1 Awarni řami ɛdun tnayen n iseggʷusa yurja Firɛun aqa netta zeɛma ibedd x yeɣzar n Nil. 2 Xzar, geɛɛdent-i-dd sebɛa n tyenduzin zeg yeɣzar, ṣebḥent i řxezrat u ɛemmarent s weysum, heddant jar weḥtic n uɣanim. 3 U xzar, sebɛa n tyenduzin nneɣni geɛɛdent-i-dd awarni asent zeg yeɣzar. Nitenti war ḥřint i řxezrat, aqa kkuccḍent uca beddent zzat i tyenduzin nneɣni ɣar tma n yeɣzar. 4 Tifunasin i war iḥřin i řxeẓrat, tinni ikuccḍen, ṣarḍent sebɛa n tyenduzin iṣebḥen i řxezrat tinni ṣeḥḥent. Uca ifaq-dd Firɛun.

5 Iṭṭeṣ ɛawed uca yurja twařa nneɣni, u xzar, zeg ict n tseṭṭa geɛɛdent sebɛa n tedrin ccurent, cnant. 6 U xzar, awarni asent ɣemyent-i-dd sebɛa n tidrin qqusbarent, isscemḍ i-tent usemmiḍ acarqi. 7 Sebɛa n tedrin tizdadin ṣarḍent sebɛa n tedrin nni iyman iccuren. Uca ifaq-dd Firɛun, u xzar, aqa d ict n terjit.

8 Ɣar ṣṣbeḥ iban-dd belli buḥbeř nnes innehweř uca issekk maḥend ad dd-řaɣan i marra tarwa n tseḥḥart n Miṣra u i marra imiɣisen. Iɛawd asen Firɛun tarjit nnes, maca war din tuɣi ḥed izemmar ad tt ifessar i Firɛun. 9 Issiweř umeqqran n iwarraden ak-d Firɛun, inna: “Deg wass-a ad ttwasɛeqqřeɣ x ddnub inu.

10 Umi iffugem Firɛun x imsexxaren nnes, igga ayi di řeḥbes di taddart n řqebṭan n iɛessasen n arrimet, am necc am umeqqran n ixebbazen.

11 Necc d netta nurja ict n tarjit di ǧiret d ict. Kuř ijj zzayneɣ yurja tarjit nnes s řmeɛna nnes. ^■  

12 Tuɣa din akidneɣ ijj n ubřiɣ d Aɛibrani. Tuɣa-t d amsexxar n řqebṭan n iɛessasen n arrimet. Nḥaja as tirja nneɣ uca ifessar aneɣ tent. I kuř ijj zzayneɣ ifessar as tarjit nnes.

13 Am mammec tent ifessar, amenni i imsar. Aqa Firɛun yarra ayi necc ɣar řxedmet inu u wenneɣni yuyeř i-t.”

14 Issekk Firɛun ḥima ad dd-řaɣan x Yusuf uca ssuffɣen t-i-dd deɣya zeg weḥfur n imeḥbas. Iḥeff acewwaf, ibeddeř arruḍ uca ammu i yudef ɣar Firɛun. ^■  

15 Inna Firɛun i Yusuf: “Necc urjiɣ ict n tarjit, war iǧi wi tt ɣa ifessaren. Maca aqa sřiɣ xak belli cek, xmi i ɣa tesřid i tarjit, tzemmared ad tt tfessared.”

16 Yarra Yusuf x Firɛun, inna: “War iǧi ca zzayi, maca AREBBI ad yarr x mammec i ɣa idweř umeddur n Firɛun.”

17 Inna Firɛun i Yusuf: “Di tarjit inu ẓriɣ ixef inu beddeɣ x tma n iɣzar.

18 Aqa geɛɛdent-i-dd sebɛa n tyenduzin zeg yeɣzar, ɛemmarent s weysum u ṣebḥent i řxezrat, heddant jar weḥtic n uɣanim.

19 Awarni asent sebɛa n tyenduzin nneɣni geɛɛdent-i-dd. Tuɣa kkuccḍent u war ḥřint deg wudem, uẓɣent. Ammu war ḥřint ɛemmarṣ war tent ẓriɣ di temmurt n Miṣra am tekmeř. 20 Tiyenduzin nni yuẓɣen, war iḥřin sarḍent sebɛa n tyenduzin timezwura iṣeḥḥen. 21 Umi udfent tina deg uɛeddis nsent, war dd as arrin řbař, belli aqa udfent deg uɛeddis nsent, aqa qqiment war ḥřint i řxezrat am qbeř. Xenni faqeɣ. 22 Ɛawed ẓriɣ di tarjit inu, u xzar, zeg ict n tseṭṭa ffɣent-i-dd sebɛa n tidrin ccurent u cnant. 23 Xzar, ẓriɣ, geɛɛdent-i-dd sebɛa n tidrin qqusbarent, uẓɣent, isscemḍ i-tent usemmiḍ acarqi. 24 U sebɛa n tidrin yuẓɣen, ṣarḍent sebɛa n tidrin nni icnan. Nniɣ t i tarwa n tseḥḥart, maca war din tuɣi ḥed i izemmaren ad ifessar tarjit-a.”

25 Yarra Yusuf x Firɛun: “Tarjit n Firɛun d ict. AREBBI ibeyyen i Firɛun min iggur ad igg. 26 Sebɛa n tyenduzin nni icnan aqa atent d sebɛa n iseggʷusa. Uca tidrin icnan d sebɛa n iseggʷusa. D tarjit d ict. 27 Sebɛa n tyenduzin nni yuẓɣen war iḥřin tinni dd-yuřyen awarni asent d sebɛa n iseggʷusa, u sebɛa n tidrin qqusbarent, tinni issecmḍ usemmiḍ acarqi, aqa atent d sebɛa n iseggʷusa i di ɣa yiři řaẓ. 28 D wa d awař i nniɣ i Firɛun. Min i ɣa yegg AREBBI, aqa isscen i-t i Firɛun. 29 Xzar, di sebɛa n iseggʷusa i dd-igguren ad tiři tyawant tameqqrant x marra tammurt n Miṣra. 30 Awarni asen ad dd-asen sebɛa n iseggʷusa n řaẓ. Di marra tammurt n Miṣra ad ttun marra tyawant uca řaẓ ad iteḥḥa tammurt. 31 Uca tyawant war tᵉttiři tᵉttwassen ɛad zi ssibbet n řaẓ i t-i-dd-iḍfaren, maɣar řḥař ad yiři iqseḥ aṭṭas. 32 Ɛlaḥsab ṭṭbiɛet n tnayen n wudmawen n turja n Firɛun, aqa tnayen n tseqqar, aqa man aya s minzi yura t AREBBI nican u AREBBI aqa ad tt yegg deɣya. 33 Ejj Firɛun řexxu ad yarzu x weryaz s řefhamet d tiɣit maḥend ad t igg x temmurt n Miṣra. 34 Ejj Firɛun ad igg ammu: ejj i-t ad igg imeḥḍayen x temmurt maḥend ad ksin řexmus n řɣiǧet n temmurt n Miṣra di sebɛa n iseggʷusa n tyawant. ^□   35 Ejj i-ten ad ssmunen marra řeɛweč deg iseggʷusa iṣebḥen i dd ɣa yasen uca ad xemmřen imendi sadu ufus n Firɛun maḥend ad t xemmřen d macca di tneddam. 36 Ad yiři d řexzen n macca i temmurt i sebɛa n iseggʷusa n řaẓ nni dd ɣa iwḍan x temmurt n Miṣra ḥima tammurt war tᵉttmetti ca s řaẓ.”

37 Awařen-a banen-dd d lemliḥ i Firɛun d marra imsexxaren nnes. ^■  

38 Xenni inna Firɛun i imsexxaren nnes: “Ma izemmar ad ittwaf ca n weryaz amecnaw wa i di izeddeɣ Arruḥ n AREBBI?” ^■   39 Uca inna Firɛun i Yusuf: “Umi AREBBI immeř ac-dd marra aya, x uya war din yeǧi wenni ɣar iǧa řefhamet d tiɣit amecnaw cek. 40 Cek ad tiřid x taddart inu u i wawař nnek ad iṭaɛ řgens inu marra. Mɣir x řɛarc waha ad iřiɣ necc d ameqqran xak.” ^■   41 Yarni inna Firɛun i Yusuf: “Xzar, ggiɣ cek x marra tammurt n Miṣra.” 42 Uca ikkes Firɛun taxadent nnes zeg ufus nnes, igga i-tt deg ufus n Yusuf uca issyarḍ as arruḍ n řeqṭen azdad uca igga as taseddect n wureɣ deg yiri nnes. 43 Issenya i-t di tkarrust wiss tnayen i tuɣa ɣares uca řaɣan am gguren zzates: “Qewsem!” Ammu i t iqeddem marra i tmmurt n Miṣra. 44 Inna Firɛun i Yusuf: “Necc d Firɛun, břa cek uřa d ijj ma ad igeɛɛed afus nnes niɣ aḍar nnes di marra temmurt n Miṣra.” 45 Iřaɣa Firɛun i Yusuf s yisem n Ṣafnat-Faɛniḥ uca iwca as Asnat d tamɣart, tenni d yeǧis n Futi-Faraɛ, akehhan n Un. Uca ijuř Yusuf di temmurt n Miṣra. 46 Tuɣa Yusuf d mmis n třatin n iseggʷusa řami ibedd netta zzat i Firɛun, ajeǧid n Miṣra, uca iffeɣ Yusuf zzat i Firɛun uca ijuř x marra temmurt n Miṣra.

47 Uca tesseɣmi-dd temmurt di sebɛa n iseggʷusa s tyawant. ^□   48 Issmun marra macca n sebɛa n iseggʷusa n tyawant, inni tuɣa di temmurt n Miṣra uca ixemmeř macca di tneddam. Macca n iyyaren i d as dd-innḍen i kuř tandint, ixemmeř i-t dayes daxeř di tendint. 49 Yusuf ixemmeř aṭṭas n imendi, anect n ijdi n řebḥar, ařami war izemmar ad ittwaḥseb, minzi tuɣa-t břa řeḥsab.

50 Qbeř ma ad dd-yas useggʷas amezwaru n řaẓ, mmarenyen-dd ɣar Yusuf tnayen n iḥenjiren inni d as dd-turuw Asnat, yeǧis n Futi-Faraɛ, akehhan n Un. ^■   51 Isemma Yusuf amenzu Manassa, minzi inna: “AREBBI aqa issettu ayi marra tamara inu d marra taddart n baba.” ^□   52 Wiss tnayen isemma t Ifrayim, minzi, inna: “AREBBI igga ayi s řɣiǧet di temmurt n řeḥṣaret inu.” ^□  

53 Xenni kemmřen sebɛa n iseggʷusa n ufeyyeḍ n řɣiǧet nni ikkin x temmurt n Miṣra. 54 Uca bdan ad dd-asen sebɛa n iseggʷusa n řaẓ, am mammec xas issiweř Yusuf. Tuɣa řaẓ di marra timmura, maca di marra tammurt n Miṣra tuɣa dayes ɛad aɣrum. ^■   55 Ařami tuɣa řaẓ di marra tammurt n Miṣra, isɣuyy řgens ɣar Firɛun x weɣrum. Uca inna Firɛun i marra Imiṣriyyen: “Ruḥem ɣar Yusuf, ggem min d awem ɣa yini!” 56 Ařami tuɣa řaẓ izeǧeɛ x marra tammurt, yarzem Yusuf x marra min tuɣa ixemmeř uca izzenz i-t i Imiṣriyyen, minzi tuɣa řaẓ idweř imɣar di temmurt n Miṣra. 57 Zi marra timmura usin-dd iwdan ɣar Miṣra ɣar Yusuf ḥima ad sɣen, minzi di marra timmura tuɣa řaẓ imɣar aṭṭas.