1 Inna SIDI ɛawed i Musa: “Ini i Harun: ‘Swiẓẓeḍ afus nnek s teɣɣarct nnek x iɣezran, x tɣezratin uřa x iyeřmamen, sgeɛɛed iqarqriwen x temmurt n Miṣra.’ ” 2 Uca isswiẓẓeḍ Harun afus nnes x waman n Miṣra uca geɛɛden-dd iqarqriwen uca dřin tammurt n Miṣra. 3 Uca tarwa n tseḥḥart ggin kifkif s tmegga nsen n swadday swadday uca ssgeɛɛden-dd ɛawed iqarqriwen x temmurt n Miṣra. 4 Iřaɣa-dd Firɛun x Musa d Harun, inna asen: “Ẓaǧem s řaǧaɣ i SIDI ḥima ad iksi iqarqriwen xafi u x řgens inu, uca xenni ad jjeɣ ad iffeɣ řgens maḥend ad qeddmen tiɣarṣa i SIDI.” 5 Inna Musa i Firɛun: “Ṭṭef xafi řḥurmet meřmi d ayi ɣa tinid ad xak ẓẓaǧeɣ u x imsexxaren nnek u x řgens nnek, maḥend ad qeḍɛeɣ iqarqriwen xak u x tudrin nnek, ad qqimen deg yeɣzar waha.” 6 Yarra-dd xas: “Tiwecca!” Inna Musa: “Ad yiři am mammec tennid ḥima ad tessned belli war din iǧi ḥed amecnaw SIDI, AREBBI nneɣ. 7 Uca iqarqriwen ad mmekksin xak u x tudrin nnek uřa x imsexxaren nnek u x řgens nnek, ad qqimen deg yeɣzar waha.” 8 Řexdenni iffeɣ Musa d Harun x Firɛun uca iřaɣa Musa i SIDI di ssibbet n iqarqriwen inni tuɣa igga d jjriḥect x Firɛun. 9 Uca igga SIDI am mammec dd-ittas ak-d wawař n Musa uca mmuten iqarqriwen uca weddaren zi tudrin, zi řemraḥat u zeg iyyaren.

10 Uca ssmunen ten d iɛurrac uca turṣuḍ zzaysen temmurt.

11 Řami iẓra Firɛun belli aqa bnadem izemmar ad yarr nnefs, isseqseḥ uř nnes uca war ɣarsen issḥess, am mammec tuɣa inna SIDI. ^■  

12 Řexdenni inna SIDI i Musa: “Ini i Harun: ‘Swiẓẓeḍ taɣɣarct nnek, tewtid zzayes acař n temmurt. Xenni ad idweř d nnamus x marra tammurt n Miṣra.’ ”

13 Uca ammu i iggin. Isswiẓẓeḍ Harun afus nnes s teɣɣarct nnes i dayes, iwta acař n temmurt. Uca yusa-dd nnamus ammu x iwdan uřa x řmař. Marra acař n temmurt idweř d nnamus di marra tammurt n Miṣra. ^■  

14 Tarwa n tseḥḥart ggin tizemmar nsen amenni ɛawed s tmegga nsen n swadday swadday, maḥend ad ssuffɣen nnamus, maca war zemmaren. Uca tuɣa nnamus x iwdan d řmař.

15 Řexdenni nnan tarwa n tseḥḥart i Firɛun: “D man aya d aḍaḍ n AREBBI!” Maca isseqseḥ uř n Firɛun uca war dd ɣarsen iseǧ ca, am mammec tuɣa inna SIDI.

16 Uca inna SIDI i Musa: “Tiwecca kkar zic, ggur ad tbedded zzat i Firɛun. Xzar, netta ad iffeɣ ɣar tma n waman, ad as tinid: ‘Ammu i iqqar SIDI: Ejj ad iraḥ řgens inu, ḥima ad ayi iɛbed!

17 Minzi mařa war tejjid řgens inu ad iraḥ, xzar, Necc ad xak ssekkeɣ iyřafen n ibeɛɛac, x imsexxaren nnek, x řgens nnek, x tudrin nnek, ařami i ɣa ttwaccurent tudrin n Imiṣriyyen s iyřafen n ibeɛɛac uca amenni uřa d tammurt mani zeddɣen.

18 Deg wass nni ad ssḥuzeɣ tammurt n Jucan mani izeddeɣ řgens inu, ḥima war din ttiřin weyřafen n ibeɛɛac ḥima ad tessned belli Necc d SIDI di řwest n temmurt.

19 Uca ad ggeɣ ijj n ttaman n weṣřaḥ jar řgens inu d wenni nnek. Tiwecca ad tiři řeɛřamet-a.’ ” 20 Uca ammu i igga SIDI. Usin-dd marra iyřafen n ibeɛɛac x taddart n Firɛun, x tudrin n imsexxaren nnes u x marra tammurt n Miṣra uca tᵉttwaxarreb temmurt s iyřafen n ibeɛɛac. ^■   21 Řexdenni iřaɣa Firɛun i Musa d Harun, inna asen: “Ruḥem, tqeddmem taɣarṣt i AREBBI nwem di temmurt-a.” 22 Inna Musa: “War dd-yusi ad negg ammu, minzi ad nqeddem taɣarṣt i SIDI, AREBBi nneɣ, min iǧan d ict n jjɛifect ɣar Imiṣriyyen. Xzar, mařa nqeddem min d asen ittɣiř d jjɛifect d taɣarṣt zzat i tiṭṭawin n Imiṣriyyen, ma war d aneɣ tarejjmen ca? ^■   23 Ejj aneɣ ad nraḥ ticři n třata n wussan di řexřa ḥima ad nqeddem taɣarṣt i SIDI, AREBBI nneɣ, am mammec d aneɣ i ɣa yumur Netta.” 24 Xenni inna Firɛun: “Necc ad kenniw jjeɣ ad traḥem uca ad tqeddmem taɣarṣt i SIDI, AREBBI nwem, di řexřa, maca waxxa amenni war ttriḥem ca tiggʷijem. Ẓaǧem uřa xafi.” 25 Musa inna: “Aqa ad ffɣeɣ xak, ad ẓẓaǧeɣ i SIDI ḥima ad ikkes tiwecca iyřafen n ibeɛɛac x Firɛun, x imsexxaren nnes uřa x řgens nnes. Maca ittxeṣṣa Firɛun war ixeddeɛ twařa nneɣni, war ittejji ad iraḥ řgens maḥend ad iqeddem taɣarṣt i SIDI.” 26 Řexdenni iffeɣ Musa x Firɛun uca iẓẓuǧ i SIDI. 27 Igga SIDI ɛlaḥsab awař i inna Musa uca ikkes iyřafen n ibeɛɛac x Firɛun, x imsexxaren nnes, uřa x řgens nnes. War iqqim uřa d ijj n ubeɛɛuc. 28 Maca Firɛun isseqseḥ uř nnes twařa aya ɛawed, war ijji ad iraḥ řgens. ^■