musa, inna:

2 “Ini i ayt n Israil ad ayi dd-ssgeɛɛden tawhibt. Zi mkuř aryaz nni xas iddarracen uř nnes, ad teksim tawhibt n usgeɛɛed i Necc. ^■   3 Ta d tawhibt n usgeɛɛed tenni i ɣa teksid zzaysen: ureɣ d nnuqart d nnḥas, 4 d řeqṭen adeḥmi d urjuwani d uzeggʷaɣ iḥedqen d řeqṭen azdad d ccɛar n iɣayḍen, ^□   5 d iřmawen izeggʷaɣen n icarriyyen, d iřmawen n ddenfiřat, d ukeccuḍ n tcejjart n ukasiya, ^□   6 zzect i tfawt n řqendiř, řeɛṭur i zzect i wedhan u i řebxur ittfuḥen, 7 iẓra n biril d iẓra iɣřan maḥend ad ten ggen x upalṭu u x tajmect. ^■  

8 Ad ayi ggen ict n Zzawect Iqeddsen, ḥima ad zedɣeɣ di řwest nsen. 9 Ad t tegged amecnaw marra min d ac ɣa ssecneɣ, ɛlaḥsab amedya n Tzeddiɣt u ɛlaḥsab amedya n marra řeqcuɛ i dayes iǧan.

10 Ad ggen ɛawed ict n Ttabut n ukeccuḍ n tcejjart n ukasiya. Ad tiři tuzzeggart nnes tnayen n iɣaǧen d wezyen u tiru nnes ijj n uɣiř d wezyen u řuɛřa nnes ijj n uɣiř d wezyen. ^■  

11 Ggur ad t tcelled s wureɣ iṣfan, zi daxeř u zi barra ad t tcelled, uca ɣar sennej ad as tennḍed ijj n zzwaq n wureɣ.

12 Ad as tessfesyed arebɛa n texrazin n wureɣ. Ad tent tcedded ɣar arebɛa n tyarsawin nnes. Tnayen n texrazin ad iřint ɣar yijj n uɣezdis u tnayen n texrazin i uɣezdis nneɣni.

13 Ad tegged iɛumad i trebbut zeg ukeccuḍ n tcejjart n ukasiya uca ad ten tedřed s wureɣ.

14 Sidfem iɛumad di texrazin nni iǧan ɣar iɣezdisen n Ttabut ḥima ad zzaysen arbun Ttabut.

15 Iɛumad ad iřin di texrazin n Ttabut, war zzaysent ttekksen ca. ^■  

16 Ad tessarsed Cchadet, tenni d ac i ɣa wceɣ, di Ttabut. ^■  

17 Ad tegged ɛawed ict n tqebbart n weṣřaḥ n wureɣ iṣfan s yict n tuzzeggart n tnayen iɣaǧen d wezyen u s ict n tiru n ijj n uɣiř d wezyen. ^□  ■  

18 Ad tegged ɛawed tnayen n ikiruben n wureɣ iɛdeř s wefḍis i dd-itteffɣen zi tnayen n ixfawen n tqebbart n weṣřaḥ.^□  ■  

19 Ad tegged ijj n ukirub ɣar ijj n yixef u ijj n ukirub nneɣni ɣar yixef nneɣni. Ad teggem ikiruben zi tqebbart n weṣřaḥ ɣar tnayen n ixfawen nnes. 20 Ikiruben ggur ad bezzɛen afriwen nsen sennej nsen uca ad dřen taqebbart n weṣřaḥ s wafriwen nsen. Udmawen nsen ad iřin qibač i ijj n wenneɣni uca ad ẓaren udmawen n ikiruben ɣar tqebbart n weṣřaḥ. ^■   21 Ggur ad tegged taqebbart n weṣřaḥ x Ttabut uca ad tessarsed Cchadet i d ac ɣa wceɣ di Ttabut. ^■   22 Dinni i kic i ɣa mmeřqiɣ uca ad kik ssiwřeɣ zi sennej i tqebbart n weṣřaḥ, zi jar tnayen n ikiruben inni iǧan sennej i Ttabut n Cchadet, x marra min d ac ɣa umureɣ i ayt n Israil. ^■  

23 Ad tegged ict n tzewḍa n ukeccuḍ n tcejjart n ukasiya, ɣares ict n tuzzeggart n tnayen n iɣaǧen u ict n tiru n ijj uɣiř u ijj n řuɛřa n ijj uɣiř d wezyen. 24 Ad tt tedřed s wureɣ iṣfan uca ad as tegged ɣar tma nnes ijj zzwaq n wureɣ. 25 Ggur ad tegged ict n tma i d as dd-innḍen n ijj n cbar n ufus u ɣar tma i d as dd-innḍen ad tegged ijj n zzwaq n wureɣ. 26 Ggur ad tegged arebɛa n texrazin n wureɣ uca ad tent tcedded ɣar arebɛa n tɣemmura nni iǧan ɣar arebɛa n iḍaren nsen. 27 Tixrazin ad iřint udsent i tma maḥend ad daysent ttwaṭṭfen iɛumad i tarebbut n tzewḍa. 28 Ad tegged iɛumad i tarebbut zeg ukeccuḍ n tcejjart n ukasiya, ad ten tɣeǧfed s wureɣ uca ad zzaysen arbun tazewḍa. 29 Ad tegged ɛawed ṭṭbaṣi nnes d tɣenjayin nnes d iɣarrafen nnes d řkisan nnes nni zi ɣa farrɣen. Ggur ad ten tegged s wureɣ iṣfan.

30 X tzewḍa ad tegged aɣrum n wescan řebda zzat i wudem inu.

31 Ad tegged řqendiř s wureɣ iṣfan. Ad tegged řqendiř s wefḍis n wemziř. Afud x uḍar nnes d iɣaǧen nnes uřa d řkisan nnes d temrisin nnes d nnuwwarat nnes ad zzayes-dd ffɣent. ^■   32 Setta n iɣaǧen ad dd-ffɣen zeg iɣezdisen nnes, třata n iɣaǧen zeg ijj n uɣezdis n řqendiř d třata n iɣaǧen zeg uɣezdis nneɣni n řqendiř. 33 Třata n řkisan ad iřin deg ijj n uɣiř di furma n nnuwwarat n ǧewz ak-d temrist d nnuwwar uca ɛawed ɣar uɣiř nneɣni třata n řkisan di furma n nnuwwarat n ǧewz ak-d temrist d nnuwwar. Ammu ɛawed iggin marra setta n iɣaǧen nni dd-iffɣen zi řqendiř. 34 Ɣar řqendiř simant nnes ad din iřin arebɛa n řkisan di furma n nnuwwarat n ǧewz ak-d temrisin d nnuwwarat nsen. 35 Ad din tiři ict n temrist sadu tyuya n iɣaǧen i zzayes dd-iffɣen u ict n temrist sadu tyuya n iɣaǧen i zzayes dd-iffɣen awarni as, u ɛawed, ict n temrist sadu tyuya n iɣaǧen i zzayes dd-iffɣen awarni as. Ammu i ɣa yiři i setta n iɣaǧen i dd-iffɣen zi řqendiř. 36 Timrisin nsen d iɣaǧen nsen ad zzayes-dd ffɣen uca marra aya ad ittwaɛdeř s wefḍis n wemziř s wureɣ iṣfan. 37 Ad tegged setta n řefnarat nnes uca ad ssarsen řefnarat nnes x řqendiř maḥend ad wcent tfawt ɣar ṭṭarf n ujemmaḍ. 38 Tijeqqaḍin n teftič nnes d tmejmarin nnes ad iřint s wureɣ iṣfan. ^□   39 Ad ittwagg řqendiř zeg ict n talint n wureɣ iṣfan s marra řeqcuɛ-a akides. 40 Uca xzar, ad t tegged amecnaw amedya nnes wenni d ac ittwamřen deg wedrar.” ^■