1 Inna SIDI i Musa: “Ad řeqfeɣ ɛad mɣir s yict n jjriḥect x Firɛun d Miṣra. Awarni ta ad kenniw yejj ad traḥem ssa. Ɣar uneggar xmi kenniw ɣa yejj ad traḥem, ad xawem yaẓẓeř ssa marra. 2 Siweř xenni deg imezzuɣen n řgens maḥend ad ittar kuř aryaz zeg wajjar nnes u kuř tamɣart zi tajjart nnes řeqcuɛ n nnuqart d wureɣ.” ^■   3 SIDI iwca as i řgens arḍa di tiṭṭawin n Imiṣriyyen. Ɛawed tuɣa Musa d ijj weryaz s ccan ameqqran di temmurt n Miṣra di tiṭṭawin n řgens u di tiṭṭawin n imsexxaren n Firɛun. ^■   4 Inna Musa: “Ammu i inna SIDI: ‘Ɣar wezyen n ǧiřet Necc ad ɛduɣ di řwest n Miṣra ^■   5 uca ad immet kuř amenzu di temmurt n Miṣra, zeg umenzu n Firɛun, wenni iqqimen x řɛarc n tgeldit, ař amenzu n tesmeɣt, tenni iqqimen awarni i tsirt tḥarri imendi, uřa d kuř amenzu zi řebhayem. ^■   6 Ad din tiři ict n tɣuyyit d tameqqrant x marra tammurt n Miṣra i war tuɣi ɛemmarṣ niɣ ɛemmarṣ ɛad ad tiři. 7 Maca ɣar marra ayt n Israil, war issɛiwɛiw uřa d ijj n weqzin x iwdan uřa x řmař, maḥend ad tessnem belli SIDI ittegg řfarz jar Imiṣriyyen d Israil. 8 Xenni ad ɣari dd-hwan marra imsexxaren nnek, ad aḍaren zzati, ad inin: ‘Ffeɣ cek d marra řgens i cek iḍeffaren deg iṣuraf nnek!’ Awarni man aya necc ad ffɣeɣ.” Uca iffeɣ x Firɛun, tekkar dayes tmessi s uxeyyeq.^■  

9 Aqa inna SIDI i Musa: “Firɛun war d awem ittesři ca, ḥima ad mmarenyent řeɛřamat inu di temmurt n Miṣra.”

10 Aqa Musa d Harun ggin marra řeɛřamat-a zzat i wudem n Firɛun, maca SIDI tuɣa isseqseḥ uř n Firɛun ařami war ijji ad ffɣen ayt n Israil zi temmurt nnes. ^■