1 Uca fesyen iqiḍan, uyuren zi Ilim, u marra tamesmunt n ayt n Israil tiweḍ ɣar řexřa n Sin i iǧan jar Ilim d Sina. Tuɣa man aya deg wass xemmesṭac n uyur wiss tnayen awarni řami dd-ffɣen zi temmurt n Miṣra. ^■   2 Marra tamesmunt n ayt n Israil tennedqem zi Musa d Harun di řexřa. 3 Nnan asen ayt n Israil: “Mři nemmut s ufus n SIDI di temmurt n Miṣra umi tuɣa neqqim ɣar ṭṭbaṣi n weysum, necca aɣrum ařami i nejjiwen! Minzi kenniw tessuffɣem aneɣ-dd ɣar řexřa aya maḥend ad tenɣem marra agraw-a s řaẓ.” ^■   4 Xenni inna SIDI i Musa: “Xzar, ad jjeɣ aɣrum ad xawem dd-iwḍa zeg ujenna am wenẓar. Xenni ad iffeɣ řgens, ad ksin min ḥdajen i wass deg wass nni. D man aya ad yiři ḥima ad ten qeǧbeɣ, ma gguren di tɣuri n Ccariɛa inu, niɣ lla. ^■   5 Ad yiři deg wass wiss setta nitni ad sswejden min dd-iwyen ɣar daxeř. Man aya ad yiři d tnayen n tseqqar x min ɣa ssmunen kuř ass.”

6 Řexdenni inna Musa d Harun i marra ayt n Israil: “Ɣar uɛecci ad tessnem belli SIDI i kenniw issuffɣen zi temmurt n Miṣra. 7 Ɣar ṣṣbeḥ ad tẓarem aɛuǧi n SIDI, minzi aqa Netta isřa anedqem nwem x SIDI. Ma neccin, min neɛna, ḥima kenniw ad xaneɣ tenndeqem?” ^□   8 Inna Musa: “Řami SIDI iwca awem aysum i macca deg uɛecci u aɣrum di tyawant di ṣṣbeḥ, aqa isřa SIDI anedqem nwem i zi xas tᵉttendeqmam. I neccin, min neɛna? Kenniw war ttendeqmem xaneɣ, maca x SIDI.” 9 Inna Musa i Harun: “Ini i tmesmunt n ayt n Israil marra: ‘Reḥḥgem-dd ɣar zzat i wudem n SIDI, minzi aqa isřa i unedqem nwem.’ ”

10 Am issiweř Harun ak-d tmesmunt n ayt n Israil marra, tuɣa xezzaren ɣar řexřa uca xzar, aɛuǧi n SIDI iḍhar-dd deg useynu. ^■  

11 Issiweř SIDI ak-d Musa, inna:

12 “Necc sřiɣ i unedqem n ayt n Israil. Siweř akidsen uca ini: ‘Jar beddu n wezyen n wass ař dd-tewḍa tmeddit ad teccem aysum, ɣar ṣṣbeḥ ad tejjiwnem s weɣrum uca ad tessnem belli Necc d SIDI, AREBBI nwem.” ^■  

13 Ɣar uɛecci uřyent i-dd tsekrin uca dřint řmargeḥ n řɛeskar u ɣar ṣṣbeḥ tuɣa nnda inneḍ-dd i řmargeḥ. ^■  

14 Řami dd-igeɛɛed nnda, aqa da, ict n řḥajjet d tazdat am teqcurt, d tazdat amecnaw nnda igarsen, tᵉttwaf x wudem n řexřa, x temmurt. ^■  

15 Ẓrin tt ayt n Israil, nnan ijjen i wenneɣni: “Manawya?”, minzi war ssinen min iɛna. Řexdenni inna asen Musa: “Wa d aɣrum nni d awem iwca SIDI ḥima ad teccem. ^■  

16 Wa d awař i d awem yumur SIDI: ‘Ejj ad iksi zzayes kuř ijj ɛlaḥsab min iḥdaj, řeqyas n ijj n uɛumir, ɛřaḥař tnayen litru, i ijjen bnadem. Kuř aryaz ad iksi ɛlaḥsab řqedd n iwdan i ɣares deg uqiḍun.’ ”^□  

17 Uca ammu i ggin ayt n Israil. Yrun zzayes, ijjen aṭṭas, wenneɣni drus.

18 Weznen s řeqyas n uɛumir. Wenni yrun aṭṭas war ɣares zzyada d wenni yrun drus, war d as ittxeṣṣi ɛad. Kuř ijj iyru macca nnes ɛlaḥsab min iḥdaj. ^■  

19 Inna asen Musa: “Uřa d ijj ma ad zzayes yejj ař ṣṣbeḥ.” 20 Maca nitni war sřin ca i Musa u ca n yeryazen xemmřen ca zzayes ař ṣṣbeḥ. Xenni udfen dayes ikeccawen uca ibda ad igg ccum. Uca iffugem xasen Musa aṭṭas.

21 Kuř ṣṣbeḥ yrun tt, kuř ijj mecḥař ma izemmar ad icc netta, minzi mařa teḥma tfuct, tfessi.

22 Deg wass wiss setta yrun tnayen n tseqqar n weɣrum, řeqyas n tnayen n iɛumiren i kuř azeǧif. Uca usin-dd marra ineɣraf n tmesmunt uca xebbaren Musa. 23 Netta inna asen: “Wa iǧan muxas issiweř SIDI: ‘Tiwecca d ijj n wass n arraḥet, ijj n wass n ssebt d amqeddas i SIDI. Ggʷem min texsem ad teggʷem, ssengʷem min texsem ad tessengʷem uca marra min ɣa iqqimen, xemmřem t ař ṣṣbeḥ.’ ” 24 Nitni xemmřen t ař ṣṣbeḥ am mammec ten yumur Musa uca war yarṣuḍ u war dayes tuɣi tkecca. 25 Xenni inna Musa: “Ccem aya ass-a, minzi ass-a d ass n ssebt n SIDI. Ass-a war t tᵉttifem deg iyyar. 26 Setta n wussan ad teyrum, maca deg wass wiss sebɛa aqa-t d ssebt, war ittiři walu.” 27 Deg wass wiss sebɛa imsar belli ffɣen ca zi řgens maḥend ad yrun ca, maca war ufin walu. 28 Inna SIDI i Musa: “Ař meřmi tugim ad teḥḍam řumurat inu d izerfan inu? 29 Xzarem, minzi SIDI iwca awem ass n ssebt, x uya iwca awem deg wass wiss setta aɣrum i tnayen n wussan. Kuř ijj zzaywem ad iqqim deg wemcan nnes! Deg wass wiss sebɛa war dd-itteffeɣ uřa d ijj zeg wemcan nnes!” 30 Uca yareyyeḥ řgens deg wass n ssebt.

31 Taddart n Israil třaɣa as ‘manna’. Tuɣa-t d acemřař amecnaw zzariɛet n řqeṣbur uca aředdi nnes amecnaw tifḍirin n tamment. ^■   32 Xenni inna Musa: “Degga d awař i zi yumur SIDI: ‘Ccurem zzayes řeqyas n yijj n uɛumir uca xemmeř i-t i marra jjiřat nwem i dd ɣa yasen, ḥima ad ẓaren aɣrum min zi kenniw ssecceɣ di řexřa, umi kenniw ssuffɣeɣ zi temmurt n Miṣra.” 33 Inna Musa i Harun: “Ksi ict n teqdiḥt uca ɛemmar i-tt s yijj n uɛumir n ‘manna’ uca egg i-tt zzat i wudem n SIDI ḥima ad tᵉttwaxemmeř i marra jjiřat nwem.” ^■   34 Uca igga i-t Harun zzat i Cchadet ḥima ad tᵉttwaxemmeř am mammec i d as yumur SIDI i Musa. 35 Ammu i ccin ayt n Israil ‘manna’ arebɛin n iseggʷusa, ařami iwḍen ɣar temmurt mani i ɣa raḥen ad zedɣen. Ccin ‘manna’ ařami iwḍen ɣar weymir n temmurt n Kenɛan. ^■   36 Ijj n uɛumir d ɛecra di tesɣart n ijj n ifa. ^□