Musa d Harun zzat i Firɛun, řḥakem x Miṣra
5
1 Awarni i man aya yudef Musa d Harun ɣar Firɛun, nnan as: “Ammu i iqqar SIDI, AREBBI n Israil: ‘Ejj ad iraḥ řgens inu ḥima ad ayi iɛeyyed di řexřa!’ ” 2 Firɛun inna: “Min iɛna SIDI umi ɣa sřeɣ i wawař nnes uca ad jjeɣ Israil ad iffeɣ. Necc war ssineɣ SIDI u war ttejjiɣ ad iraḥ Israil.” □ ■ 3 Nitni nnan: “AREBBI n Iɛibraniyyen imsagar akidneɣ, ejj aneɣ xenni ad nraḥ ticři n třata n wussan di řexřa, ad nqeddem taɣarṣt i SIDI, AREBBI nneɣ, ḥima war d aneɣ iřeqqef s ṭṭaɛun niɣ s ssif.” ■ 4 Řexdenni inna asen ujeǧid n Miṣra: “Mayemmi, a kenniw Musa d Harun, tessbeddem řgens x řxedmet nnes? Ruḥem kenniw, dewřem ɣar ddquřat i xawem iǧan!” 5 Inna Firɛun: “Xzar, aqa řexxu řgens n temmurt d aṭṭas u kenniw ad ten tejjem ad ssbedden ddqeř n warbar nsen.” □ 6 Yumur Firɛun deg wass nni i imzeyyaren n řgens u i iweqqafen nsen, inna: 7 “Zi ssa d sennej war tᵉtticem ɛad řum i řgens maḥend ad zzayes ggen llajur amecnaw iḍennaḍ d fariḍennaḍ. Jjem ten ad raḥen nitni, ad yrun řum i yixef nsen. 8 Řqedd n llajur i ggin iḍennaḍ d fariḍennaḍ ad xasen tt teggem ɛawed, war zzayes tessneqqisem walu, minzi nitni d ifinyanen. S uyenni sɣuyun ammu u qqaren: ‘Ejj aneɣ ad nraḥ ad nqeddem taɣarṣt i AREBBI nneɣ.’ 9 Ittxeṣṣa řxedmet ad tiři tedqeř x iryazen-a, ḥima ad dayes řhan ammu uca war tticen ɛad taynit i wawařen ixarriqen.”
10 Řexdenni ruḥen imzeyyaren n řgens d iweqqafen nsen dinni uca ssiwřen ak-d řgens, nnan: “Ammu i iqqar Firɛun: ‘Necc war d awem tticeɣ ca ɛad řum.’
11 Ruḥem kenniw ad tyarwem řum mani i t ɣa tafem, maɣar war xawem tᵉttwakkess walu zi řxedmet nwem.”
12 Řexdenni imbezzeɛ řgens x marra tammurt n Miṣra ḥima ad yrun iɣeǧ deg wemcan n řum.
13 Imzeyyaren ziyyaren xasen, nnan: “Kemmřem řxedmet nwem, kuř ass min i dd-ittasen i kuř ass, am mammec tuɣa din řexdenni řum.”
14 Ttwafarcen iweqqafen n ayt n Israil, inni xasen ggin imzeyyaren n Firɛun, ittwanna asen: “Mayemmi war tkemmřem tasɣart nwem n llajur amecnaw řebda, iḍennaḍ lla u ɛawed ass-a lla?”
15 Řexdenni usin-dd iweqqafen n ayt n Israil, sɣuyyen ɣar Firɛun, nnan: “Mayemmi tegged ammu ak-d isemɣan nnek?
16 War ittmewci bu uřum i isemɣan nnek, waxxa amenni qqaren aneɣ: ‘Ggem llajur!’ U xzar, aqa isemɣan nnek ttᵉtten aɛmud, waxxa řɛib aqa-t di řgens nnek!”
17 Netta yarra-dd: “Kenniw d ifinyanen, d ifinyanen aṭṭas. S uyenni teqqarem: ‘Jjem aneɣ ad nraḥ maḥend ad nqeddem taɣarṣt i SIDI.’
18 Ruḥem řexxu ad txedmem. War d awem tticen ɛad ařum, waxxa ittxeṣṣa kenniw ad teqqimem tsebbřem řeɛbar n llajur!”
19 Řexdenni ẓrin iweqqafen n ayt n Israil, aqa aten di ḥařa, minzi ittwanna: “Kenniw war ggur ad tessneqsem walu zi llajur i dd-ittasen i kuř ass.”
20 Umi dd-ffɣen x Firɛun, mmṣadafen ak-d Musa d Harun, inni tuɣa din ibedden ḥima ad ten rajan. 21 Nnan asen: “D SIDI d wenni kenniw ittwařan d wenni xawem i ɣa iḥekmen, minzi kenniw aqa tessarzgem aneɣ ɣar Firɛun d imsexxaren nnes umi d asen teggim ssif deg ifassen nsen maḥend ad aneɣ nɣen.”
22 Řexdenni idweř Musa ɣar SIDI, inna: “A Sidi, mayemmi tᵉtegged řɣar di řgens-a, mayemmi d ayi tessqaded xenni? 23 Zeg wami udfeɣ ɣar Firɛun ḥima ad ssiwřeɣ s Yisem nnek, ideǧ Firɛun řgens-a u Cek qaɛ war tessnejmed ca řgens nnek.”