1 “Mařa ittwaf uceffar ɛad am ittacar, uca iwta i-t uca immut, war xas ttiřin idammen deg ufus nnes. 2 Mařa tenqar-dd xas tfuct, ad xas iřin idammen deg ufus nnes. Ad as ixeǧeṣ uceffar marra. Mařa war ɣares ca, ad immenz di ssibbet n tucceffra nnes. 3 Mařa tᵉttwaf tucceffart teddar deg ufus nnes, d ufunas tuɣa-t niɣ d aɣyuř niɣ d ijj zeg wuǧi, ittxeṣṣa as ad ixeǧeṣ tnayen n tseqqar.

4 Mařa ḥed ijja ad ihda iyyar niɣ amarjuɛ n uḍiř uca yarwes taḥimart nnes dayes uca ad asen iḍřeq ad hdan di temmurt n wenneɣni, xenni ad tt ixeǧeṣ zi řemxeyyer n yeyyar nnes u zi řemxeyyer n umarjuɛ n uḍiř nnes.

5 Mařa teffeɣ-dd tmessi uca teřqef asennan uca tecca tiqebbiḍin n imendi niɣ imendi ibedden niɣ iyyar, xenni wenni iqqden timessi ad ixeǧeṣ marra min ittwacemḍen.

6 Mařa ḥed iḥḍa i wajjar nnes nnuqart niɣ řeqcuɛ u man aya ittwacar as zi taddart n weryaz nni, xenni aceffar, mařa ufin t, ggur ad ixeǧeṣ tnayen n tseqqar. 7 Mařa war ittwif uceffar, řexdenni ad ssqarrben bab n taddart ɣar AREBBI maḥend ad ssnen ma war isswiẓẓeḍ ufus nnes ɣar wagřa n wajjar nnes.

8 Di kuř tanfuč zi jjihet n ufunas niɣ n weɣyuř niɣ ijjen zeg wuǧi niɣ n warruḍ niɣ n min iweddaren i zzayes inna ḥed: ‘Aqa-t d wa!’, ad dd-tas tmesřact i iǧan jar asen s tnayen zzat i AREBBI uca wenni xas ɣa iḥkem AREBBI, ad ixeǧeṣ i wajjar nnes tnayen n tseqqar.

9 Mařa ḥed iwca i wajjar nnes aɣyuř niɣ afunas niɣ ijj zeg wuǧi, niɣ mammec ma tegga řebhimet, ḥima ad t iḥḍa uca immut niɣ yarreẓ niɣ ucaren t, am war iẓri ḥed,

10 xenni ad tiři tjaǧit ɣar SIDI jar asen belli war isswiẓẓeḍ afus nnes ɣar wagřa n wajjar nnes. Bab nnes ad iqbeř tjaǧit nnes uca ad taf nhřa ma wenneɣni ad t ittxeǧeṣ.

11 Maca mařa ucaren t nican zi ɣares, di lḥala-ya ad ixeǧeṣ i bab nnes.

12 Mařa tban tᵉttwamezzeq nican, ggur ad t yawi i cchadet uca war ggur ad ittxeǧeṣ min ittwamezzqen.

13 Mařa ḥed yarḍeř ca x wajjar nnes uca tarreẓ niɣ temmut di řɣayeb n bab nnes, ittxeṣṣa as ad tt ixeǧeṣ marra.

14 Maca mařa bab nnes tuɣa iḥḍar, ad taf nhřa ma ad tt ixeǧeṣ. Mařa tuɣa icra tt xas, ad yawi řexřaṣ nnes.

15 Uca mařa immarḍen ḥed x ca n teɛzařect tuɣa war tt ixḍib ḥed ɛad uca iṭṭeṣ akides, ittxeṣṣa as ad as iwc ṣṣadaq imun maḥend ad tt yawi d tamɣart.

16 Mařa babas war ixs ad as tt iwc, waxxa amenni ad as iwzen ṣṣadaq n teɛzuray s nnuqart.

17 War ttejji taseḥḥart ad teddar. ^■  

18 Man wen ma iṭṭṣen ak-d ijj n řmař, ad t nɣen nican. ^■  

19 Wenni i ɣa iwehhben ca n tɣarṣt i yijj n arebbi, u maci i SIDI waha, ittxeṣṣa ad ittwaḥarrem i uteḥḥi, ^■  

20 War ddeǧet abarrani u war xas ttzeyyarem, minzi tuɣa uřa d kenniw d ibarraniyyen di temmurt n Miṣra. ^■  

21 War sseḥqaram ca ict n tajjač niɣ ijj n uyujiř. ^■   22 Mařa tiwḍed ad t tesseḥqared aṭṭas uca netta isɣuyy-dd ɣari, aqa Necc s uɣiř ad sřeɣ i tɣuyyit nnes. 23 Ad yareɣ weɣḍab inu uca Necc ad kenniw nɣeɣ s ssif, timeṭṭa nwem ad dewřent d tijjař d tarrawt nwem d iyujiřen.

24 Mařa tareḍřed nnuqart i řgens inu, i umezřuḍ i din ɣarek, xenni war ttegged akides amecnaw bab n umarwas niɣ ad xas tegged arriba. ^■  

25 Mařa teksid arruḍ n wajjar nnek d aḍman, arr as t qbeř ma ad teɣři tfuct. ^■   26 Minzi war ɣares mɣir aḥeǧef wanita, aqa-t d arruḍ x teřmect nnes. Min di i ɣa iṭṭes xenni? Xmi ɣari dd ɣa isɣuyy, řexdenni ad as sřeɣ, minzi Necc aqa d aḥnin!

27 War ttceqqef di AREBBI u war tekkʷar amgewwed n řgens nnek. ^■  

28 War sɛeṭṭařa taccuret n tmeyra nnek niɣ aḥřay n teysart nnek. Ad ayi tewced uřa d amenzu n iḥenjiren nnek. ^■   29 Ammu i ɣa tegged ɛawed s ifunasen nnek d wuǧi nnek. Sebɛa n wussan ad iřin ak-d yemmatsen uca ɣar wass wiss tmenya ad ayi ten tewced. ^■  

30 Ad ayi tiřim d imqeddasen u war ttᵉttem aysum i ittwamezzqen di řexřa. Ad t tenḍarem i yiṭan.” ^□  ■