1 U řami dd-yusa Yusuf, ixebbar Firɛun, inna as: “Baba d aytma d wuǧi nsen d ifunasen d tfunasin nsen d marra min ɣarsen, aqa usin-dd zi temmurt n Kenɛan. Xzar, aqa aten di temmurt n Jucan.” ^■   2 Uca zi jar marra aytmas yiwi xemsa n yeryazen, iqeddem as ten i Firɛun. 3 Xenni inna Firɛun i yaytmas: “Min teɛna řxedmet i tᵉtteggem?” Nitni arrin-dd x Firɛun: “Imsexxaren nnek d imeksawen n wuǧi, amecnaw řejdud nneɣ.” ^■   4 Nnan ɛawed i Firɛun: “I tzeddiɣt di temmurt-a am ibarraniyyen i dd-nusa, minzi war yeǧi wefsu i wuǧi n imsexxaren nnek, minzi řaẓ iqseḥ di temmurt n Kenɛan. Xenni řexxu, nettzaweg i cek, ejj imsexxaren nnek ad zedɣen di temmurt n Jucan!” 5 Uca issiweř Firɛun ak-d Yusuf, inna: “Babac d aytmac usin-dd ɣarek. 6 Tammurt n Miṣra aqa-tt nnek marra. Ejj babac d aytmac ad zedɣen di temmurt iṣebḥen, ejj i-ten ad zedɣen di temmurt n Jucan uca mařa tḥekkared belli aqa jar asen iryazen iwengiten, ggem ten d imeḥḍayen x řebhayem inu.” 7 Uca indeh Yusuf babas, iqeddem i-t i Firɛun uca Yaɛqub ibarek Firɛun. 8 Inna Firɛun i Yaɛqub: “Mechař ɣarek n iseggʷusa?” ^□   9 Yaɛqub yarra-dd x Firɛun: “Mya u-třatin n iseggʷusa i ddareɣ d abarrani. Ussan n iseggʷusa n tudart inu yuqřiřen u ccuren s řɣar. War iwiḍen ca wussan n iseggʷusa n tudart n řejdud inu deg wussan n lɣurba nsen.” ^■  

10 Yaɛqub ibark Firɛun uca iffeɣ ssenni zzat i wudem n Firɛun.

11 Isscen Yusuf tazeddiɣt i babas d aytmas, iwca asen tasɣart di temmurt n Miṣra, zi lemliḥ n temmurt, di temmurt n Raɛamsis am mammec t iweṣṣa Firɛun.

12 Iksi Yusuf baba as d aytma as d marra taddart n baba as s weɣrum ɛlaḥsab řqedd n iḥenjiren. ^□  

13 Aɣrum tuɣa war iǧi di temmurt marra, minzi řaẓ tuɣa iqseḥ aṭṭas, ařami tiweḍ temmurt n Miṣra d temmurt n Kenɛan fennant s řaẓ.

14 Xenni iyru Yusuf marra nnuqart nni ittwafen di temmurt n Miṣra u di temmurt n Kenɛan deg ubeddeř n imendi i isɣin. Igga Yusuf nnuqart nni di taddart n Firɛun.

15 Umi teqḍa nnuqart zi temmurt n Miṣra d temmurt n Kenɛan, usin-dd marra Imiṣriyyen ɣar Yusuf nnan: “Ewc aneɣ aɣrum, maɣar mayemmi i ɣa nemmet zzatek? War din ɛad ca nnuqart.”

16 Yusuf inna: “Mařa war ɣarwen bu nnuqart ɛad, wcem xenni řebhayem nwem u necc ad awem wceɣ macca deg ubeddeř n řebhayem nwem.”

17 Nitni iwyen-dd řebhayem nsen ɣar Yusuf uca iwca asen Yusuf aɣrum deg wemcan n iysan d wuǧi d ifunasen d tfunasin d yeɣyař uca issecc i-ten s weɣrum deg wemcan n marra řebhayem nsen deg useggʷas nni.

18 Umi iɛdu useggʷas nni, usin-dd ɣares deg useggʷas wiss tnayen uca nnan as: “War netteffar ca x sidi nneɣ belli aqa nnuqart nneɣ teqḍa uca řebhayem aqa atent deg ufus n sidi inu. War iqqim walu zzat i wudem n siditneɣ, mɣir arrimet nneɣ d iyyaren nneɣ.

19 Mayemmi i ɣa nemmet zzat i tiṭṭawin nnek, uřa d neccin uřa d tammurt nneɣ? Seɣ aneɣ, tesɣed temmurt nneɣ i weɣrum uca neccin d temmurt nneɣ ad niři d imsexxaren n Firɛun. Ewc aneɣ zzariɛet ḥima ad neddar war nettmetti ca uca tammurt war teddikkwiř d amessuci!”

20 Xenni isɣa Yusuf marra tammurt n Miṣra i Firɛun, minzi Imiṣriyyen zzenzen marra iyyar nsen, minzi tuɣa řaẓ iqseḥ xasen. U ammu i tedweř temmurt d agřa n Firɛun. 21 Uca issmuṭṭiy řgens zeg uneggaru n weymir ař aneggaru nneɣni n weymir n Miṣra ɣar tneddam. 22 Mɣir tammurt n ikehhanen war tt isɣi ca. Aqa ikehhanen ɣarsen ict n řmunet zi Firɛun, nitni ttᵉtten tasɣart nsen, tenni i d asen iwca Firɛun. S uya war zzenzen ca tammurt nsen. 23 Xenni inna Yusuf i řgens: “Xzar, ass-a necc sɣiɣ kenniw uřa d tammurt nwem i Firɛun. Xzarem, aqa da zzariɛet nwem. Zarɛem zzayes tammurt! 24 Zi řɣiǧet ad tewcem tasɣart texmusect i Firɛun u arebɛa n tseqqar i iqqimen ad iřint i yixef nwem d zzariɛet i yeyyar uca ad iřint maḥend ad zzaysent teccem kenniw ak-d aytbab n taddart nwem u ɛawed maḥend ad zzaysent ccen iḥenjiren imeẓyanen nwem.” 25 Nitni nnan: “Cek teḥḍid tudart nneɣ. Ejj aneɣ ad naf arḍa di tiṭṭawin n sidi inu uca neccin ad niři d imsexxaren i Firɛun.” 26 Igga Yusuf aya d tawṣeyyet i din iǧan ař ass-a, belli ict n tesɣart n texmusect n řɣiǧet n temmurt n Miṣra ad tiři i Firɛun. Mɣir iyyaren n ikehhanen qqimen war ddikkwiřen ca d agřa n Firɛun.

27 Ammu i izdeɣ Israil di temmurt n Miṣra, di temmurt n Jucan, mellken dayes uca wcin řɣiǧet uca ktaren s yijj n cckel imɣar. 28 Iddar Yaɛqub di temmurt n Miṣra sbeɛṭac n iseggʷusa uca tuɣa ussan n Yaɛqub, iseggʷusa n tudart nnes, mya u-sebɛa u-rebɛin n iseggʷusa. 29 Umi dd-iwḍen wussan i Israil ad immet, iřaɣa-dd x Yusuf mmis, inna as: “Mařa ufiɣ arḍa di tiṭṭawin nnek, ttzawgeɣ cek, ad tegged afus nnek sadu tmeṣṣaḍt inu uca egg akidi s tmexsiwt icewwaren d řaman u war d ayi neṭṭeř ca di Miṣra, ^■   30 maca egg ad ttwassarseɣ deg wenḍeř jar řejdud inu. Awi ayi zi Miṣra uca nḍeř ayi deg wenḍeř nsen. Yarra-dd xas: “Necc ad ggeɣ min tennid!” 31 Xas uca inna as: “Jaǧ ayi!”, uca ijjuǧ as. Řexdenni yuḍar Israil x uzeǧif n qama. ^■