1 “Tina i iǧan d lfarayiḍ tinni d asen i ɣa tessiwḍed. 2 Mařa tesɣid ismeɣ d Aɛibrani, xenni netta ad ac isexxar setta n iseggʷusa, maca deg useggʷas wiss sebɛa ad iffeɣ d aḥurri baṭeř. ^■   3 Mařa yudef weḥḥdes, weḥḥdes i ɣa iffeɣ, mařa ɣares tamɣart, ad iffeɣ netta d temɣart nnes. 4 Mařa sidis iwca as tamɣart uca nettat tejja as-dd iḥenjiren d tḥenjirin, xenni tamɣart d tarwa nnes ad iřin n sidis, u ggur xenni netta ad iffeɣ s iman nnes. 5 Maca mařa ismeɣ inna nican: ‘Necc xseɣ sidi inu d temɣart inu d tarwa inu, war xseɣ ad ffɣeɣ d aḥurri’, ^■   6 řexdenni sidis ad t issbedd zzat i AREBBI. Ad t yawi ɣar tewwart niɣ ɣar ṭafřewt ɣar uɣezdis n tewwart uca sidis ad as issnuqqeb amejjun nnes s yict n tsineft uca netta ad as isexxar i řebda.

7 Mařa ḥed izzenz yeǧis d tayya, war ggur ad teffeɣ am muxas tteffɣen isemɣan.

8 Mařa war d teɛjib i tiṭṭawin n sidis u netta tuɣa ixeḍb i-tt, ad tt yejj ad tᵉttwafdi. War izemmar ad tt izzenz i yijj n řgens n barra minzi netta iɣdar zzayes s min igga. 9 Mařa ixḍeb i-tt i mmis, ad kides yegg ɛlaḥsab azerf i ittxeṣṣa tiḥenjirin.

10 Mařa iksi tamɣart nneɣni i yixef nnes, war ineqqeṣ řɛuč n weysum nnes, niɣ arruḍ nnes, niɣ řɛacart nnes.

11 Mařa netta war d as iggi třata-ya, xenni nettat ad teffeɣ baṭeř, břa řexraṣ.

12 Wenni i ɣa iwten ḥed ař ɣa immet, ad t nɣen nican. ^■  

13 Mařa war t iggi neɛmada, maca AREBBI igga as-dd deg ufus nnes, řexdenni Necc ad ac ssecneɣ amcan mani izemmar i ɣa yarweř.

14 Maca mařa ḥed iɛedda x wajjar nnes uca inɣa i-t s řeɣdaret, xenni ad t teksid ɣar uɛalṭar inu maḥend ad t nɣen.

15 Wenni iwtin babas niɣ yemmas, ad ittwaneɣ nican. ^■  

16 Wenni yucaren bnadem uca izzenz i-t, niɣ ittwaf ɛad ɣares, ad ittwaneɣ nican.

17 Wenni i ɣa ineɛřen babas niɣ yemmas, ad ittwaneɣ nican. ^■  

18 Mařa iryazen mcubbcen uca ijjen iwta wenneɣni s weẓru niɣ s řpuniyyet, uca wanita war immut, maca iwḍa di tassut,

19 xenni, mařa wanita ikkar ɛawed uca yuyur ɣar barra x teɣɣarct, ad yiři wenni t iwtin d amezdag. Ad as ixeǧeṣ mɣir min yareyyeḥ uca ad t yejj ad iggenfa mliḥ.

20 Mařa ḥed iwta ismeɣ nnes niɣ tayya nnes s uzeǧaḍ uca immut sadu ufus nnes, xenni ittxeṣṣa ad as yaɣ x tesɣart nnes nican.

21 Maca mařa iqqim ibedd ijj niɣ tnayen n wussan, war d as yuɣi tasɣart, minzi netta d tmenyat n nnuqart nnes i yeǧa.

22 Mařa iryazen mmenɣen uca wtin ict n temɣart s ddeyset uca iwḍa as-dd uɛeddis nnes, maca war iǧi ca d ayezzim, xenni netta ad ixeǧeṣ nican ijj n multa ɛlaḥsab min d as ɣa ittar weryaz n temɣart uca ad tt iwc i řquḍat. ^□   23 Mařa imsar maca ca n uyezzim d aɛeffan, řexdenni ad tewced tudart s tudart, 24 tiṭṭ s tiṭṭ, tiɣmest s teɣmest, afus s ufus, aḍar s uḍar, ^■   25 acmaḍ s wecmaḍ, ayezzim s uyezzim, ticti s tecti.

26 Mařa ḥed iřqef tiṭṭ n ismeɣ nnes niɣ tiṭṭ n tayya nnes, iḍeyyeɛ i-tt, xenni ad t yejj ad yuyur amenni zi ssibbet n tiṭṭ nnes. 27 Mařa s tecti ittekkes tiɣmest n ismeɣ nnes, niɣ tiɣmest n tayya nnes, xenni ad as yejj ad yuyur amenni zi ssibbet n teɣmest nnes.

28 Mařa afunas ibarrez aryaz niɣ tamɣart, u wanita immut, xenni afunas ad t arjmen u aysum nnes war zzayes ttᵉtten. Bab n ufunas ad yiři d afurri. ^■   29 Maca mařa afunas tuɣa d abarrez iḍennaḍ d fariḍennaḍ uca bab nnes tuɣa issen uca war t iḥḍi uca inɣa aryaz niɣ tamɣart, xenni afunas ad t arjmen uca ɛawed bab nnes ad t nɣen. 30 Mařa ggin xas ttaman n weṣřaḥ, řexdenni ad iwc marra min xas ggin d ttaman n ufekki i tudart nnes, ^□   31 niɣ mařa afunas ibarrez aḥenjir niɣ taḥenjirt, ad as ggen ɛlaḥsab lfariḍa aya. 32 Mařa afunas ibarrez ismeɣ niɣ tayya, ad wcen třatin ciqlu n nnuqart i sidis, uca afunas ad t arjmen.

33 Mařa ḥed yarzem anu niɣ mařa ḥed iɣza anu uca war t idři, uca iwḍa dayes ufunas niɣ aɣyuř, 34 xenni bab n wanu ad ixeǧeṣ. Ad yarr nnuqart i bab nnes uca řebhimet immuten ad tiři nnes.

35 Mařa afunas iyzem afunas n wajjar nnes ařami immut, řexdenni ad zzenzen afunas iddaren, ad bḍan tmenyat-a jar asen uca ad bḍan ɛawed afunas amettin. 36 Maca mařa issen belli afunas ibarrez iḍennaḍ d fariḍennaḍ, uca bab nnes war t iḥḍi, ad ixeǧeṣ afunas s ufunas u afunas amettin ad yiři nnes. 37 Mařa ḥed yucar afunas niɣ ijjen zeg wuǧi uca iɣarṣ as niɣ izzenz i-t, xenni ad ixeǧeṣ xemsa n ifunasen x yijj n ufunas u arebɛa n wuǧi x yijjen zeg wuǧi.” ^■