1 Issiweř AREBBI marra awařen-a, inna:

2 “Necc d SIDI, AREBBI nnek, wenni cek dd-issuffɣen zi temmurt n Miṣra, zi taddart n tesmuɣi. ^■  

3 War ɣarek ttiřin irebbiten nneɣni zzat i wudem inu. 4 War ttegg i yixef nnek řexyař ineqcen niɣ ca n řḥajjet tarwes di min iǧan sennej deg ujenna niɣ di ca da swadday i temmurt niɣ di ca deg waman i iǧan sadu temmurt. ^■   5 War ggur ad asen taḍared uřa ad xasen tsexxared, minzi Necc, SIDI, AREBBI nnek, d ijj n Arebbi ittasmen, wenni dd-yarezfen řmuɛṣiyyet n ibabaten di tarwa ař jjiř wiss třata d wiss arebɛa n yinni d ayi icarrhen, 6 d wenni isscanan tamexsiwt nnes icewwaren i řuřuf n yinni d ayi ittexsen u ḥeṭṭan řumurat inu.

7 War neṭṭeq s Yisem n SIDI, AREBBI nnek, di řbaṭeř, minzi war ittbarri SIDI i wenni i ɣa ineṭqen s Yisem nnes di řbaṭeř. ^■  

8 Idar ass n ssebt ḥima ad t tessqeddsed. ^■   9 Setta n wussan i ɣa txedmed, ad tegged marra řxedmet nnek.^■  

10 Ass wiss sebɛa d wass n ssebt n SIDI, AREBBI nnek. War dayes ttegg uřa d ict n řxedmet, cek lla, uřa d mmic lla, niɣ d yeǧic, uřa d ismeɣ nnek, niɣ tayya nnek, uřa d řebhimet nnek, niɣ abarrani wenni akidek iǧan daxeř i tewwura nnek.

11 Minzi di setta n wussan igga SIDI ajenna d temmurt, řebḥar d marra min dayes uca yareyyeḥ deg wass wiss sebɛa. S uyenni ibarek SIDI ass n ssebt uca issqeddes i-t. ^■  

12 Weqqar babac d yemmac, maḥend ussan n tudart nnek zemmaren ad zzuggarten di temmurt i d ac ɣa yewc SIDI, AREBBI nnek. ^■  

13 War neqq. ^■  

14 War zenna. ^■  

15 War ttacar.

16 War cehhed s ixarriqen ḍidd i umqarreb nnek.

17 War smeẓray taddart n umqarreb nnek, war smeẓray di tamɣart n umqarreb nnek, niɣ deg yismeɣ nnes, niɣ di tayya nnes, niɣ deg ufunas nnes, niɣ deg weɣyuř nnes uřa deg ict n řḥajjet i iǧan n umqarreb nnek.” ^■  

18 Marra řgens iẓra u isřa i wajjajen d wassamen d ddriz n uṣuḍi deg uyicc n icarri d wedrar idduxxunen. Umi iẓra řgens man aya, xenni arjijen uca beɛɛden nitni ɣar řaggʷaj.

19 Nnan i Musa: “Siweř cek akidneɣ uca ad nseř. Maca ittxeṣṣa AREBBI war kidneɣ issiwiř ḥima war nettmetti!” ^■   20 Inna Musa i řgens: “War teggʷedem ca, aqa yusa-dd AREBBI ḥima ad kenniw iqeǧeb u ḥima ad zzayes teggʷedem maḥend war txeṭṭim ca.” 21 Ibedd řgens zi řaggʷaj, maca Musa iqarreb-dd ɣar useynu ibbumbsen mani tuɣa AREBBI. ^■  

22 Inna SIDI i Musa: “Ammu ittxeṣṣa ad tinid i ayt n Israil: ‘Kenniw teẓrim belli ssiwřeɣ-dd akidwem zeg ujenna. 23 War tteggem kidi irebbiten n nnuqart uřa war tteggem irebbiten n wureɣ i yixef nwem. 24 Egg ayi ijj n uɛalṭar s ucař, qeddem xas tiɣarṣa nnek n wecmaḍ d tiɣarṣa nnek n řehna, uǧi nnek d ifunasen d tfunasin nnek. Di kuř amcan mani i ɣa ggeɣ řidaret n Yisem inu, ad ɣarek dd-aseɣ uca ad ac barkeɣ. ^■   25 Mařa teggid ayi ijj n uɛalṭar n iẓra, war t tbennid s tṣuḍar ittwassuydan, minzi mařa teddzed s imeydi nnek, iři ad t tessɛiǧted. ^■   26 War ttgiɛɛid ɣar uɛalṭar inu s yijj n ddruj, ḥima war ittbin useḍḥi nnek.”