1 Awarni man aya imsar, řami ittwanna i Yusuf: “Xzar, aqa babac iḥřec!” Xenni iksi akides tnayen n iḥenjiren nnes Manassa d Ifrayim. 2 Xebbaren Yaɛqub, nnan: “Xzar, aqa mmic Yusuf ad ɣarek dd-yas!” Xenni igga Israil uř deg ixef nnes uca ikkar iqqim x qama. 3 Xenni inna Yaɛqub i Yusuf: “Arebbi, Amzemmar x kuřci, aqa iban ayi-dd di Luz, di temmurt n Kenɛan, u aqa Netta ibark ayi. ^■   4 U aqa netta inna ayi: “Xzar, ad cek arreɣ ad tegged řɣiǧet uca ad zzayek kettareɣ, ad cek ggeɣ d ijj n wegraw n řegnus, ad ac wceɣ tammurt-a d agřa i řebda, u i zzariɛet nnek awarni ac. ^■   5 Uca řexxu, aqa tnayen n iḥenjiren nnek, Ifrayim d Manassa, inni d ac dd-ittwaxeřqen di temmurt n Miṣra qbeř ma ad ɣarek dd-aseɣ ɣar temmurt n Miṣra, aqa aten inu, amecnaw Rubin d Cimɛun i iǧan inu. ^■   6 Maca inni dd ɣa yasen awarni asen, ad iřin nnek. Ad ttwasemman x yisem n aytmatsen di řwart nsen. 7 Umi dd-usiɣ zi Fadan-Aram, temmut Raḥil zzati di temmurt n Kenɛan deg webrid, řami tuɣa ɛad war tiggʷij x Ifrata. Neḍřeɣ tt din deg webrid ɣar Ifrata, aqa-tt d Bayt-Laḥm. ^■   8 Iẓra Israil iḥenjiren n Yusuf, inna: “Min ɛnan ina?” 9 Yarra-dd Yusuf x babas: “D iḥenjiren inu i d ayi iwca AREBBI danita.” Inna as: “Sqarrbem ten-dd ɣari uca ad ten barkeɣ!”

10 Tuɣa tiṭṭawin n Israil uẓɣent s tewsar, war iqqim ittwařa. Issqarreb as ten-dd, xenni issudem i-ten, idarreɛ asen.

11 Inna Israil i Yusuf: “War d ayi ittɣiř ad ẓareɣ ɛad udem nnek. Xzar, AREBBI igga ayi ad ẓareɣ ɛad tarwa nnek!” ^□  

12 Xenni issḍar i-ten Yusuf x ifadden nnes uca ibbendeq s wudem nnes ɣar temmurt.

13 Uca iksi i-ten Yusuf s tnayen idsen, Ifrayim s ufusi nnes arendad n uzeřmaḍ n Israil u Manassa s uzeřmaḍ nnes arendad n ufusi n Israil uca issqareb as ten-dd.

14 Isswiẓẓeḍ Israil yeffus nnes, issars i-t x uzeǧif n Ifrayim, waxxa tuɣa-t d amaẓuẓ, d azeřmaḍ nnes x uzeǧif n Manassa. Issars ammu ifassen nnes mammec nneɣni neɛmada, waxxa Manassa tuɣa-t d amenzu.

15 Ibark Yusuf, inna: “D AREBBI, wenni umi řejdud inu, Ibrahim d Isḥaq, uyuren zzates, AREBBI, wenni iǧan d Ameksa inu zeg wami ǧiɣ ař ass-a, ^□  ■  

16 Lmalak, wenni d ayi ifdin zi marra tuɛeffna, iři netta ad ibark iḥenjiren-a u iři ad ittwařaɣa isem inu daysen uřa d isem n řejdud inu, Ibrahim d Isḥaq. Iři ad mmarenyen ař ɣa dewřen d ijj n ubarru di řwest n temmurt!” ^□  ■  

17 Umi iẓra Yusuf, belli babas igga afus afusi nnes x uzeǧif n Ifrayim, tuɣa-tt d ict n řeɛřamet war teḥḥři ɣares di tiṭṭawin nnes uca issgeɛɛed afus n babas, ḥima ad t ibeddeř zeg uzeǧif n Ifrayim ɣar uzeǧif n Manassa.

18 Inna Yusuf i babas: “Maci ammu, a baba inu, minzi d wa d amenzu, egg afusi nnek x uzeǧif nnes.”

19 Maca babas war ixs ca, inna: “Ssneɣ, a mmi inu, ssneɣ. Ɛawed netta ad idweř d ijj n řgens, ad imɣar ɛawed, maca umas amaẓuẓ ad yiři ktar zzayes, zzariɛet nnes ad tedweř d ahimur n řegnus.” ^■   20 Uca ammu i ten ibarek ass nni, inna: “Dayek ad ibarek Israil, ad yini: ‘Iři ad ac iwc AREBBI amcan amecnaw i Ifrayim d Manassa!’ ” Uca yarra Ifrayim ad ibedd zzat i Manassa. ^■   21 Awarni as inna Israil i Yusuf: “Xzar, ad mmteɣ, maca AREBBI ad yiři akidwem, ad kenniw issmuṭṭiy ɣar temmurt n řejdud nwem. 22 Aqa wciɣ ac tasɣart nni n idurar x yaytmac, tenni ksiɣ necc zeg ifassen n Imuriyyen s ssif d řqews inu.” ^■