1 Deg uyur wiss třata awarni i wuffuɣ n ayt n Israil zi temmurt n Miṣra, deg wass nni nnit, iwḍen-dd ɣar řexřa n Sina. 2 Aqa fesyen iqiḍan nsen, uyuren zi Rafidim uca iwḍen ɣar řexřa n Sina uca wtin iqiḍan nsen di řexřa. Iwta Israil iqiḍan nnes qibač i wedrar. 3 Yuři Musa ɣar AREBBI uca iřaɣa as-dd SIDI zeg wedrar, inna as: “Ammu i ɣa tessiwřed ak-d taddart n Yaɛqub u ammu i ɣa tinid i ayt n Israil: ^■   4 ‘Kenniw teẓrim min ggiɣ ak-d Imiṣriyyen u mammec kenniw ksiɣ x wafriwen n ugider uca iwyeɣ-dd kenniw ɣari. ^□  ■   5 Xenni řexxu, mařa tesřim mliḥ ɣar wawař inu u teḥḍam Řɛahd inu, ad ɣari tiřim kenniw tiɣřam x marra řegnus, minzi marra tammurt aqa-tt inu. ^■   6 Kenniw ad ayi tiřim d ict n tgeldit n ikehhanen d ijj n řgens amqeddas.’ Ina d awařen nni d ac ittxeṣṣan ad ten tinid i ayt n Israil.’ ” ^■  

7 Ihwa-dd Musa uca iřaɣa-dd x imɣaren n řgens uca ibarreḥ asen marra awařen-a i d as yumur SIDI. 8 Uca yarra-dd marra řgens, nitni nnan: “Marra min issiweř SIDI, ad t negg!” Uca issiweḍ Musa awařen n řgens ɛawed i SIDI. ^■  

9 Inna SIDI i Musa: “Xzar, Necc ad ɣarek dd-aseɣ deg ijj n useynu d abarcan, ḥima ad iseř řgens xmi Necc kik i ɣa ssiwřeɣ uca ɛawed ad zzayek amnen i řebda.” Minzi Musa ixebbar awařen n SIDI i řgens.

10 SIDI inna i Musa: “Ruḥ ɣar řgens uca sqeddes i-ten ass-a d tiwecca, ejj i-ten ad ssirden arruḍ nsen

11 uca ad iřin wejden i wass wiss třata, minzi deg wass wiss třata ad dd-ihwa SIDI ɣar wedrar n Sina zzat i tiṭṭawin n marra řgens.

12 Egg iymiren i řgens zi kuř amcan, ini: “Ɣarwem, war tiřyem ɣar wedrar niɣ ad tḥadam ṭṭarf nnes. Man wen ma i ɣa iḥadan adrar, ad ittwaneɣ nican. ^■  

13 War t ittḥidi ḥed s ufus, minzi xenni ad ittwarjem niɣ ad ittwawwet nican s fřitcat min ma iɛna, řebhimet niɣ d bnadem, war ittɣimi iddar. Mařa ad din yiři ijj n uṣuḍi s řbuq d azirar, zemmaren ad ařyen adrar.”

14 Xenni ihwa-dd Musa zeg wedrar ɣar řgens, issqeddes řgens uca ssirden arruḍ nsen.

15 Inna i řgens: “Iřim ttwejdem i wass wiss třata, war dd-ttqarrabem ɣar temɣart.” ^■  

16 Di ṣṣbeḥ n wass wiss třata usin-dd wajjajen d wassamen, uca yarsa useynu ideqřen x wedrar, u řḥess n uṣuḍi deg uyicc n icarri s jjehd aṭṭas. Marra řgens di řmargeḥ n řɛeskar yarjij zzayes.^■  

17 Musa indeh řgens zi řmargeḥ n řɛeskar maḥend ad iřqa AREBBI uca bedden nitni swadday i wedrar. ^■  

18 Marra adrar n Sina idexxen, minzi SIDI tuɣa ihwa-dd xas di tmessi. Ddexxan nnes yuři-dd amecnaw ddexxan n ufarran uca marra adrar inhezz aṭṭas. ^■  

19 Am iqqim uṣuḍi deg uyicc n icarri břa aseɣdi u s jjehd aṭṭas, issiweř Musa uca yarra-dd xas AREBBI s yijj n řḥess ijhed. 20 Uca ihwa-dd SIDI x wedrar n Sina, x tqiccet n wedrar uca iřaɣa SIDI i Musa ɣar tqiccet n wedrar. Xenni igeɛɛed Musa. 21 Inna SIDI i Musa: “Hwa-dd, ɛřem i řgens maḥend war ttcuqin di SIDI maḥend ad t ẓaren uca xenni balak ad ttwahellken aṭṭas zzaysen. 22 Ejj ɛawed ikehhanen inni i dd ɣa iqarrben ɣar SIDI ad qeddsen ixef nsen, ḥima SIDI war xasen iseɛɛar ca.” 23 Inna Musa i SIDI: “Řgens war izemmar ad igeɛɛed adrar n Sina, minzi Cek tɛeřmed aneɣ tennid: ‘Egg iymiren x wedrar uca ssqeddes i-t.’ ” 24 Inna as SIDI: “Ruḥ, hwa! Ad tgeɛɛded cek d Harun akidek, maca ikehhanen d řgens war zemmaren ad cuqqen ḥima ad geɛɛden ɣar SIDI, ḥima Netta war xasen iseɛɛar ca.” 25 Řexdenni ihwa-dd Musa ɣar řgens uca inna asen marra aya.