1 Uca fesyen marra tamesmunt n ayt n Israil iqiḍan nsen, uyuren zi řexřa n Sin, am mammec i d asen yumur SIDI uca wtin iqiḍan nsen di Rafidim. War din tuɣi aman ḥima ad issu řgens. 2 Xenni imcubbec řgens ak-d Musa, nitni nnan: “Ewc aneɣ aman ḥima ad nsu!” Musa inna asen: “Mayemmi akidi temcubbucem? Mayemmi tᵉttqeǧabem SIDI?” ^■   3 Tuɣa řgens iffud aṭṭas ɣar waman uca nndeqmen zi Musa, nnan: “Maɣar d aneɣ dd-tessgeɛɛded zi Miṣra? Ma ḥima ad ayi thellked necc s ufadi uřa d tarwa inu d řebhayem inu?” 4 Řexdenni isɣuyy Musa ɣar SIDI, inna: “Min i ɣa ggeɣ ak-d řgens-a? Mɣir cwayt uca ad ayi arejmen.” 5 Inna SIDI i Musa: “Ekk zzat i řgens uca ksi akidek ca zeg imɣaren n Israil uca ksi ɛawed deg ufus nnek taɣɣarct nni zi tewtid iɣzar uca ruḥ. ^■   6 Aqa ayi, Necc ad beddeɣ din zzatek x teṣḍart ɣar Ḥurib, ad tewted taṣḍart, ad zzayes dd-ffɣen waman uca ad issu řgens.” Igga Musa amenni zzat i tiṭṭawin n imɣaren n Israil. ^■   7 Uca iřaɣa isem n wemcan nni Massa d Mariba, minzi ayt n Israil mcubbcen din u minzi nitni qeǧben SIDI, nnan: “Ma SIDI aqa-t řexxu di řwest nneɣ niɣ lla?”

8 Xenni yusa-dd Ɛamaliq uca imneɣ ak-d Israil di Rafidim. ^■   9 Inna Musa i Yacuwa: “Ejj aneɣ ad nixḍar iryazen uca ad neffeɣ maḥend ad nemneɣ ak-d Ɛamaliq. Tiwecca ad iřiɣ sennej x tqiccat n tewrirt uca aɛmud n AREBBI ad yiři deg ufus inu.”

10 Igga Yacuwa am mammec d as inna Musa, imneɣ ak-d Ɛamaliq, maca Musa d Harun d Ḥur uřyen ɣar tqiccat n tewrirt.

11 Uca imsar řami issgeɛɛed Musa afus nnes, xenni tuɣa Israil tɣeǧeb, maca xmi ittejja afus nnes ad ihwa, xenni ɣeǧben ayt n Ɛamaliq.

12 Ifassen n Musa dewřen deqřen. Xenni ksin ijj n weẓru uca ggin t sadu Musa uca iqqim xas uca Harun d Ḥur sennden ifassen nnes, ijj zeg uɣezdis-a, wenneɣni zeg uɣezdis nneɣni. Ammu i iqqimen ifassen nnes geɛɛden ařmi teɣři tfuct.

13 Uca iɣřeb Yacuwa x Ɛamaliq d řgens nnes s řeqḍeɛ n ssif. ^□  

14 Xenni inna SIDI i Musa: “Ari aya deg ijj n wedlis ittwannḍen i řidaret dayes uca egg i-t deg imejjan n Yacuwa, belli aqa Necc ad mḥiɣ qaɛ řidaret di Ɛamaliq sadu ujenna.” ^■  

15 Ibna Musa ijj n uɛalṭar uca iřaɣa as s Yisem: “SIDI d taɛeǧant inu!”

16 Uca inna: “Afus tuɣa t x řɛarc n SIDi. SIDI ad yegg garra x Ɛamaliq zi jjiř ɣar jjiř.” ^■