Tiweṣṣa zi jjihet n mammec i ɣa nemṣurruf ak-d umqarreb
23
1 “War ssuffuɣ řexbar n ixarriqen. War ttic afus nnek i uɛeffan maḥend ad tiřid d acehhad n ddeǧ. 2 War areddef azyen ameqqran di řɣar u war dd-ttarri di ddeɛwet ař ɣa tmeyyřed teggʷejed x řḥeqq awarni i waṭṭas, u ad tfarɣed řḥeqq.
3 Di ddeɛwet war ttriḥ ca ak-d řmeskin. ■
4 Mařa teřqid afunas niɣ aɣyuř iweddar n řeɛdu nnek, ittxeṣṣa ad as t tarred nican. ■ 5 Mařa teẓrid aɣyuř n wenni tcarhed iwḍa s ddqeř nnes, ittxeṣṣa cek war t tejjid i netta waha, maca cek d netta jmiɛ ad tfekkem aɣyuř. ■
6 War sfarraɣ tasɣart n umezřuḍ i din ɣarek di ddeɛwet nnes. ■
7 Beɛɛed x tmesřact iɣeccen. War neqq afurri niɣ amsegged, minzi Necc war ttbarriɣ aɛeffan. 8 War kessi tarzeft, minzi tarzeft tessdarɣař tiṭṭawin yarezmen u tessfarraɣ awařen n imseggden. ■
9 War tzeyyarem x ubarrani. Aqa kenniw tessnem nnefs n ubarrani, minzi tuɣa kenniw d ibarraniyyen di temmurt n Miṣra. ■
10 Setta n iseggʷusa ad tzarɛed tammurt nnek uca ad tessmuned řɣiǧet nnes.
11 Deg useggʷas wiss sebɛa ad tt tejjed ad tareyyḥed uca ad as tarxud, ḥima ad zzayes ccen imezřaḍ n řgens nnek uca min ɣa jjen nitni ad zzayes ccen řmař n řexřa. Ammu i ɣa tegged ɛawed s umarjuɛ n uḍiř nnek d zzitun nnek. ■
12 Di setta n wussan ad tegged řxedmet nnek u deg wass wiss sebɛa ad tareyyḥed, maḥend ad yareyyeḥ ufunas nnek d weɣyuř nnek u ad yarr nnefs mmis n tesmeɣt nnek d ubarrani. ■
Tiweṣṣa zi jjihet n uweqqar i Sidi Arebbi
13 Di marra min d awem nniɣ, ḥḍam t. War ttidarem isem n irebbiten nneɣni. War ggur ad ittwaseř isem nnes zeg uqemmum nnek. ■
14 Třata n twařawin deg useggʷass ad ayi tɛeyydem Řɛid.
15 Řɛid n Weɣrum břa Antun ad t teḥḍam. Sebɛa n wussan ad tecced aɣrum břa antun, am mammec kenniw umureɣ Necc, di řweqt ittwaggen deg uyur Abib, minzi dayes i dd-teffɣed zi Miṣra. War dd-tusim s ifassen ixwan zzat i wudem inu. ■
16 Ḥḍam ɛawed Řɛid n Tmeyra, Řɛid n Tmenzut n řxedmet nnek i tzarɛed deg iyyar, u Řɛid n Usmuni n ṣṣabet deg uneggar n useggʷas, xmi i ɣa tessmuned řɣiǧet n řxedmet nnek zeg iyyar.
17 Třata n twařawin deg useggʷas ad ḍharen marra iryazen n řgens nnek zzat i wudem n Sidi, SIDI.
18 War ttqeddam idammen n tɣarṣt inu ak-d min ixemmaren, u tadunt n tɣarṣt n řɛid inu war ttnusi ǧiřet tekmeř ař ṣṣbeḥ.
19 Tamezwarut n tmenzut zeg wudem n temmurt nnek ad tt tawyed ɣar Taddart n SIDI, AREBBI nnek. War snenni iɣayḍ d ameẓyan s uɣi n yemmas. ■
20 Xzar, ad ssekkeɣ ijj n Lmalak zzat i wudem nnek ḥima ad cek iḥḍa deg webrid uca ad cek yawi ɣar wemcan nni sswejdeɣ. ■ 21 Ḥḍa arendad i wudem nnes uca seř i wawař nnes, war xas ssarzig ca řeɛmar, minzi Netta war ittekkes iɛeddiyen nwem, minzi Isem inu aqa-t dayes. 22 Maca mařa s tidett ad tesřed i wawař nnes, ad tegged marra min d ac ɣa iniɣ, ad iřiɣ d řeɛdu i řɛedyan nnek uca ad ḥṣareɣ inni cek iḥeṣṣaren.■ 23 Minzi Lmalak inu ad yiři zzatek, ad cek ssidfeɣ di temmurt n Imuriyyen d Iḥittiyyen d Ifiriziyyen d Ikenɛaniyyen d Iḥiwiyyen d Iyabusiyyen, u ad ten teḥḥiɣ. 24 War ttaḍar ɣar irebbiten nsen niɣ ad ten tɛebded niɣ ad tegged am tteggen nitni, maca ad ten tteḥḥid qaɛ uca ad tarẓed marra imayḍuten nsen iqeddsen. 25 Ad tɛebdem SIDI, AREBBI nwem, u Netta ad ibarek aɣrum nnek d waman nnek uca Necc ad kkseɣ řehřacat zi řwest nnek. ■ 26 War ttiři temɣart nni umi iwḍa uɛeddis niɣ war ittirwen di temmurt nnek. Necc ad kemmřeɣ řqedd n wussan nnek. ■ 27 Ad ssekkeɣ anexřiɛ zzat i uɣembub nnek, ad ssxarewḍeɣ marra řgens i ɣa tafed deg webrid nnek uca ad arreɣ marra řɛedyan nnek ad xak arewřen. ■ 28 Necc ad ssekkeɣ irezzan zzat i uɣembub nnek, inni i ɣa yaẓẓřen x Iḥiwiyyen d Ikenɛaniyyen d Iḥittiyyen zzat i wudem nnek. ■ 29 War xasen ttaẓẓřeɣ zi zzat nwem deg ijj n useggʷas, maḥend war tᵉttɣimi temmurt d řexřa u řmař n řexřa war xak ttmarnin aṭṭas. 30 S cway cway ad xasen aẓẓreɣ zi zzat nekk, ař ɣa temmarenyed deg waṭṭas uca ad tzemmared ad teksid tammurt d řwart. 31 Necc ad ggeɣ iymiren zi Řebḥar n Telga ař řebḥar n Ifilisṭiniyyen u zi řexřa ař iɣzar n Lfuraṭ, minzi ad arreɣ imezdaɣ n temmurt deg ufus nnek uca ad cek arreɣ ad xasen taẓẓřed zi zzat nnek. ■ 32 War ttegg řɛahd akidsen niɣ ak-d irebbiten nsen. ■ 33 War iɛeddeř ad zedɣen di temmurt nnek, ḥima war cek ttarrin ad akidi texḍid. Mařa tɛebded i irebbiten nsen, ad ac yiři man aya d taxceft i cek.” ■