1 Issiweř SIDI ak-d Musa, inna: 2 “Sqeddes ayi kuř amenzu, wenni zi jar ayt n Israil yarezmen řemřawet d amezwaru, am zeg iwdan am zi řebhayem. Netta aqa-t inu.” ^■   3 Inna Musa i řgens: “Idarem ass-a min di teffɣem zi Miṣra, zi taddart n tesmuɣi, minzi SIDI issuffeɣ-dd kenniw zzayes s ufus ijehden. Deg wass-a war tᵉttettem ca min di iǧa wentun. ^□   4 Ass-a ad teffɣem, deg uyur n Abib. ^■   5 Mařa SIDI issidef i cek ɣar temmurt n Ikenɛaniyyen d Iḥittiyyen d Imuriyyen d Iḥiwiyyen Iyabusiyyen, x tenni ijjuǧ i řejdud nwem ad ac tt iwc, tammurt tenni ifeyyḍen s uɣi d tamment, xenni ad teḥḍam aɛbad-a n řidaret deg uyur-a. 6 Sebɛa n wussan ad tecced aɣrum břa antun uca deg wass wiss sebɛa ad din yiři ijj n Řɛid i SIDI. 7 Sebɛa n wussan ad ittwacc weɣrum břa antun uca war ɣarek ittwif min ixemmaren. Di marra jjwayeh nnek war ittwif wentun ɣarek. 8 Deg wass nni ad tḥajid i mmic, ad as tinid: “Man aya di ṭṭweɛ n min d ayi igga SIDI umi dd-ffɣeɣ zi Miṣra. 9 Ad ac yiři amecnaw ijj n uceyyar x ufus nnek u i řidaret jar tiṭṭawin nnek, maḥend Ccariɛa n SIDI ad tiři deg uqemmum nnek, minzi s ufus ijehden i kenniw issuffeɣ SIDI zi Miṣra.

10 S uya i ɣa teḥḍid tawsiyyet-a di řweqt nnes i d as ittwaggen, zeg useggʷas ɣar useggʷas.

11 Ad yiři xmi cek ɣa issidef SIDI di temmurt n Ikenɛaniyyen, am mammec i d ac ijjuǧ uřa i řejdud nnek, uca iwca ac tt,

12 xenni ad tesseɛdud ɣar SIDI kuř amenzu i yarezmen řemřawet uřa d kuř amenzu n řebhayem i yarezmen řemřawet d amezwaru. Iwetman ad iřin i SIDI. ^■  

13 Maca kuř amenzu i yarezmen řemřawřet n weɣyuř, ad t tefdid s yijj zeg wuǧi. Mařa war t tefdid, ad as tarẓed iri. Kuř amenzu n bnadem zeg iḥenjiren nnek ad t tefdid.

14 Uca ad imsar, xmi cek ɣa isseqsa mmic tiwecca, ad yini: ‘Manawya?’, ad as tinid: ‘Aqa issuffuɣ aneɣ-dd SIDI zi Miṣra s ufus ijehden, zi taddart n tesmuɣi.

15 Řami d aneɣ ibedd Firɛun deg webrid i wuffuɣ nneɣ, imsar aqa SIDI inɣa marra imenza di temmurt n Miṣra, zeg umenzu n bnadem ař amenzu n řebhimet. S uya qeddmeɣ kuř amenzu i yarezmen řemřawet d amezwaru d taɣraṣt i SIDI, maca kuř amenzu jar iḥenjiren inu, aqa fdiɣ t.

16 Ad yiři d aceyyar x ufus nnek d ijj n ufiřu n useggem jar tiṭṭawin nnek, minzi SIDI aqa issuffeɣ aneɣ-dd zi Miṣra s ufus ijehden.’ ” ^■  

17 Umi ijja Firɛun řgens ad iraḥ, war ten indih AREBBI ɣar webrid n temmurt n Ifilisṭiniyyen, waxxa nettat tudes, minzi AREBBI inna: “Maḥend war ittendemi řgens xmi i ɣa iẓar řbaruḍ uca ad dd-idweř ɣar Miṣra.”

18 Indeh AREBBI řgens maḥend ad ikk x webrid n řexřa ɣar Řebḥar n Telga. Uca geɛɛden ayt n Israil zi Miṣra wejden i umenɣi.

19 Iksi Musa akides ixsan n Yusuf, minzi netta issjuǧ ayt n Israil s tẓaǧit, inna: “S tidett ad ɣarwem dd-yarzef AREBBI, uca ad tessgeɛɛdem ixsan inu ssa akidwem!” ^■   20 Uca fesyen iqiḍan nsen, ggʷejen zi Sukkut uca wtin iqiḍan nsen di Itam ɣar ṭṭarf n řexřa. 21 SIDI izwar i tiṭṭawin nsen deg uẓiř deg ijj n uqellij n useynu, maḥend ad ten igewwed deg webrid, u di ǧiřet deg ijj n uqellij n tmessi ḥima ad ten iccur s tfawt, ḥima ad taf zemmaren ad uyuren ass d ǧiřet. 22 Deg wass war dd-ikkis aqellij n useynu zzat i uɣembub n řgens uřa di ǧiřet war dd-ikkis aqellij n tmessi.