Anḍeř n Yaɛqub
50
1 Xenni ingez Yusuf x uɣembub n babas, iru xas uca issudem i-t. 2 Yumur Yusuf i imsexxaren nnes, iḍbiben, ad ḥennḍen babas uca iḍbiben ḥennḍen Israil. 3 Arebɛin n wussan i dayes kkin, minzi ḥdajen ussan nni maḥend ad kemmřen aḥenneṭ uca run marra Imiṣriyyen sebɛin n wussan. 4 Umi ɛdun wussan xas n řeɛzat, issiweř Yusuf ak-d yenni n taddart n Firɛun, inna: “Mařa ufiɣ řexxu arḍa di tiṭṭawin nwem, ttzawgeɣ kenniw, ad tessiwřem deg imejjan n Firɛun, inim: 5 “Baba inu ijja ayi ad jjaǧeɣ uca inna: ‘Aqa ttmettiɣ. Ittxeṣṣa ad ayi tneḍřed deg wenḍeř nni neqceɣ i yixef inu di temmurt n Kenɛan!’ Xenni, ttzawgeɣ, ejj ayi ad raḥeɣ řexxu ad neḍřeɣ baba uca awarni man aya ad dd-ɛeqbeɣ.”    6 Uca inna Firɛun: “Ruḥ, nḍeř babac, am mammec d as tejjuǧed.”
7 Uca igeɛɛed Yusuf ḥima ad inḍeř babas uca geɛɛden marra imsexxaren n Firɛun akides, imɣaren n taddart nnes d marra imɣaren n temmurt n Miṣra 8 uřa d marra taddart n Yusuf d aytmas nnes d taddart n babas. Mɣir iḥenjiren imeẓyanen nsen d wuǧi nsen d ifunasen d tfunasin nsen jjin ten di temmurt n Jucan. 9 Gaɛɛden akides ikarruten d yenni inyin x yeysan uca ggin ijj n uqarru n řɛeskar imɣar.
10 Umi iwḍen ɣar unedrar n Atad, wenni iǧan x ujemmaḍ n L'Urdun, ssgeɛɛden din ict n tɣuyyit temɣar u tejhed aṭṭas uca igga Yusuf din ijj n wecḍan x babas i yijj n řmijař n sebɛa n wussan.
11 Ẓrin imezdaɣ n temmurt, Ikenɛaniyyen, acḍan deg unedrar n Atad, nnan: “Wa d acḍan imɣar n Imiṣriyyen.” S uya řaɣan isem nnes Abal-Miṣrayim, wenni iǧan x ujemmaḍ n L'Urdun.   
12 Ggin iḥenjiren nnes zzayes am mammec ten iweṣṣa.
13 Arbun t iḥenjiren nnes ɣar temmurt n Kenɛan, neḍřen t deg ifri deg iyyar n Makfila nni isɣa Ibrahim ak-d yeyyar zi Ifrun, Aḥitti, arendad n Mamri, maḥend ad yiři d anḍeř nnes.   
14 Awarni řami inḍeř babas, iɛqeb Yusuf ɣar Miṣra, netta d yaytmas d marra inni akides dd-igeɛɛden maḥend ad neḍřen babas.
15 Umi ẓrin aytmas n Yusuf babatsen immut, nnan: “Mařa icarh aneɣ Yusuf, ad aneɣ ixeǧeṣ nican marra řɣar nni dayes negga.”
16 S uyenni ssekken ad xebbaren Yusuf s man aya, nnan: “Babac iweṣṣa qbeř řmewt nnes, inna:
17 ‘Ammu i ɣa tinim i Yusuf: Ttzawgeɣ cek, ɣfar řexxu axeṭṭu n aytmac d ddenb nsen d řɣar i d ac ggin. Ɣfar řexxu axeṭṭu n imsexxaren n AREBBI n babac!’ ” Uca isɣuyy Yusuf am kis ssawařen ammu.
18 Xenni usin-dd ɛawed aytmas s yixef nsen, wḍan as zzat i uɣembub nnes, nnan: “Aqa-neɣ da d imsexxaren nnek!”
19 Yarra xasen Yusuf: “War tteggʷdem ca! Ma aqa ayi necc deg wemcan n AREBBI?    20 Waxxa kenniw txarrṣem dayi s řɣar, maca AREBBI inwa zzayes řxar, ḥima ad yegg am mammec neẓra ass-a, ad yejj di tudart ijj n řgens d ameqqran. 21 Řexxu, war tteggʷdem ca! Necc ad kenniw ɛewwřeɣ, kenniw d iḥenjiren imeẓyanen nwem.” Ammu ten issfewwej uca issiweř akidsen ɣar wuřawen nsen.
22 Tuɣa Yusuf izeddeɣ di Miṣra, netta d taddart n babas, uca iddar Yusuf mya u-ɛecra n iseggʷusa. 23 Iẓra Yusuf iḥenjiren n Ifrayim ař jjiř wiss třata. Ɛawed iḥenjiren n Makir, mmis n Manassa, aqa ttwarwen-dd x ifadden n Yusuf.   
24 Uca inna Yusuf i yaytmas: “Necc ad mmteɣ, maca AREBBI ad kenniw yarzef s tidett uca ad kenniw issgeɛɛed zi temmurt-a ɣar temmurt i iwaɛd s tjaǧit i Ibrahim d Isḥaq d Yaɛqub.”    25 Xas uca issjjuǧ Yusuf ayt n Israil, inna: “AREBBI ad kenniw yarzef s tidett uca xenni ad teksim ssa ixsan inu!”    26 Immut Yusuf umi tuɣa ɣares mya u-ɛecra n iseggʷusa. Ḥennḍen t uca ssarsen t di řmeḥmeř n umettin di Miṣra.