1 Yarwes Musa uǧi n Yitru, aḍeggʷař nnes, akehhan n Midyan, indeh uǧi awarni i řexřa uca yiwiḍ-dd ɣar wedrar n AREBBI, ɣar Ḥurib. 2 Iban as-dd Lmalak n SIDI deg ijj n uceɛɛuř di řwest n ijj n cbarq ak-d isennanen, u xzar, netta iẓra belli cbarq ak-d isennanen tuɣa tekkar dayes tmessi, maca cbarq war ittwacmeḍ ca. 3 Inna Musa: “Ejj ayi ad qewseɣ cwayt maḥend ad ẓareɣ tameẓriwt nni tameqqrant, mayemmi cbarq ak-d isennanen war icemmeḍ ca.” 4 Řami iẓra AREBBI belli ijja abrid maḥend ad iẓar man aya, iřaɣa-dd xas AREBBI zi řwest n cbarq ak-d isennanen, inna: “Musa, Musa!” Netta yarra: “Aqa ayi da!” 5 Inna Netta: “War dd-ttqarrab ca danita! Kkes tisiřa nnek zeg iḍaren nnek, minzi amcan i xef tbedded, aqa-t d tammurt tqeddes.” ^■   6 Inna ɛawed: “Necc d AREBBI n babac, AREBBI n Ibrahim, AREBBI n Isḥaq d AREBBI n Yaɛqub.” Řexdenni Musa issduři aɣembub nnes, minzi iggʷed ad isweḍ di AREBBI. ^■  

7 Inna SIDI: “Aqa ẓriɣ řmeḥnet i di iddar řgens inu i iǧan di Miṣra uca sřiɣ iɣuyyan nsen zzat i imzeyyaren nsen, aqa ssneɣ tamara nnes. ^■   8 Hwiɣ-dd ḥima ad ssnejmeɣ řgens zeg ifassen n Imiṣriyyen, ad t ssuffɣeɣ zi temmurt nni ɣar ict n temmurt teṣbeḥ d tmiriwt, ɣar ict n temmurt ifeyyḍen s uɣi d tamment, ɣar wemcan n Ikenɛaniyyen d Iḥittiyyen d Imuriyyen d Ifiriziyyen d Iḥiwiyyen d Iyibusiyyen. 9 Xzar řexxu, aqa tiweḍ-dd ɣari tɣuyyit n ayt n Israil uca ɛawed ẓriɣ ddeǧ nsen i zi ten deǧen Imiṣriyyen.

10 Řexxu xenni, ruḥ, ad cek ssekkeɣ ɣar Firɛun u cek, suffeɣ řgens inu, ayt n Israil, zi Miṣra.” ^■  

11 Xenni inna Musa i AREBBI: “Min ɛniɣ necc ařami i ɣa raḥeɣ ɣar Firɛun, ad ssuffɣeɣ ayt n Israil zi Misra?”

12 Netta inna as: “Necc ad kik iřiɣ, u tanita ad ac tiři d řeɛřamet belli Necc ssekkeɣ-dd cek: x minni i ɣa tessuffɣed řgens-a zi Miṣra, ad tɛebdem AREBBI x wedrar-a.” ^■  

13 Xenni inna Musa i AREBBI: “Xzar, xmi dd ɣa awḍeɣ necc ɣar ayt n Israil, ad asen iniɣ: ‘AREBBI n řejdud nwem issekk ayi-dd ɣarwem!’, uca nitni ad ayi sseqsan: ‘Mammec d as qqaren?’, min d asen ɣa iniɣ xenni?”

14 Inna AREBBI i Musa: “NECC d NECC i ǧiɣ”. Uca inna ɛawed: “Ammu i ɣa tinid i ayt n Israil: ‘NECC d NECC i ǧiɣ!’ aqa Netta d Wenni d ayi dd-issekken ɣarwem.”

15 Inna AREBBI ɛawed i Musa: “Ammu i ɣa tinid i ayt n Israil, SIDI, AREBBI n řejdud nwem, AREBBI n Ibrahim d AREBBI n Isḥaq d AREBBI n Yaɛqub, issekk ayi-dd ɣarwem. D wa d Isem inu i řebda u wanita ad yiři i řidaret dayi zi jjiř ɣar jjiř.’

16 Ruḥ, tessmuned imɣaren n Israil, ini asen: ‘SIDI, AREBBI n řejdud nwem, AREBBI n Ibrahim d Isḥaq d Yaɛqub iban ayi-dd, inna: ‘Aqa xawem ḥinneɣ uca ẓriɣ min xawem sseɛdun di Miṣra.

17 Nniɣ, Necc ad kenniw ssuffɣeɣ zi řmeḥnet di Miṣra ɣar temmurt n Ikenɛaniyyen d Iḥittiyyen d Imuriyyen d Ifiriziyyen d Iḥiwiyyen d Iyibusiyyen, ɣar ict n temmurt i ifeyyḍen s uɣi d tamment.’

18 Ad sřen i tmijja nnek uca ad traḥed, cek d imɣaren n Israil, ɣar ujeǧid n Miṣra, ad as tinim: ‘SIDI, AREBBI n Iɛibraniyyen, imsagar akidneɣ. Xenni řexxu, ejj aneɣ ad neṭṭef abrid ticři n třata n wussan di řexřa ḥima ad nqeddem tiɣarṣa i SIDI, AREBBI nneɣ.’ ^□  

19 Maca Necc ssneɣ belli ajeǧid n Miṣra war kenniw ittejji ad traḥem uřa s ufus ijehden. 20 Xenni ad sswiẓẓḍeɣ afus inu, ad wteɣ Miṣra s marra lmuɛjizat inu nni dayes i ɣa ggeɣ di řwest nnes uca awarni i man aya netta ad kenniw yejj ad traḥem. 21 Ad ḥinneɣ x řgens-a zzat i tiṭṭawin n Imiṣriyyen uca ad imsar, xmi i ɣa traḥem, war tteffɣem ca s ifassen xwan. 22 Ad tᵉttar kuř tamɣart zi tajjart nnes u zeg inni akides izeddɣen di taddart am ubarrani, řeqcuɛ n nnuqart d wureɣ d warruḍ, uca kenniw ad ten teggem x iḥenjiren nwem d tḥenjirin, ammu i ɣa tkeccḍem Miṣra.” ^■