1 Xenni issiweř SIDI ak-d Musa, inna: 2 “Siweř ak-d ayt n Israil, maḥend ad dd-dewřen uca ad wten iqiḍan nsen zzat i Fi-Haxirut, jar Migdul d řebḥar, qibač i Baɛal-Ṣafun. Arendad nnes ad tewtem iqiḍan nwem x tma n řebḥar. ^■   3 Firɛun ad yini x ayt n Israil: ‘Aqa nitni weddaren di temmurt, aqa řexřa iḥṣar i-ten.’ 4 Uca ggur Necc ad ssqesḥeɣ uř n Firɛun ḥima ad ten iḍfar u Necc ad ttwasɛuǧiɣ x Firɛun u x marra řɛeskar nnes uca ad ssnen Imiṣriyyen belli Necc d SIDI.” Uca ammu i tt ggin nitni. ^■  

5 Uca xebbaren i ujeǧiḍ n Miṣra belli řgens yarweř. Xenni ibeddeř uř n Firɛun d imsexxaren nnes x řgens uca nnan: “Mammec i negga aya, nessekk Israil zi tesmuɣi i iggin i neccin. 6 Uca iḥezzem Firɛun akarru nnes, iksi akides řgens nnes. 7 Iksi akides setta-mya n ikarruten icewwaren d marra ikarruten n Miṣra uca igga acewwar n ineɣrafen zi řɛeskar nnes x kuř ijj zzaysen. 8 Aqa isseqseḥ SIDI uř n Firɛun, ajeǧid n Miṣra, uca yardef netta ayt n Israil, maca ayt n Israil tuɣa ffɣen s yijj n ufus ittwasgeɛɛden. 9 Aredfen ten Imiṣriyyen uca iwḍen ɣarsen s marra iysan d ikarruten n Firɛun d imnayen nnes d řɛeskar nnes, ɣar Fi-Haxarut, ɣar ujemmaḍ n Baɛal-Ṣafun, mani wtin iqiḍan nsen ɣar řebḥar. ^■  

10 Řami ten-dd yudes Firɛun, ssgeɛɛden ayt n Israil tamuɣři nsen, ẓrin belli Imiṣriyyen ḍfaren ten-dd uca nitni ggʷeden aṭṭas. Xenni sɣuyyen ayt n Israil ɣar SIDI.

11 Nnan i Musa: “Ma war ǧin ɛad imeḍřan di Miṣra ař dd aneɣ tawyed maḥend ad nemmet di řexřa aya? Maɣar teggid ammu, tessuffɣed aneɣ-dd zi Miṣra?

12 Ma war kidek nessiweř marra awařen-a di Miṣra, nenna: ‘Ejj aneɣ ad nexdem i Imiṣriyyen!’? Xar mařa tuɣa neqqim nexdem i Imiṣriyyen x mařa nemmut di řexřa.” ^■  

13 Xenni inna Musa i řgens: “War tteggʷedem, beddem, texzarem asenjem n SIDI i d awem ɣa yewc ass-a, minzi Imiṣriyyen inni tᵉttwařam ass-a, ɛemmarṣ ad ten tẓarem ɛad i řebda.

14 SIDI ad xawem imneɣ uca kenniw mɣir sqarem.”

15 Inna SIDI i Musa: “Mayemmi ɣari třaɣid? Ini i ayt n Israil ḥima ad fesyen iqiḍan nsen.

16 Sgeɛɛed taɣɣarct nnek, swiẓẓeḍ afus nnek x řebḥar uca farq i-t, ḥima ad iẓwa ayt n Israil x řbarr di řwest n řebḥar.

17 Xzar, Necc ad ssqesḥeɣ uř n Imiṣriyyen, maḥend ad ten aredfen di řebḥar u Necc ad ssɛuǧiɣ ixef inu s Firɛun u s marra řɛeskar nnes, ikarruten nnes d imnayen nnes n iysan.

18 Ad ssnen Imiṣriyyen belli Necc d SIDI xmi i ɣa ttwasɛuǧiɣ s Firɛun, s ikarruten nnes d imnayen nnes n iysan.”

19 Xenni immuṭṭi Lmalak n AREBBI nni yuyuren zzat i řɛeskar n Israil uca idweř ɣar ḍeffar nsen: aqellij n useynu immuṭṭi zi zzat i wudem nsen uca ibedd ɣar ḍeffar nsen. 20 Yudef uqellij jar řɛeskar n Imiṣriyyen d řɛeskar n Israil. Tuɣa aseynu d taǧest i nitni u issiɣ i wa s ǧiřet u war dd-iqarreb ijjen ɣar wenneɣni ǧiřet tekmeř. 21 Uca isswiẓẓeḍ Musa afus nnes x řebḥar uca iɛarn SIDI xenni řebḥar ɣar uɣezdis s yijj n usemmiḍ acarqi ijehden, marra ǧiřet nni, uca yarra řebḥar ad ijeffef. Ammu i ttwammsebḍan waman. ^■   22 Uyuren ayt n Israil x min yuẓɣen di řwest n řebḥar uca aman ggin amecnaw řḥiḍ x yeffus nsen d uzeřmaḍ nsen. ^■   23 Aredfen ten Imiṣriyyen, ruḥen awarni asen di řwest n řebḥar s marra iysan n Firɛun d ikarruten nnes d imnayen nnes n yiysan. 24 Řami d yeffu řḥař, imsar belli SIDI iṣweḍ ɣar řɛeskar n Imiṣriyyen zeg uqellij n tmessi d iseynuten uca iqezzeb řɛeskar n Miṣra. 25 Ijja tijarrarin n ikarruten nsen ad fesxent, ařami idweř iwɛar xasen ad raḥen ɣar zzat. Řexdenni nnan Imiṣriyyen, kuř ijjen zzaysen: “Ittxeṣṣa ayi ad arewřeɣ zi zzat n tiṭṭawin n Israil, minzi SIDI imneɣ di ṭṭweɛ nsen ḍidd i Imiṣriyyen.” 26 Inna SIDI i Musa: “Swiẓẓeḍ afus nnek x řebḥar, ḥima ad dewřen waman x Imiṣriyyen, x ikarruten nsen u x imnayen nsen n iysan.” 27 Xenni isswiẓẓeḍ Musa afus nnes x řebḥar u ɣar řefjar n ṣṣbeḥ idweř řebḥar ɣar mani t tuɣa qbeř uca arewřen Imiṣriyyen nican ḍidd nnes uca isseɣḍeř SIDI Imiṣriyyen di řwest n řebḥar. 28 Dewřen-dd waman uca ttwaneḍřen ikarruten d imnayen n iysan n marra řɛeskar n Firɛun i tuɣa yudef awarni asen ɣar řebḥar. War zzaysen iqqim uřa d ijjen. ^■   29 Maca ayt n Israil uyuren x min yuẓɣen di řwest n řebḥar u aman tuɣa ggin amecnaw řḥiḍ ɣar yeffus nsen d uzeřmaḍ nsen. ^■   30 Ammu i issenjem SIDI Israil deg wass nni zeg ufus n Imiṣriyyen uca Israil iẓra Imiṣriyyen i immuten x tma n řebḥar. 31 Iẓra Israil afus imɣaren nni igga SIDI deg Imiṣriyyen uca iggʷed řgens zi SIDI uca umnen nitni di SIDI u di Musa, amsexxar nnes.