9
1 Řexdenni inna SIDI i Musa: “Adef ɣar Firɛun, ini as: ‘SIDI, AREBBI n Iɛibraniyyen iqqar ammu: Ejj ad iraḥ řgens inu, maḥend ad ayi iɛbed. 2 Minzi mařa tugid ad ten tejjed ad raḥen uca ad ten tᵉṭṭfed ɛad ktar, 3 xzar, afus n SIDI ad yiři x řmař nnek inni iǧan deg iyyar uřa d iysan d yeɣyař d yiřeɣman d ifunasen d tfunasin d wuǧi s yijj n ṭṭaɛun iqesḥen aṭṭas. 4 Ad ifarz SIDI jar řebhayem n ayt n Israil d řebhayem n Imiṣriyyen, ḥima war ittmetti walu zi marra min iǧan n ayt n Israil.’ ” 5 Uca ineyyec SIDI ict n řweqt umi inna: “Tiwecca ad yegg SIDI man aya di temmurt.” 6 Tiwecca nnes igga SIDI deqq nni uca mmuten marra řebhayem n Miṣra, maca zi řebhayem n ayt n Israil war temmut uřa d ict zzaysent. 7 Uca issekk Firɛun ijjen, uca aqa da, war temmut uřa d ict zi řebhayem n ayt n Israil. Maca uř n Firɛun idweř iqseḥ uca war yejji ad iffeɣ řgens. 8 Řexdenni inna SIDI i Musa d Harun: “Ɛemmar uru n ifassen nwen s iɣɣeḍ zi tefqunt uca ejj Musa ad t izuzzar deg ujenna qibač i tiṭṭawin n Firɛun. 9 Ad idweř iɣɣeḍ d taɛejjajt ifsusen x marra tammurt n Miṣra uca taɛejjact ad tiři x bnadem u x řmař ařami i ɣa dewřent d tiḥebba s řewɛi di marra tammurt n Miṣra.”
10 Uca ksin iɣɣeḍ zi tefqunt am tuɣa bedden zzat i Firɛun uca izuzzar i-t Musa deg ujenna uca idweř d tiḥebba s řewɛi amenni deg iwdan uřa di řmař,
11 ařami tarwa n tseḥḥart war zemmaren ad qqimen bedden zzat i Musa di ssibbet n tḥebba, minzi tiḥebba ḥekment iseḥḥaren d marra Imiṣriyyen.
12 Maca SIDI isseqseḥ uř n Firɛun ařami war d asen iseǧ ca, am mammec tuɣa inna SIDI i Musa.
13 Řexdenni inna SIDI i Musa: “Tiwecca kkar zic, tbedded zzat i wudem n Firɛun uca ini as: ‘SIDI, AREBBI n Iɛibraniyyen iqqar ammu: Ejj ad iraḥ řgens inu, maḥend ad ayi iɛbed.
14 Minzi twařa aya Necc ad cek řeqfeɣ deg wuř s marra jjrayeḥ inu uca uřa d imsexxaren nnek d řgens nnek, ḥima ad tessned belli war iǧi ḥed amecnaw Necc di marra tammurt.
15 Minzi ɛad řexxu tuɣa zemmareɣ ad sswiẓẓḍeɣ afus inu ḥima ad cek wteɣ uřa d řgens nnek s ṭṭaɛun uca tuɣa izemmar ad tᵉttwateḥḥid zi temmurt.
16 Maca s tidett Necc ssbeddeɣ cek ḥima ad ac ssecneɣ jjehd inu u ḥima ad ittwacenneɛ Isem inu di marra tammurt. ■
17 Ma tᵉttegged ɛad tiɛinkrifin ḍidd i řgens inu ḥima war ten tejjid ad raḥen?
18 Xzar, tiwecca ɣar tsaɛɛet-a Necc ad arreɣ tabrurri iddeqřen ad tewwet, tabrurri i war tuɣi ɛemmarṣ di Miṣra zeg wass i di tᵉttwabna ař řexxu. □
19 Xenni sekk řexxu iwdan, ad ssidfen řebhayem d marra min ɣarek deg iyyar ɣar daxeř. Kuř bnadem niɣ d řmař wenni i ɣa ittwafen deg iyyar, war t ssidfen ɣar daxeř taddart, ad xas-dd tewḍa tebrurri uca nitni ad mmten.’ ” 20 Wenni iggʷeden awař n SIDI zeg imsexxaren n Firɛun, ijja imsexxaren nsen d řebhayem nsen arewřen ɣar daxeř di tudrin. 21 Maca wenni war ittiqqen awař n SIDI s wuř nnes, aqa ijja imsexxaren nnes d řebhayem nnes deg iyyar. 22 Xenni inna SIDI i Musa: “Swiẓẓeḍ afus nnek ɣar ujenna uca ad tiři tebrurri x marra tammurt n Miṣra, x iwdan, x řmař u x marra afsu deg iyyaren di temmurt n Miṣra.” 23 Xenni isswiẓẓeḍ Musa taɣɣarct nnes ɣar ujenna uca SIDI igga ajjaj d tebrurri uca tesswiẓẓeḍ tmessi ɣar temmurt. Ammu i igga SIDI maḥend ad tewwet tebrurri x temmurt n Miṣra. 24 Tuɣa din tabrurri d tmessi ixeǧḍen ak-d tebrurri. Tuɣa tejhed aṭṭas, war tt tuɣi ɛemmarṣ di marra tammurt n Miṣra zeg wami tuɣa tedweř d ijj n řgens. 25 Uca tewta tebrurri x marra tammurt n Miṣra, x marra min tuɣa deg iyyar, x iwdan d řmař. Tewta tebrurri ɛawed x marra afsu deg iyyar uca ttwarẓent marra tcejjura n řexřa. 26 Mɣir tammurt n Jucan, mani iřa iǧan ayt n Israil, war tewti tebrurri.
27 Řexdenni issekk Firɛun ad řaɣan i Musa d Harun uca inna asen: “Necc xḍiɣ twařa aya. SIDI, aqa-t d Amsegged uca necc d řgens inu d iɛeffanen! 28 Ẓaǧem s řaǧaɣ i SIDI, minzi cfa, aqa ajjajen n AREBBI d aṭṭas uřa d tabrurri. Necc ad kenniw jjeɣ ad traḥem, war kenniw ttᵉṭṭfeɣ ca ɛad danita.” 29 Xenni inna as Musa: “Meřmi i ɣa ffɣeɣ zi tendint ad sswiẓẓḍeɣ ifassen inu ɣar SIDI uca ad bedden wajjajen, war tᵉttiři ɛad tebrurri, maḥend ad tessned belli tammurt aqa-tt n SIDI. 30 Maca xak d x imsexxaren nnek, aqa ssneɣ mazal war teggʷedem ca zi SIDI AREBBI.” 31 Tiffest d imendi tuɣa ttwařeqfent, minzi imendi tuɣa-t s tidrin d tiffest tnewwar. 32 Maca irden d karṣana war ttwařeqfen ca, minzi tuɣa aten war dd-ffiɣen ɛad. □ 33 Xenni yuyur Musa x Firɛun, iffeɣ zi tendint uca iksi ifassen nnes ɣar SIDI. Řexdenni bedden wajjajen d tebrurri uřa d ibuda n wenẓar x temmurt. 34 Umi iẓra Firɛun belli anẓar d tebrurri d wajjajen bedden, ixḍa ɛad ktar uca isseqseḥ uř nnes, netta d imsexxaren nnes. 35 Uř n Firɛun yarni di řeqsaḥet, war ijji ad iraḥ ayt n Israil, am mammec tuɣa inna SIDI s ufus n Musa. ■