1 Xenni yarra-dd Musa, inna: “Xzar, nitni war dayi ttimnen ca uca war ttesřin ca i wawař inu, minzi ad inin: ‘SIDI war d ac dd-iban ca.’ ”^□   2 Xenni inna as SIDI: “Min ɣarek deg ufus nnek?” Uca yarra: “D taɣɣarct.” 3 Inna: “Nḍar i-tt x temmurt!” Inḍar i-tt x temmurt, tedweř d ijj ufiɣar uca yarweř Musa zzayes. 4 Řexdenni inna SIDI i Musa: “Swiẓẓeḍ afus nnek, ṭṭef i-tt zeg unewwar nnes!” Isswiẓẓeḍ afus nnes, iṭṭef i-tt uca tedweř ɛawed d taɣɣarct deg ufus nnes. 5 “Ḥima ad amnen belli aqa iban-dd SIDI, AREBBI n řejdud nsen, AREBBI n Ibrahim, AREBBI n Isḥaq d AREBBI n Yaɛqub.”

6 Inna as SIDI ɛawed: “Sidef afus nnek deg weḥsin nnek.” Uca issidef afus nnes deg weḥsin uca umi t-i-dd ikkes, xzar, afus nnes ibarṣ amecnaw adfeř. ^□   7 Uca inna: “Arr afus nnek ɛawed deg weḥsin!” Yarra afus nnes deg weḥsin uca iɛqeb issuffeɣ i-t-i-dd ɛawed zeg weḥsin, uca xzar, idweř ɛawed amecnaw tiřmect n arrimet nnes. 8 “Mařa war cek uminen ca u war ɣarek-dd sřin i min d asen i ɣa tini řeɛřamet tamezwarut, xenni ad amnen di min d asen ɣa tini řeɛřamet taneggarut. 9 Mařa nitni war uminen ca di tnayen n řeɛřamat-a u war d ac sřin ca, xenni ksi aman n yeɣzar uca farreɣ i-ten x řaẓaɣ u aman nni teksid zeg yeɣzar ad dewřen d idammen x řaẓaɣ.” ^■  

10 Řexdenni inna Musa i SIDI: “A Sidi inu!, necc war ǧiɣ ca d aryaz n bu-tawařin, iḍennaḍ lla, uřa d fariḍennaḍ lla u zeg wami tebdid ad tessiwřed ak-d umsexxar nnek lla, minzi necc ɣari aqemmum ideqřen d iřes ideqřen.”

11 Inna as SIDI: “Wi iwcin aqemmum i bnadem? Niɣ wi iggin ḥed d aziynun niɣ d adehcur niɣ d wenni ittwařan niɣ d adarɣař? Ma war ǧiɣ d Necc, SIDI?

12 Řexxu, ruḥ din, ad iřiɣ ak-d uqemmum nnek, ad ac ssecneɣ mliḥ min ɣa tinid.” ^■  

13 Maca netta inna: “A Sidi inu, sekk s ufus nnek, min mma i ɣa tessekked .”

14 Řexdenni ittwasarɣ weɣḍab n SIDI x Musa, inna: “Ma war iǧi Harun, Alawi, d umac? Necc ssneɣ, aqa netta issen ad issiweř. Xzar aqa ggur ad kic imsagar u xmi cek ɣa iẓar, ad ifarḥ wuř nnes.

15 Uca cek ad kis tessiwřed, ad as tegged awařen deg uqemmum nnes. Ggur ad iřiɣ ak-d uqemmum nnek d uqemmum nnes, ad awem ssɣareɣ min ɣa tinim. ^■  

16 Netta ad issiweř ak-d řgens deg wemcan nnek. Ad imsar ammu: netta ad ac yiři amecnaw aqemmum nnek u cek ad tiřid i netta amecnaw AREBBI.

17 Ad teksid taɣɣarct-a, i zi ɣa tegged řeɛřamat, deg ufus nnek.”

18 Iruḥ Musa uca idweř ɣar uḍeggʷař nnes Yitru, inna as: “Ejj ayi ad raḥeɣ, ad ɛeqbeɣ ɣar aytma inni iǧan di Miṣra ḥima ad ẓareɣ, ma ɛad ddaren.” Inna Yitru i Musa: “Ruḥ di řehna.”

19 Inna SIDI ɛawed i Musa di Midyan: “Řuḥ, tdewřed ɣar Miṣra, minzi aqa mmuten marra inni tuɣa yarezzun řmewt nnek.”

20 Iksi Musa tamɣart nnes d iḥenjiren nnes uca issenya i-ten x weɣyuř, idweř-dd ɣar temmurt n Miṣra uca iksi Musa taɣɣarct n AREBBI deg ufus nnes. 21 Inna SIDI i Musa: “Xmi i ɣa traḥed, ad dd-tdewřed ɛawed ɣar Miṣra, xzar ad tegged i Firɛun marra lmuɛjizat nni d ac ggiɣ deg ufus nnek. Maca Necc ad ssqesḥeɣ uř nnes, řami war ixs ad iḍřeq i řgens. 22 Xenni ad tinid i Firɛun: ‘Ammu i iqqar SIDI: Israil d mmi d amenzu inu. 23 Aqa nniɣ ac: Ejj ad iffeɣ mmi ad ayi iɛbed! Maca cek tugid ad t tejjed. Xzar, Necc ad nɣeɣ mmic, amenzu nnek.’ ”

24 Imsar deg webrid, deg ijj n wemcan mani i ɣa ssensen, immeřqa SIDI akides u Netta tuɣa ixs ad t ineɣ. 25 Řexdenni teksi Ṣaffura ijj n ufarric n weẓru, texten řeɛdařyet n mmis uca teřqef as iḍaren nnes, tenna: “S tidett cek d isři n idammen i teǧid i necc.” 26 Ijja i-t xenni. Řexḍenni tenna: “Cek d isři n idammen i teǧid!” di ssibbet n ixtanen.

27 Inna SIDI i Harun: “Ruḥ ad teřqid Musa di řexřa!” Uca iruḥ, imsagar akides ɣar wedrar n AREBBI, issudem i-t. 28 Ixebbar Musa Harun x marra awařen i d as inna SIDI wenni i-t-i-dd issekken d marra řeɛřamat i d as yumur ad igg.

29 Xenni iruḥ Musa d Harun, ssmunen marra imɣaren n ayt n Israil, 30 uca issiweř Harun s marra awařen i tuɣa inna SIDI i Musa uca igga řeɛřamat qibač i tiṭṭawin n řgens. 31 Uca yumen zzaysen řgens, sřin belli SIDI izziǧez as ayt n Israil umi iẓra řmeḥnet i di ǧan uca bendqen izeǧifen nsen uca uḍaren as.