1 Issiweř SIDI ak-d Musa d Harun di temmurt n Miṣra, inna:

2 “Ayur-a ad awem yiři d azeǧif n iyuren. Ad awem yiři wa i kenniw d amezwaru n iyuren n useggʷas. 3 Siweř ɣar marra tamesmunt n Israil, ini: ‘Deg wass wiss ɛecra ad iksi kuř ijj i yixef nnes, ijj n yezmar x marra řaǧ n taddart i dd-iqqarsen zeg ibabaten, ijj n yezmar x ict n taddart. ^□   4 Maca mařa raǧ n taddart tuɣa imẓi i yezmar, xenni ittxeṣṣa ad iksi ak-d wajjar nnes yudsen ɣar taddart nnes ɛlaḥsab řqedd n iwdan. Zi jjihet n yezmar ad tewtem řeḥsab i min ɣa yecc kuř ijjen. 5 Ad yiři d izmar icnan qaɛ, awtem n ijj n useggʷas . Ad t teksim zeg iḥuřiyyen niɣ zeg iɣayḍen. ^■   6 Ad t txemmřem ař ass arbeɛṭac zeg uyur-a uca ad as iɣarṣ marra agraw n tmesmunt n Israil jar beddu n wezyen n wass ař dd-tewḍa tmeddit. 7 Ad ksin ca zeg idammen uca ad t ggen x tnayen n řeḍruf i iǧan ɣar uɣezdis n tewwart u x tnebdat sennej i tewwart n tudrin mani t i ɣa ccen. 8 Ad ccen aysum di ǧiřet nni, aysum icenfen ɣar tmessi s weɣrum břa antun. Ad t ccen s wefsu yarzeg. ^■   9 War t ttᵉttem ca d aziza niɣ inggʷa deg waman, maca mɣir mařa yiři icnef di tmessi, ak-d uzeǧif nnes d iḍaren nnes d wadan nnes.

10 War zzayes ttejjim walu ɣar ṣṣbeḥ, maca min zzayes ɣa iqqimen ɣar ṣṣbeḥ, ittxeṣṣa kenniw ad t tcemḍem di tmessi.

11 Ammu i d awem ittxeṣṣa kenniw ad t teccem: tajɛinna nwem ad tiři tebyes, tisiřa nwem deg iḍaren nwem u tiɣɣaryen nwem deg ufus nwem uca ad t teccem deɣya. Aqa-t d Taɣarṣt n Useɛdu n SIDI.

12 Minzi di ǧiřet-a, Necc ad ɛduɣ x temmurt n Miṣra uca ad wteɣ kuř amenzu di temmurt n Miṣra, ammu deg iwdan uřa di řmař, uca ad ssiwḍeɣ řeḥkamat inu x marra irebbiten n Miṣra, Necc d SIDI!

13 Uca idammen ad awem iřin d ict n řeɛřamet x tudrin mani tzeddɣem kenniw. Mařa ẓriɣ idammen, ad xawem ɛduɣ. War tᵉttiři jjriḥect iteḥḥan jar awem, xmi i ɣa wteɣ tammurt n Miṣra.

14 Ass-a ad awem yiři d ijj n wass i řidaret uca ad zzayes tɛeyydem i SIDI. Aqa-tt d ict n tewṣeyyet i řebda i marra jjiřat nwem ḥima ad zzayes tɛeyydem. ^■  

15 Setta n wussan ad teccem aɣrum břa antun. Nican deg wass amezwaru ad tessuffɣem antun zi tudrin nwem, minzi man wen ma i ɣa iccen ca s wentun, zeg wass amezwaru ař ass wiss sebɛa, bnadem nni ad ittwaqess zi Israil. ^□  

16 Deg wass amezwaru ad yiři ijj n umuni iqeddsen uca ɛawed deg wass wiss sebɛa ad din yiři ijj n umuni iqeddsen. Uřa d ict n řxedmet war tᵉttwagg ca deg wussan nni. Mɣir min ɣa yecc kuř ijj, d man aya waha izemmar ad ittwassewjed zzaywem.

17 Ad teḥḍam Řɛid n Weɣrum břa Antun, minzi deg wass nni aqa ssuffɣeɣ-dd kenniw zi temmurt n Miṣra. Ad teḥḍam ass-a di marra jjiřat nwem, aqa-tt d ict n tewṣeyyet i řebda.

18 Deg uyur amezwaru, deg wass wiss arbeɛṭac zeg uyur, di ǧiřet, ad teccem aɣrum břa antun ař ǧiřet n wass waḥit u-ɛicrin zeg uyur. ^■  

19 Sebɛa n wussan war ittwiff wentun di tudrin nwem, minzi man wen ma i ɣa iccen min iǧan s wentun, uřa d abarrani niɣ d mmis n temmurt, bnadem nni ad ittwaqess zi tmesmunt n Israil. 20 War ttᵉttem walu min iǧan s wentun. Di marra tizeddaɣ nwem ad teccem aɣrum břa antun.’ ” ^■  

21 Iřaɣa Musa i marra imɣaren n Israil, inna asen: “Ṭṭfem, ksim ijjen zeg wuǧi i yixef nwem, i řaǧat nwem u ɣarṣem t i Tɣarṣt n Useɛdu. ^■   22 Ṭṭfem ict n tqebbiḍt n tɛelǧet, sɣeḍsem tt deg idammen inni iǧan deg ict n ṭṭebṣi, ruccem xenni zeg idammen i iǧan di ṭṭebṣi x tnebdat sennej i tewwart u x tnayen n řeḍruf ɣar uɣezdis n tewwart. Uřa d kenniw war dd-tteffɣem ca. Ař ṣṣbeḥ war itteffeɣ ḥed zi tewwart n taddart nnes. ^□   23 SIDI ad iẓwa x temmurt maḥend ad iwwet Imiṣriyyen, maca xmi i ɣa iẓar idammen x tnebdat sennej u x tnayen n řeḍruf n tewwart, xenni ad iɛdu SIDI tawwart nni, war ittejji amteḥḥay ad yadef ɣar tudrin nwem ḥima ad iwwet. ^■   24 Ḥḍam awař-a i nniɣ, aqa-t d tewṣeyyet i cek u i iḥenjiren nnek i řebda. 25 Ad yiři, xmi i ɣa tadfem ɣar temmurt tenni d awem i ɣa yewc SIDI, am mammec inna Netta, ad teḥḍam aɛbad-a n řidaret. 26 Uca x minni d awem i ɣa inin iḥenjiren nwem: ‘Min ixs ad yini weɛbad-a n řidaret i kenniw?’, ad yiři ^■   27 ad tinim kenniw: ‘Aqa-tt d Taɣarṣt n Useɛdu i SIDI wenni iɛdun x tudrin n ayt n Israil di Miṣra, umi iwta Imiṣriyyen uca ifekk tudrin nneɣ.’ ” Řexdenni yuḍar řgens uca qqunjřen nitni. 28 Ruḥen ayt n Israil uca ggin am mammec ten yumur SIDI i Musa d Harun u ammu i tt ggin. ^■  

29 Tuɣa ɣar wezyen n ǧiřet umi iwta SIDI marra imenza di temmurt n Miṣra s řmewt, zeg umenzu n Firɛun, wenni iqqimen x řɛarc nnes, ař amenzu n umeḥbus i iǧan di řeḥbes, uřa d marra imenza n řebhayem. ^□  ■  

30 Ikkar Firɛun di ǧiřet nni, netta d marra imsexxaren nnes d marra Imiṣriyyen uca tuɣa din ict n tɣuyyit temɣar minzi war tuɣi uřa d ict n taddart mani war iǧi umettin. ^■   31 Uca iřaɣa-dd i Musa d Harun s ǧiřet, inna: “Kkarem, teffɣem zi řwest n řgens inu, kenniw jmiɛ ak-d ayt n Israil, ruḥem, tɛebdem SIDI, am mammec tennam kenniw. 32 Awyem uǧi nwem d ifunasen d tfunasin nwem, am mammec tennam. Ruḥem uca barkem ayi necc ɛawed!” 33 Zeyyaren Imiṣriyyen aṭṭas x řgens maḥend nitni ad ffɣen s uqeǧeq zi temmurt, minzi nitni nnan: “Aqa neccin marra d imettan!” 34 Uca yiwi řgens arecti nnes, qbeř ma ad inḍu uca tibeqyin nnḍen tent jar warruḍ nsen x ṭɣarḍin nsen. ^□   35 Ayt n Israil ggin ɛlaḥsab awař i d asen inna Musa, ttaren řeqcuɛ n nnuqart d wureɣ d warruḍ zeg Imiṣriyyen. ^■   36 SIDI iwca řgens arḍa di tiṭṭawin n Imiṣriyyen, wcin asen min ttaren, u ammu i keccḍen nitni Imiṣriyyen. ^□  

37 Fesyen ayt n Israil iqiḍan nsen, uyuren zi Raɛamsis ɣar Sukkut, tuɣa aten ɛřaḥař di setta-myat-ařef x iḍaren, ttwaḥesben iryazen waha, břa iḥenjiren. 38 Igeɛɛed akidsen ijj n ubarru ameqqran n ɛřam kuř iwdan, xenni ɛawed uǧi d ifunasen d tfunasin, aqa-tt d ict n tḥimart temɣar aṭṭas. 39 S warecti i kidsen dd-iwyen zi Miṣra ggʷin tifḍirin břa antun minzi tuɣi ɛad war ismim minzi tuɣa uẓẓřen-dd xasen zi Miṣra u war zemmaren ad bedden u war sswejden macca i webrid i yixef nsen. 40 Tuɣa řmijař n tzeddiɣt n ayt n Israil di Miṣra, řmijar i din izedɣen, arebɛa-mya u-třatin n iseggʷusa. ^■   41 Ɣar uneggar n arebɛa u-mya u-třatin n iseggʷusa, deg wass nni simant nnes, ffɣen marra řɛeskar n SIDI zi temmurt n Miṣra. 42 Tanita aqa-tt d ict n ǧiret ittxeṣṣa ad tᵉttwaḥḍa i řewqar i SIDI, maɣar Netta indeh i-ten zi temmurt n Miṣra. Ǧiřet-a tanita, aqa-tt i SIDI. Ittxeṣṣa ad tᵉttwaḥda zi marra ayt n Israil, di marra jjiřat nsen.

43 Inna SIDI i Musa d Harun: “D ta d tewṣeyyet x Tɣarṣt n Useɛdu: war zzayes ittett mmis n ubarrani, 44 maca kuř ismeɣ immesɣen zi jjihet n weryaz s nnuqart, izemmar ad zzayes yecc, mařa txetned as. 45 Amɛezzeb d ucewwař war zzayes ttᵉtten ca. 46 Ad ittwacc di taddart d ict u war itteffeɣ zeg weysum nni ɣar barra n taddart uca war zzayes ittareẓẓi uřa d ijj n yiɣes. ^■   47 Marra tamesmunt n Israil ad tegg amenni. 48 Mařa ca n ubarrani innewjew-dd ɣarek uca ixs ad issewjed Taɣarṣt n Useɛdu i SIDI, ittxeṣṣa kuř aryaz nni ɣares iǧan ad ittwaxten. Řexdenni ad dd-iqarreb, ad tt issewjed, uca ad yiři amecnaw wenni dd-ixeřqen di temmurt. Maca uřa d ijj wenni war ixtinen war izemmar ad zzayes yecc. 49 Ad din yiři ijj n uzerf i wenni dd-ixeřqen di temmurt u i ubarrani wenni izeddɣen jar awem am ubarrani.” 50 Uca marra ayt n Israil ggin am mammec i d asen yumur Musa d Harun, ammu i tt ggin. 51 Uca imsar deg wass nni simant nnes issuffuɣ SIDI ayt n Israil zi temmurt n Miṣra ttwasettfen ɛlaḥsab iseddiyyen n řɛeskar nsen.