1 “Ad tegged Tazeddiɣt s ɛecra n tjartiřin s řeqṭen azdad imuden u s ufiřu adeḥmi d urjuwani d uzeggʷaɣ iḥedqen, ak-d ikiruben, inni i ɣa tegged am řxedmet n ufennan. ^■   2 Tuzzeggart n yict n tjartiřt ad tiři tmenya u-ɛicrin n iɣaǧen u tiru n yict n tjartiřt arebɛa n iɣaǧen. Marra tijartiřin ad ɣarsent yiři řeɛbar d ijj. 3 Xemsa n tjartiřin ad tent ssmunen ict ak-d tenneɣni u ɛawed xemsa n tjartiřin ad tent ssmunen ict ak-d tenneɣni. 4 Ɣar tma n yict n tjartiřt ɣar ṭṭarf mani tt i ɣa ssmunen, ad tegged tisarawin tideḥmanin. Ammu tent i ɣa tegged ɛawed ɣar tma n tjartiřt nneɣni ɣar ṭṭarf i ɣar iǧa useřqi nneɣni. 5 Xemsin n tsarawin i ɣa tegged deg ict n tjartiřt u xemsin n tsarawin ɣar ṭṭarf n tjartiřt tenni ɣar iǧa useřqi nneɣni, maḥend tisarawin ad mmeřqant ict ak-d tenneɣni. 6 Ad tegged ɛawed xemsin n tsennarin n wureɣ uca ad tessmuned tijartiřin ict ak-d tenneɣni s tsennarin maḥend ad tedweř d ict n Tzeddiɣt.

7 Ad tegged ɛawed tijařtiřin s ccɛar n iɣayḍen maḥend ad iřint d ijj n uqiḍun x Tzeddiɣt. Ad tegged ḥiṭac n tjartiřin. ^■   8 Tuzzeggart n ict n tjartiřt ad tiři třatin n iɣaǧen u tiru n ict n tjartiřt ad tiři arebɛa n iɣaǧen. Ḥiṭɛac n tjartiřin ad ɣarsent yiři řeɛbar d ijj. 9 Ad tessmuned xemsa n tjartiřin weḥḥedsent d setta n tjartiřin ɛawed weḥḥedsent. Tajartiřt wiss setta ad tt tḍefṣed zzat i wudem n Uqiḍun.

10 Ad tegged xemsin n tsarawin ɣar tma n yict n tjartiřt ɣar ṭṭarf ɣar useřqi, uca xemsin n tsarawin x tma n tjartiřt ɣar useřqi nneɣni.

11 Ad tegged xemsin n tsennarin n nnḥas uca ad tent tessidfed di tsarawin uca ad tessmuned Aqiḍun maḥend ad yiři d ijjen.

12 Min iceṭṭen n tjartiřin n uqiḍun, azyen n tjartiřt tenni iceṭṭen ad yayeř ɣar ḍeffar n Tzeddiɣt.

13 N min iceṭṭen di tuzzeggart n tjartiřin, ijj n uɣiř ad yayeř ɣar yijj n ṭṭarf d ijj n uɣiř ɣar ṭṭarf nneɣni, ɣar tnayen n iɣezdisen n Tzeddiɣt maḥend ad as iřeḥḥef i yijj n uɣezdis u i uɣezdis nneɣni.

14 Ad tegged i Uqiḍun ɛawed ict n tseqqaft n iřmawen izeggʷaɣen n icarriyyen u sennej i man aya ict n tseqqaft n iřmawen n ddenfiřat.

15 Ad tegged i Tzeddiɣt tifeřwin n ukeccuḍ n tcejjart n ukasiya inni ibedden nican.

16 Řeɛbar n tuzzeggart n ict n tefrewt dayes ɛecra n iɣaǧen u tiru n ict n tefrewt řeɛbar n ijj n uɣiř d wezyen.

17 I kuř tafřewt ad ɣares iřin tnayen n iḍaren, inni issmeřqan tiwečmatin ict ak-d tenneɣnit, ammu i ɣa tegged i marra tifeřwin n Tzeddiɣt.

18 Ad tegged i Tzeddiɣt tifeřwin, ɛicrin n tfeřwin ɣar jjihet n ljanub, ɣar yeffus.

19 Ad tegged arebɛin n tyarsawin n nnuqart maḥend ad tent ssarsen sadu ɛicrin n tfeřwin, tnayen n tyarsawin sadu ict n tefřewt i tnayen n iḍaren nnes, d tnayen n tyarsawin sadu tefřewt nneɣni i tnayen n iḍaren nnes. 20 Ɛawed ad tegged ɛicrin n tfeřwin i uɣezdis nneɣni n Tzeddiɣt, ɣar jjihet n ccamal, 21 s arebɛin n tyarsawin nsen n nnuqart: tnayen n tyarsawin i kuř tafřewt d tnayen n tyarsawin swadday n tefřewt nneɣni. 22 U ɣar uɣezdis n řɣarb n Tzeddiɣt ad as tegged setta n tfeřwin. 23 Ad tegged tnayen n tfeřwin i tɣemmura n Tzeddiɣt i iǧan ɣar tnayen n iɣezdisen n ḍeffar. 24 Zi swadday ad iřint am wacniwen uca ammu i ɣa iřint nican d icten ař i ɣa awḍent sennej deg ict n texrazt. Ammu i ɣa yiři i tnayen n tfeřwin ɣar tnayen n tɣemmura. 25 Ad din iřint tmenya n tfeřwin ak-d tyarsawin nsent n nnuqart. Xenni seṭṭac n tyarsawin, tnayen n tyarsawin sadu ict n tefřewt d tnayen n tyarsawin sadu tefřewt nneɣni.

26 Ad tegged tiḥenya n uɛarreḍ zeg ukeccuḍ n tcejjart n ukasiya inni i ɣa iɛdun x tfeřwin, xemsa i tfeřwin n ijj n uɣezdis n Tzeddiɣt 27 u xemsa n tḥenya n uɛarreḍ i tfeřwin ɣar uɣezdis nneɣni n Tzeddiɣt u xemsa n tḥenya n uɛarreḍ i tfeřwin n uɣezdis n Tzeddiɣt ɣar uɣezdis n řɣarb ɣar tnayen n iɣezdisen n ḍeffar. 28 Taḥnact n uɛarreḍ di řwest ad teɛdu x tfeřwin di řwest, zeg ijj n yixef ɣar wenneɣni. 29 Ad tɣeǧfed tifeřwin s wureɣ uca ad tegged tixrazin nsen n wureɣ maḥend ad daysent ssidfen tiḥenya n uɛarreḍ. Ad tedřed ɛawed tiḥenya n uɛarreḍ s wureɣ. 30 Ad tessgeɛɛded Tazeddiɣt ɛlaḥsab amedya n řebni wenni d ac ittwamřen x wedrar. ^■  

31 Ad teggeḍ ijj n uřeḥḥaf s řeqṭen adeḥmi d urjuwani d uzeggʷaɣ iḥedqen u s řeqṭen azdad imuden, ad t ggen am řxedmet n ufennan, uca ikiruben ad xas iřin. ^■   32 Ad t tayyřed x arebɛa n ipilaren n ukeccuḍ n tcejjart n ukasiya i idřin s wureɣ. Tisennarin nsen ad iřint n wureɣ uca ipilaren nni ad bedden x arebɛa n tyarsawin n nnuqart. 33 Ad tayřed ařeḥḥaf ɣar wadday n tsennarin uca ad tessidfed Ttabut n Cchadet daxeř i uřeḥḥaf uca ařeḥḥaf ad ibḍa jar Uqeddas d Weqdas n Uqeddas.

34 Ad tessarsed taqebbart n weṣřaḥ x Ttabut n Cchadet deg Weqdas n Uqeddas.

35 Ad tegged tazewḍa barra i uřeḥḥaf uca ad tessarsed řqendiř qibač i tzewḍa ɣar uɣezdis n Tzeddiɣt ɣar jjihet n ljanub u ad tegged tazewḍa ɣar uɣezdis ɣar jjihet n ccamal.

36 Ad tegged arwaq s řeqṭen adeḥmi d urjuwani d uzeggʷaɣ iḥedqen u s řeqṭen azdad imuden ɣar wadaf n Uqiḍun, amecnaw ijj n umudi n uxeyyaḍ. ^■   37 Ad tegged i arwaq xemsa n ipilaren n ukeccuḍ n tcejjart n ukasiya uca ad ten tcelled s wureɣ. Tisennarin nsen ad iřint n wureɣ u i ipilaren nni ad asen tfesyed xemsa n tyarsawin n nnḥas.”