1 Uca inna Netta i Musa:

“Gaɛɛed ɣar SIDI, cek d Harun d Nadab d Abihu d sebɛin n imɣaren n Israil uca aḍarem zi řaggʷaj. 2 Musa weḥḥdes ad dd-iqarreb ɣar SIDI, maca nitni war ttqarriben ca. Uřa d řgens war kides ittgiɛɛid ca.” 3 Musa iɛqeb-dd uca ixebbar řgens x marra awařen n SIDI u x marra lfarayiḍ. Marra řgens yarra-dd s yijj n wawař, nnan: “Marra awařen i inna SIDI ad zzaysen negg.” ^□  ■   4 Musa yura marra awařen n SIDI. Ɣar ṣṣbeḥ zic ikkar uca ibna ijj n uɛalṭar ɣar iḍaren n wedrar uca igga tenɛac n imayḍuten n weẓru, ɛlaḥsab řqedd n tenɛac n tqebbař n Israil. 5 Issekk iḥudriyyen zeg ayt n Israil, inni issbexxaren tiɣarṣi n wecmaḍ u qeddmen tiɣarṣi n řehna zeg iyenduzen i SIDI. 6 Iksi Musa azyen n idammen, igga i-t di ṭṭbaṣi uca azyen nneɣni n idammen izeǧeɛ i-ten x uɛalṭar. 7 Iksi adlis ittwannḍen n Řɛahd, iɣra i-t x imezzuɣen n řgens uca nitni nnan: “Marra min d aneɣ inna SIDI ggur ad t negg u ggur ad t nṭaɛ.” 8 Iksi Musa idammen, izuzzar i-ten x řgens, inna: “Xzar, ina d idammen n Řɛahd nni igga SIDI akidwem x marra awařen-a.” ^■  

9 Igeɛɛed Musa ak-d Harun d Nadab d Abihu d sebɛin n imɣaren n Israil.

10 Ẓrin AREBBI n Israil. Tuɣa sadu iḍaren nnes amecnaw tisi n zzellij i ittwaggen n ṣaffir aziza, iṣfa amecnaw ajenna simant nnes. ^■  

11 War isswiẓẓeḍ afus nnes x imcennɛen n ayt n Israil uca nitni xzaren ɣar AREBBI, ccin, swin.

12 Inna SIDI i Musa: “Gaɛɛed-dd ɣari ɣar wedrar uca qqim din uca Necc ad ac wceɣ tiřwiḥin n weẓru, Ccariɛa d řumarat tinni uriɣ x teřwiḥin, ḥima ad asen tent tessřemded.”

13 Ikkar Musa ak-d Yacuwa, amsexxar nnes, uca igeɛɛed Musa ɣar wedrar n AREBBI.

14 Inna i imɣaren: “Rajam aneɣ danita ař dd ɣarwem i ɣa nedweř. Xzar, Harun d Ḥur akidwem. Mařa din ḥed ɣares ddɛawi, ittxeṣṣa as ad ɣarsen iraḥ.”

15 Xenni igeɛɛed Musa ɣar wedrar uca idřa ijj n useynu adrar.

16 Aɛuǧi n SIDI tuɣa izeddeɣ deg wedrar n Sina u aseynu idřa i-t setta n wussan uca deg wass wiss sebɛa iřaɣa-dd netta x Musa zi řwest n useynu.

17 Ascan n uɛuǧi n SIDI tuɣa-t di tiṭṭawin n ayt n Israil am tmessi ittetten x tqiccat n wedrar. ^■  

18 Yudef Musa ɣar řwest n useynu uca igeɛɛed adrar. Tuɣa Musa iqqim arebɛin n wussan d arebɛin n ǧyaři deg wedrar.