10
1 Xenni inna SIDI i Musa: “Adef ɣar Firɛun, minzi Necc ssqesḥeɣ uř nnes d wuř n imsexxaren nnes, ḥima ad ggeɣ řeɛřamat inu di řwest n temmurt nnes, ■ 2 u ḥima ad tḥajid deg imezzuɣen n mmic d mmis n mmic min ggiɣ ak-d Miṣra d řeɛřamat i ggiɣ jar asen, maḥend ad tessnem belli Necc d SIDI.” 3 Řexdenni yudef Musa d Harun ɣar Firɛun, nnan as: “SIDI, AREBBI n Iɛibraniyyen inna: ‘Mecḥař i ɣa tekked tugid ad tehwid ɣar wudem inu? Ejj ad iraḥ řgens inu ḥima ad ayi iɛbed. 4 Minzi mařa tugid ad tejjed ad iraḥ řgens inu, aqa ad dd-aseɣ tiwecca s tmurɣi di temmurt nnek. 5 Ad dřen udem n temmurt ař war izemmar ḥed ad itwařa tammurt ɛad uca ad ccen min iqqimen i ittwanejmen, min d awem iqqimen ɛad awarni i tebrurri. Ad tecc tmuɣri ɛawed marra ticejjura i d awem dd-iɣemmyen deg iyyar. 6 Uca ad ccurent tudrin nnek d tudrin n imsexxaren nnek d tudrin n marra Imiṣriyyen. Man aya war t ẓrin ɛemmarṣ ibabaten nnek d řejdud n ibabaten nnek zeg wami ten tuɣa x temmurt ɣar wass-a.” Uca idweř-dd netta, ismeḥ di Firɛun. 7 Nnan as imsexxaren n Firɛun: “Ař meřmi i d aneɣ ɣa yiři wanita d taxceft? Ejj ad raḥen iryazen nni maḥend ad ɛebden SIDI AREBBI nsen! Ma war tessined ɛad belli Miṣra aqa tᵉttwaxarreb?” 8 Řexdenni ssiwḍen Musa d Harun ɛawed ɣar Firɛun, inna asen: “Ruḥem, ɛebdem SIDI, AREBBI nwem! Ini ayi, min ɛnan inni ixsen ad raḥen?” 9 Inna Musa: “Ad nraḥ s imeẓyanen nneɣ d imeqqranen nneɣ, s iḥenjiren nneɣ d tḥenjirin nneɣ, s wuǧi nneɣ d ifunasen d tfunasin nneɣ, minzi ɣarneɣ ijj n řɛid i SIDI.” 10 Xenni yarra xasen: “Ad yiři SIDI akidwem mařa ad jjeɣ ad traḥem kenniw d iḥenjiren imeẓyanen nwem. Xzarem, aqa kenniw tenwin řɣar!
11 War ittiři amenni. Jjem ad ɛebden iryazen ijehden i SIDI, minzi d man aya i tᵉttexsem.” Uca uẓẓřen xasen zi qibač n wudem n Firɛun.
12 Xenni inna SIDI i Musa: “Swiẓẓeḍ afus nnek x temmurt n Miṣra ḥima tamurɣi ad tgeɛɛed x temmurt n Miṣra maḥend ad tecc marra afsu aziza n temmurt, marra min iceṭṭen x tebrurri.”
13 Isswiẓẓeḍ Musa ɣar teɣɣarct nnes x temmurt n Miṣra uca iṣuḍ-dd SIDI ijj n usemmiḍ n ccarq x temmurt war iqeṭṭin marra ass nni d marra ǧiřet nni. Ɣar ṣṣbeḥ yiwi-dd usemmiḍ tamurɣi. ■
14 Tgeɛɛed-dd tmurɣi x marra tammurt n Miṣra, tṣeyyeḥ x marra jjwayeh n Miṣra. Aqa tuɣa řḥař yewɛar aṭṭas. Tamurɣi amecnaw tanita war tt tuɣi qbeř uca war tᵉttiři ɛemmarṣ zi ssa ɣar zzat.
15 Aqa dřint udem n marra tammurt ařami tessutem temmurt. Nitenti ccint marra afsu n temmurt d marra řɣiǧet n tcejjura i tuɣa iqqimen zi tebrurri. Di marra tammurt n Miṣra war iqqim walu zi marra tuzzizewt di tcejjura niɣ deg ufsu n iyyar.
16 Řexdenni iřaɣa Firɛun deɣya i Musa d Harun, inna: “Aqa xḍiɣ ak-d SIDI, AREBBI nwem, uřa akidwem.
17 Ttzawgeɣ řexxu ad ayi tsamḥem x uxeṭṭu inu twařa aya. Ẓaǧem s řaǧaɣ i SIDI, AREBBI nwem, ḥima ad xafi ikkes řmewt-a waha.”
18 Uca iffeɣ x Firɛun uca iẓẓuǧ s řaǧaɣ ɣar SIDI.
19 Xenni ijja SIDI ad dd-iɛqeb usemmiḍ i dd-yusin zi řɣarb, issjehd i-t aṭṭas uca ikkes usemmiḍ tamurɣi, inḍar i-tt di Řebḥar n Telga. War teqqim uřa d ict n tmurɣi di marra jjwayeh n Miṣra. □ 20 Maca isseqseḥ SIDI uř n Firɛun umi war ijji ayt n Israil ad raḥen.
21 Umi inna SIDI i Musa: “Swiẓẓeḍ afus nnek ɣar ujenna uca ad tiři taǧest x temmurt n Miṣra, ař ɣa tafed tzemmared ad tḥadid taǧest.” 22 Isswiẓẓeḍ Musa afus nnes ɣar ujenna uca tehwa-dd taǧest x marra tammurt n Miṣra, třata n wussan. □ ■ 23 Uřa d ijj war itwiři wenneɣni. Uřa d ijj war ikkar zeg wemcan nnes třata n wussan. Maca marra ayt n Israil tuɣa ɣarsen tafawt deg imucan mani tuɣa zeddɣen. 24 Řexdenni iřaɣa Firɛun i Musa, inna: “Ruḥem, tɛebdem SIDI! Jjem waha ad iqqim wuǧi nwem d ifunasen d tfunasin nwem. Maca tzemmarem ad dd-tawyem iḥenjiren imeẓyanen.” 25 Yarra-dd xas Musa: “Ittxeṣṣa cek ɛawed ad aneɣ tewced deg ufus tiɣarṣa uřa d tiɣarṣa n wecmaḍ. Ad ten nessewjed am tɣarṣṭ i SIDI, AREBBI nneɣ. 26 Uřa d řebhayem nneɣ ittxeṣṣa ad raḥent akidneɣ, war ittɣimi uřa d ijj n ucekrud, minzi zzaysen i ɣa neksi ḥima ad neɛbed SIDI, AREBBI nneɣ, minzi war nessin s minzi i ɣa neɛbed SIDI, AREBBI nneɣ, ař din i ɣa naweḍ.” 27 Maca SIDI isseqseḥ uř n Firɛun uca yugi ad ten yejj ad raḥen. 28 Inna as Firɛun: “Aggʷej xafi! Ḥḍa ḥima war tẓarred ɛad udem inu, minzi ass i ɣa tẓared udem inu, ad temmted!” 29 Inna Musa: “Ad yiři am mammec i tennid: war ẓarreɣ ɛad udem nnek!” ■