1 Inna SIDI i Musa: “Xzar, Necc aqa ggiɣ cek d AREBBI i Firɛun d umac Harun ad ac yiři d anabi i cek. 2 Cek ad tinid marra min zi cek i ɣa umureɣ uca Harun, umac, ad issiweř ak-d Firɛun, ḥima ad yejj ad ffɣen ayt n Israil zi temmurt nnes. ^■   3 Maca necc ad ssqesḥeɣ uř n Firɛun uca ad kettareɣ řeɛřamat d lmuɛjizat inu di temmurt n Miṣra. 4 Maca Firɛun war ɣarwem-dd issḥessi u Necc ad ssidfeɣ afus inu di Miṣra uca ad ssuffɣeɣ řɛeskarat inu, řgens inu, ayt n Israil, zi temmurt n Miṣra s řeḥkamat imɣaren. 5 Řexdenni ad ssnen Imiṣriyyen belli Necc d SIDI i ǧiɣ xmi i ɣa sswiẓẓḍeɣ afus inu x Miṣra uca ad ssuffɣeɣ ayt n Israil zi řwest nsen.”

6 Uca ggin Musa d Harun am mammec ten yumur SIDI, wah, amenni i ggin. 7 Tuɣa Musa d ijj n bnadem n tmenyin n iseggʷusa u Harun n třata u-tmenyin n iseggʷusa, řami ssiwřen ak-d Firɛun.

8 Uca issiweř SIDI ak-d Musa d Harun, inna: 9 “Mařa issiweř Firɛun akidwem, ad yini: ‘Ggem ict n lmuɛjiza i yixef nwem!’, xenni ad tinid i Harun: ‘Ṭṭef taɣɣarct nnek uca nḍar i-tt zzat i Firɛun, xenni ad tedweř d ict n řhaycet.’ ”

10 Udfen xenni Musa d Harun ɣar Firɛun uca ggin muxas i d asen yumur SIDI. Inḍar Harun taɣɣarct nnes zzat i Firɛun d imsexxaren nnes uca tedweř d ict n řhaycet.

11 Řexdenni iřaɣa-dd ɛawed Firɛun x imiɣisen d iseḥḥaren, uca uřa d tarwa n tseḥḥart n Miṣra ggin ɛawed amenni kifkif s tmegga nsen n swadday swadday.

12 Inḍar kuř ijjen taɣɣarct nnes uca dewřen d řhaycat. Maca taɣɣarct n Harun tsarḍ tiɣɣaryen nsen.

13 Uř n Firɛun idweř iqseḥ uca war ɣarsen isři ca, am mammec tuɣa i d asen inna SIDI qbeř.

14 Řexdenni inna SIDI i Musa: “Uř n Firɛun idweř iqseḥ. War ixs ad yejj ad iffeɣ řgens.

15 Ruḥ tiwecca ɣar ṣṣbeḥ ɣar Firɛun. Xzar, netta ad iffeɣ ɣar waman. Cek raja din ɣar tma n yeɣzar uca ksi-dd taɣɣarct nni idewřen d ijj n ufiɣar deg ufus nnek.

16 Ad as tinid: “SIDI, AREBBI n Iɛibraniyyen issekk ayi-dd ɣarek, inna: ‘Ejj ad iraḥ řgens inu, ḥima ad ayi iɛbed di řexřa.’ Xzar, ař řexxu war texsed ad tseǧed.”

17 Ammu i iqqar SIDI: “S man aya ggur ad tessned belli Necc d SIDI. Xzar, Necc ggur ad wteɣ aman i iǧan deg iɣzar s teɣɣarct i ɣari deg ufus inu uca ad dewřen d idammen.

18 Iseřman i iǧan deg iɣzar ad mmten ař i ɣa yurseḍ iɣzar, ad ɛiffen Imiṣriyyen ad swen aman n yeɣzar.’ ”

19 Inna SIDI ɛawed i Musa: “Ini i Harun: ‘Ksi taɣɣarct nnek, swiẓẓeḍ afus nnek x waman n Miṣra, x iɣezran nsen, x tɣezratin nsen, x iyeřmamen nsen x marra imucan manis dduqquzen waman uca ad dewřen d idammen. Ad dewřen d idammen x marra tammurt n Miṣra, uřa di řeqcuɛ n ukeccuḍ d weẓru.’ ”

20 Igga Musa d Harun muxas i d asen yumur SIDI. Issgeɛɛed Harun taɣɣarct, iwta aman nni tuɣa deg yeɣzar qibač i tiṭṭawin n Firɛun d imsexxaren nnes uca marra aman inni tuɣa deg yeɣzar dewřen d idammen. ^■   21 Mmuten iseřman inni tuɣa deg yeɣzar uca yurṣuḍ yeɣzar ařami dewřen Imiṣriyyen war zemmaren ad zzayes swen aman uca dewřen waman d idammen di marra tammurt n Miṣra. 22 Maca tarwa n tseḥḥart n Miṣra ggin amenni s tmegga nsen n swadday swadday ařami uř n Firɛun idweř iqseḥ, u netta war ɣarsen issḥessi ca, am mammec d asen tuɣa inna SIDI. 23 Inneqřeb Firɛun uca yudef ɣar taddart nnes uca war iggi uř nnes ɛad di man aya.

24 Marra Imiṣriyyen ɣzin x tma n yeɣzar maḥend ad afen aman n tessit, minzi war zemmaren ad swen aman n yeɣzar. 25 Ɛdun setta n wussan awarni řami iwta SIDI iɣzar.

26 Xenni inna SIDI i Musa: “Adef ɣar Firɛun, ini as: ‘Ammu i iqqar SIDI: Ejj ad iffeɣ řgens inu ḥima ad ayi iɛbed. 27 Mařa tugid ad ten tejjed ad raḥen, aqa ggur ad wteɣ marra tammurt nnek s iqarqriwen 28 uca iɣzar ad dd-iseffiy x iqarqriwen, ad zzayes-dd ggaɛden, ad adfen ɣar taddart nnek u ɣar wexxam nnek n yiḍeṣ, ad dd-asen x qama nnek uřa di taddart n imsexxaren nnek u jar řgens nnek, u ɛawed deg ifarranen nnek u di tbeqyin nnek. 29 Ad xak dd-geɛɛden iqarqriwen uřa x řgens nnek u x marra imsexxaren nnek.’ ”