1 Řexdenni izehhed Musa jmiɛ ak-d ayt n Israil zhid-a i SIDI, nnan:

“Ad zehhdeɣ i SIDI, minzi Netta tuɣa iɣřeb s yijj n řeɣřeb imɣar!

Ayis d wenni xas yenyin inḍar i-ten di řebḥar. ^■  

2 SIDi d jjehd inu d uzehhed inu.

Netta idweř d asenjem inu.

Wa d Arebbi inu, necc ad t ssemɣareɣ.

Netta d AREBBI n baba, necc ad t ssɛuǧeɣ! ^■  

3 SIDI d aryaz n umenɣi,

SIDI d Isem nnes!

4 Ikarruten n Firɛun d řɛeskar nnes inḍar i-ten di řebḥar

u acewwar n ineɣrafen nnes zi řɛeskar ɣarqen di Řebḥar n Telga.

5 Aman yuǧɣen dřen i-ten.

Amecnaw aẓru hwan ɣar řaǧaɣ. ^■  

6 A SIDI, afus afusi nnek ittwaɛezz s jjehd,

afus afusi nnek, a SIDI, aqa iřbez řeɛdu. ^■  

7 S řemɣaret n uɛuǧi nnek tᵉtteḥḥid inni kik ittemɛařan.

Mařa tessekked řḥaduq n weɣḍab nnek, ad ten yecc amecnaw iɣeǧ.

8 S uṣuḍi n wenzaren nnek ɛurrcen waman,

ttwassbedden tseǧya amecnaw aɣbar,

u aman yuǧɣen jemden di řwest n řebḥar. ^■  

9 Inna řeɛdu: ‘Ggur ad ten aredfeɣ, ggur ad ten ɛduɣ,

ad bḍiɣ řmur, řeɛmar inu ad zzaysen ijjiwen,

ad dd-jebdeɣ ssif inu, afus inu ad ten ihellek.’

10 Teṣuḍed s nnefs nnek uca ideř i-ten řebḥar.

Nitni hwan-dd amecnaw řexfif deg waman imɣaren. ^■  

11 A SIDI, man wen i iǧan am Cek jar irebbiten?

Wi iǧan am Cek, d wenni ittwassɛuǧen di tqeddast,

amweqqar deg izřan n uṣebbeḥ d man wen itteggen řeɛjayeb am Cek?

12 Tesswiẓẓḍed afus afusi nnek,

tṣarḍ i-ten temmurt.

13 Cek tgewwded řgens-a s tmexsiwt nnek icuwwaren, aqa tefdid t,

s jjehd nnek tnedhed ten ɣar Tzeddiɣt Iqeddsen nnek.

14 Řegnus sřin x uya uca arjijen.

Teṭṭef teggʷudi deg imezdaɣ n Filicit.

15 Řexdenni imeqqranen n tqebbař n Idum ad tbehten,

uca inni ɣar teǧa ṣṣulṭa di Mu’ab ad arjijen,

u marra imezdaɣ n Kenɛan ad fesyen! ^■  

16 Ad xasen dd-tewḍa řɛurret d tiggʷudi.

S řemɣaret n uɣiř nnek ad sseɣden amecnaw aẓru,

ař i ɣa iẓwa řgens nnek, a SIDI,

ař iẓwa řgens-a i tkesbed i yixef nnek. ^■  

17 Cek ad ten tnedhed uca ad ten teẓẓud x wedrar n řwart nnek,

amcan i teggid d Tazeddiɣt nnek, a SIDI,

Zzawect Iqeddsen i iggin ifassen nnek, a Sidi inu.

18 SIDI ad iḥkem i řebda qaɛ!

19 Minzi ayis n Firɛun yudef ɣar řebḥar

s ikarruten nnes d imnayen nnes

uca iqřeb xasen SIDI ɛawed aman n řebḥar.

Maca ayt n Israil ẓwan x řaẓaɣ di řwest n řebḥar.”

20 U Maryam, tanabit, učmas n Harun, teksi aǧun deg ufus nnes d marra timeṭṭa ffɣent ḍeffar nnes s ibendiren d ccḍiḥ s nnubtat. ^■   21 Xenni tarra-dd xasent Maryam: “Ɣennjent i SIDI, minzi aqa iɣřeb s yijj n řeɣřeb imɣar! Inḍar ayis ak-d wenni xas yenyin di řebḥar.”

22 Xenni Musa igga ad ifsi řgens n Israil iqiḍan nsen inni iǧan ɣar Řebḥar n Telga uca ruḥen di řexřa n Cur, uyuren třata n wussan di řexřa břa ma ad afen aman. 23 Uca iwḍen ɣar Mara, maca war zemmaren ad swen aman n Mara, minzi tuɣa aten d imerzagen. S uya ggin as isem: ‘Mara’. ^■   24 Innedqem řgens x Musa, inna: “Min i ɣa nsu?” ^□   25 Netta iřaɣa i SIDI uca SIDI immeř as ijj n ukeccuḍ uca inḍar i-t daxeř deg waman uca dewřen waman d imiẓiden. Din i d as igga i řgens ict n tewṣeyyet d ict n lfariḍa u dinni i-ten iqeǧeb. 26 Inna: “Mařa tesřid mliḥ i wawař n SIDI, AREBBI nnek, teggid min iǧan nican di tiṭṭawin nnes, ad tesřed i řumarat nnes, ad teḥḍid marra tiweṣṣa nnes, xenni Necc war d awem-dd ssekkiɣ řehřac i dd-ssekkeɣ x Miṣra, minzi Necc d SIDI, Amesgenfi nnek!” 27 Řexdenni iwḍen ɣar Ilim, mani tuɣa tenɛac n řɛunṣarat n waman, d sebɛin n tcejjura n tini uca wtin iqiḍan nsen dinni zzat i waman.