1 Uca iffeɣ ijj n weryaz zi raǧ n taddart n Lawi, yiwi ict n tḥenjirt n Lawi d tamɣart. ^■   2 Teksi temɣart s ddeyset uca turuw-dd aḥenjir. Umi teẓra belli iṣbeḥ uḥenjir, teffar i-t třata n iyuren. ^□  ■   3 Umi war tezmar ɛad ad t teffar, teksi as-dd ict n tsenduqt n uɣanim, tebra i-tt s ucarmuḍ d tizeft uca tessars dayes aḥenjir, tegga tasenduqt nni jar uɣanim x tma n yeɣzar. 4 Tbedd wučmas ɣar řaggʷaj maḥend ad tẓar min zzayes ɣa ggen.

5 U xzar, tehwa yeǧis n Firɛun maḥend ad tessird ixef nnes deg yeɣzar. Tuɣa tiyya nnes ggurent x tma n yeɣzar. Nettat teẓra tasenduqt deg uɣanim uca tessekk tismeɣt nnes uca teksi t-i-dd. ^■   6 Ařami tt tarzem, teẓra aḥenjir nni, uca xzar, aḥenjir tuɣa ittru. Yudef i-tt uziǧez, tenna: “Wa d ijj zeg iḥenjiren n Iɛibraniyyen!” 7 Řexdenni tenna učmas i yeǧis n Firɛun: “Ma ad raḥeɣ ad řaɣiɣ x ict n temsuḍeḍt zi Tɛibraniyyin maḥend ad am tessuṭṭeḍ aḥenjir?” 8 Tenna as yeǧis n Firɛun: “Ruḥ!” Truḥ teɛzarect, třaɣa i yemmas n uḥenjir. 9 Řexdenni tenna as yeǧis n Firɛun: “Awi-dd aḥenjir-a, tessuṭṭeḍ i-t i necc u necc ad cem xeǧṣeɣ.” Teksi temɣart aḥenjir uca tessuṭṭeḍ i-t.

10 Umi igma uḥenjir, tiwyi i-t ɣar yeǧis n Firɛun, idweř am mmis uca tegga as Musa, tenna: “Aqa jebdeɣ t-i-dd zeg waman.”

11 Deg wussan nni imsar, umi igma Musa, aqa iffeɣ-dd ɣar aytmas, maḥend ad iẓar ddqeř d tamara i xasen ssarebbun. Iẓra ijj n Umiṣri iccat ijj n Uɛibrani, ijjen zeg aytmas. ^■  

12 Ixzar da d diha, iẓra belli war din ḥed, xenni inɣa Amiṣri nni uca iɣba t deg ijdi.

13 Umi dd-iffeɣ tiwecca nnes, iẓra tnayen n yeryazen Iɛibraniyyen ttmenɣan. Inna Musa i wenni ittɛeddan: “Maɣar teccated amqarreb nnek?”

14 Inna netta: “Wi i cek iggin d řḥakem u d řqaḍi xaneɣ? Mma cek teqqared aya umi cek tenwid ad ayi tenɣed amecnaw mammec tenɣid Amiṣri?” Řexdenni iggʷed Musa, inna: “S tidett tamesřact tᵉttwassen!” ^■  

15 Umi isřa Firɛun man aya, yarzu ad ineɣ Musa. Maca Musa yarweř zi zzat n Firɛun uca izdeɣ di temmurt n Midyan uca iqqim ɣar ijj n wanu. ^■  

16 Akehhan n Midyan tuɣa ɣares sebɛa n yessis, tinni i dd-yusin ad ayment aman din uca ccurent sswarej ḥima ad wardent uǧi n babatsent.

17 Usin-dd imeksawen uca uẓẓřen xasent. Ikkar Musa řexdenni, ifekk i-tent, iward uǧi nsent. ^□  

18 Umi dewřent ɣar babatsent umi qqaren Raɛuyil, inna asent: “Mayemmi dd-ttɛeqbent ass-a deɣya?” ^□  

19 Nitenti arrint-i-dd xas: “Ijj n weryaz d Amiṣri ifekk aneɣ zeg ifassen n imeksawen uca ɛawed yuyem aneɣ-dd aṭṭas n waman uca iward uǧi.” ^□   20 Inna i yessis: “I mani yeǧa, mayemmi tejjint aryaz din? Ruḥent řaɣant-i-dd xas ḥima ad icc aɣrum!” 21 Uca iqbeř Musa ad izdeɣ ak-d weryaz nni uca netta iwca as i Musa yeǧis Ṣaffura d tamɣart.

22 Tejja as-dd aḥenjir, igga as Jarcum, minzi inna: “Necc tuɣa ayi d aɣrib deg ict n temmurt d taɣribt xafi.” ^□  ■  

23 Řami iɛdu waṭṭas n řweqt, immut ujeǧid n Miṣra uca qqimen ayt n Israil ttnixsisen di tesmuɣi i di tuɣa ddaren, ssɣuyyen uca iɣuyyan nsen geɛɛden ɣar AREBBI zi tesmuɣi nsen. 24 Uca issḥess AREBBI i tɣuyyit nsen uca ixarreṣ AREBBI di Řɛahd nnes ak-d Ibrahim u ak-d Isḥaq u ak-d Yaɛqub. ^■   25 Ixzar AREBBI ɣar ayt n Israil uca yargeb AREBBI x řeɣben nsen.