1 Iřaɣa Yaɛqub x iḥenjiren nnes, inna: “Smunem-dd ixef nwem, ad awem iniɣ min d awem ɣa imsaren deg uneggar n wussan. 2 Smunem-dd ixef nwem uca sřem, a iḥenjiren n Yaɛqub, sřem i Israil, babatwem.

3 Rubin, cek d amenzu inu, jjehd inu d umezwar n teryast inu, aqa cek d amseḍfar inu di řuɛřa, d amseḍfar inu di řɛezz. ^■   4 Cek amecnaw aman ittneqřaben, war ggur ad ayi dd-teḍfared, aqa cek tgeɛɛded ɣar řectu n řemřac n babac, řexdenni tessfeḍḥed tt, aqa ɣar rectu inu ɣar igeɛɛed. ^■  

5 Cimɛun d Lawi d awmaten! Řemwas nsen d řesnaḥ n lɛunf. 6 Di tmeɛmuč nsen war ittidef řeɛmar inu, deg wegraw nsen war icarrec wuř inu. Aqa deg uxeyyeq nsen nɣin ijj n weryaz uca iɛjeb asen ad qessen iḍaren n ufunas. ^■   7 D amenɛuř axeyyeq nsen minzi tuɣa ijhed aṭṭas, uřa d aduqqez n ufugem nsen minzi iqseḥ. Necc ad ten bḍiɣ x Yaɛqub, ad ten izuzzar di Israil. ^■  

8 Yahuda, aytmac ad cek ssemɣaren. Afus nnek ad yiři x yiri n řɛedyan nnek u iḥenjiren n babac ad ac aḍaren. 9 Yahuda d ijj n mmis n wayrad. Zi zzardet i tuřyed, a mmi inu. Iqwes amecnaw ayrad u amecmaw tayradt. Wi izemmaren ad ten-dd-issfaq? ^■  

10 Azeǧaḍ n ṣṣulṭa war ittwakkes x Yahuda uřa d tamgewwadt zi jar iḍaren nnes, ař dd ɣa yas wenni i ɣa iwcen arraḥet uca ad as ṭaɛen řegnus. ^■  

11 Iqqen ɣar tzayart asnus nnes d mmis n teɣyuč nnes ɣar tzayart icenɛen aṭṭas, issird arruḍ nnes di binu u arruḍ nnes deg idammen n uḍiř.

12 Tiṭṭawin nnes d tibarcanin s binu u tiɣmas nnes d ticemřařin s uɣi.

13 Zabulun ad izdeɣ ɣar tma n řebḥar, ad yiři d řmuyyi i iɣarruba. Aɣezdis nnes ad yareyyeḥ x Ṣidun. ^■  

14 Issakar d ijj n weɣyuř iqseḥ, izzeř jar tnayen n řmedwat.

15 Umi iẓra arraḥet d lemliḥ u tammurt aqa tarecceq, iɛarra x ifassen maḥend ad yarbu arrmeḥ uca idweř sadu azayřu n ismeɣ.

16 Dan ad iḥkem řgens nnes s uzerf, am ict zi tqebbař n Israil.

17 Ad yiři Dan d afiɣar deg webrid, tařefsa deg umesruq, wenni izeɛɛfen deg inirzawen n uyis, ař ɣa iwḍa wenni xas inyin ɣar ḍeffar.

18 Asenjem nnek i ttrajiɣ, a SIDI!

19 Jad, ad xas ḥejment bandiyyat, maca ad xasen idarrec.

20 Acir, aɣrum nnes ad yiři d aɣrum ismen, netta ad iqeddem macca yiziden igellden.

21 Naftali d ict n tudadt ittwaḍeřqen, issuffuɣ awařen cnan.

22 Yusuf d mmis n tcejjart itticen řɣiǧet, mmis n tcejjart itticen řɣiǧet ɣar tařa. Yessis ggurent x weɣbar. ^■   23 Nitni ssarezgen xas tudart, tuɣa aten s waṭṭas uca imjebbaden n řqews marrten t, ^■   24 maca řqews nnes iqqim imḥeḍ u iɣaǧen n ifassen nnes qqimen arxun s ifassen n Umzemmar n Yaɛqub - x uya Netta d Ameksa d Taṣḍart n Israil - 25 s Arebbi n babac wenni cek i ɣa iɛawnen, Amzemmar x kuřci, wenni cek i ɣa ibarken s lbarakat n ujenna sennej, s lbarakat n waman yuǧɣen i din iǧan swadday, s lbarakat n tubbect d řemřawřet. 26 Lbarakat n babac d timeqqranin uɛřant x lbarakat n yinni d ayi dd-yejjin uca ttakkwaḍent ɣar tqiccatin n tewririn n řebda. Ad iřint x uzeǧif n Yusuf, x tuccent n ucewwaf n wenni ittwaɛezřen x aytmas s temrist. ^■  

27 Binyamin d ijj n wuccen ittmezzaq. Ɣar ṣṣbeḥ ad iṣarḍ zzardet u s ǧiřet ibeṭṭa takeccaḍt.”

28 Marra ina d tenɛac n tqebbař n Israil. D man aya min d asen inna babatsen uca ibark i-ten. Ibark i-ten, kuř ijj s lbaraka nnes. 29 Yumur i-ten, inna asen: “Ad muneɣ ak-d řgens inu. Neḍřem ayi ak-d řejdud inu deg ifri wenni iǧan deg iyyar n Ifrun, Aḥitti, 30 deg ifri wenni iǧan deg iyyar n Makfila i iǧan zzat i Mamri di temmurt n Kenɛan, tenni isɣa Ibrahim ak-d yeyyar zi Ifrun, Aḥitti, amecnaw anḍeř nnes. ^■   31 Dinni i neḍřen Ibrahim d Sara tamɣart nnes. Dinni i neḍřen Isḥaq d temɣart nnes Rifqa. U necc neḍřeɣ din Liya. ^■   32 Iyyar s ifri i tuɣa dayes iǧan immseɣ x iḥenjiren n Ḥit.”

33 Umi ikemmeř Yaɛqub ad iweṣṣa iḥenjiren nnes, ikemmec iḍaren nnes di qama uca iffeɣ i-t buḥbeř uca ittwassmun deg wenḍeř ak-d řejdud nnes. ^□  ■