1 Řexdenni inna SIDI i Musa: “Řexxu ad tẓared min ɣa ggeɣ i Firɛun, minzi s ufus ijehden ad asen yejj ad raḥen, wah, s ufus ijehden ad xasen yaẓẓeř zi temmurt nnes.” 2 Issiweř AREBBI ɣar Musa, inna as: “Necc d SIDI, 3 Necc baneɣ-dd i Ibrahim, d Isḥaq d Yaɛqub am Arebbi, Amzemmar x kuřci, maca s Yisem inu ‘SIDI’, tuɣa war ɣarsen ttwassneɣ ca. 4 Ɛawed ssgeɛɛdeɣ Řɛahd inu akidsen aqa ad asen wceɣ tammurt n Kenɛan, tammurt n unewji nsen mani ten tuɣa am ibarraniyyen. 5 Ɛawed Necc sřiɣ anixses n ayt n Israil, inni ittwaggen d isemɣan zeg Imiṣriyyen, aqa xarrṣeɣ di Řɛahd inu. 6 S uyenni ad tinid i ayt n Israil: ‘Necc aqa ayi d SIDI u Necc ad kenniw ssuffɣeɣ zi sadu zayřu n Imiṣriyyen. Necc ad kenniw fekkeɣ zi tesmuɣi nsen, ad kenniw fdiɣ s uɣiř isswiẓẓḍen d řeḥkamat imɣaren. 7 Ad kenniw qebřeɣ d řgens inu uca ad awem iřiɣ d AREBBI u kenniw ad tessnem belli Necc d SIDI, AREBBI nwem, d wenni tuɣa kenniw issuffuɣen zi sadu zayřu n Imiṣriyyen. 8 Ad kenniw ssidfeɣ ɣar temmurt mixef ssgeɛɛdeɣ afus inu maḥend ad tt wceɣ i Ibrahim d Isḥaq d Yaɛqub u Necc ad awem tt wceɣ d řwart, Necc d SIDI!” ^□   9 Ammu i issiweř Musa ak-d ayt n Israil, maca nitni war sřin ca ɣar Musa zi ssibbet n řeḥṣaret n tnefsect d tasmuɣi iqesḥen.

10 Uca issiweř SIDI ak-d Musa, inna:

11 “Adef ɣar Firɛun, ajeǧid n Miṣra, tinid as ad iḍřeq i ayt n Israil ad ffɣen zi temmurt nnes.”

12 Maca Musa issiweř zzat i SIDI, inna: “Xzar, ayt n Israil war ɣari dd-sřin, mammec i d ayi ɣa iseř Firɛun u necc aqa ɣari iyencicen war ittwaxetnen.” ^□  

13 Řexdenni issiweř SIDI ɣar Musa d Harun uca yumur i-ten ad uyuren ɣar ayt n Israil d Firɛun, ajeǧid n Miṣra, ḥima ad issuffeɣ ayt n Israil zi temmurt n Miṣra.

14 Ina d izeǧifen x řaǧat zi taddart n ibabaten nsen.

Tarwa n Rubin, amenzu n Israil, nitni d Hanuk d Fallu, Ḥaṣrun d Karmi. D yina d řaǧat n Rubin. ^■  

15 Tarwa n Cimɛun tuɣa aten d Yamuyil d Yamin d Uhad d Yakin d Ṣuḥar d Cawul, mmi n ict n temɣart Takenɛanit. Ina d řaǧat n Cimɛun. ^■  

16 Ina d ismawen n tarwa n Lawi ɛlaḥsab asettef n wexřaq nsen: tuɣa aten d Jarcum d Qahat d Marari. Tuɣa řmijař n tudart n Lawi mya u-sebɛa u-třatin n iseggʷusa. ^■  

17 Tarwa n Jarcum tuɣa aten d Libna d Cimɛi ɛlaḥsab řaǧat nsen. ^■  

18 Tarwa n Qahat tuɣa aten d Ɛamram d Yiṣhar d Ḥabrun d Ɛuzziyil. Tuɣa řmijař n tudart n Qahat mya u-třata u-třatin n iseggʷusa. ^■  

19 Tarwa n Marari tuɣa aten d Maḥli d Muci. Ina d řaǧat n Lawi ɛlaḥsab asettef n wexřaq nsen. ^■  

20 Uca Ɛamram iksi Yukabad, ɛentis, d tamɣart i yixef nnes u nettat turuw as-dd Harun d Musa. Tuɣa řmijař n tudart n Ɛamram mya u-sebɛa u-třatin n iseggʷusa. ^■  

21 Tarwa n Yiṣhar tuɣa aten d Quraḥ d Nafaj d Dikri.

22 Tarwa n Ɛuzziyil tuɣa aten d Micayil d Alṣafan d Sitri.

23 Uca iksi Harun Ilicabaɛ, yeǧis n Ɛamminadab, učmas n Naḥcun, d tamɣart i yixef nnes u nettat turuw as-dd Nadab d Abihu d Aliɛazar d Itamar. ^■  

24 Tarwa n Quraḥ tuɣa aten d Assir d Alqana d Abiyasaf. Ina d řaǧat n Iquraḥiyyen.

25 Uca Aliɛazar, mmis n Harun, iksi icten zeg yessis n Futiyil d tamɣart i yixef nnes uca nettat turuw as-dd Finaḥas. Ina d izeǧifen n ibabaten n Ilawiyyen ɛlaḥsab řaǧat nsen.

26 Aqa i Harun d Musa i umi inna SIDI: “Suffɣem ayt n Israil zi temmurt n Miṣra ttwasettfen ɛlaḥsab iseddiyyen n řɛeskar nsen.” 27 Ina d inni issiwřen ak-d Firɛun, ajeǧid n Miṣra, ḥima ad ssuffɣen ayt n Israil zi Miṣra, Musa d Harun nitni d ina. 28 Tuɣa deg wass i issiweř SIDI ak-d Musa di temmurt n Miṣra. 29 Aqa issiweř SIDI ak-d Musa, inna: “Necc d SIDI i ǧiɣ! Marra min d ac qqareɣ, ini t i Firɛun, ajeǧid n Miṣra.” 30 Xenni inna Musa zzat i SIDI: “Aqa ɣari necc iyencicen war ittwaxetnen, mammec i ɣa yegg xenni ad ɣari iseǧ Firɛun?” ^□  ■