1 Imsar awarni man aya belli awarrad n ujeǧid n Miṣra d uxebbaz dennben ḍidd i siditsen, ajeǧid n Miṣra. ^□   2 Iffugem Firɛun x tnayen n imsexxaren icenɛen nnes, x umeqqran n iwarraden u x umeqqran n ixebbazen. 3 Igga i-ten di řeḥbes di taddart n řqebṭan n iɛessasen n arrimet di taddart n řeḥbes mani iḥebbes Yusuf. 4 Řqebṭan n iɛessasen n arrimet igga Yusuf d ameḥday nsen, uca netta tuɣa ittsexxar xasen. Ammu tuɣa ussan d iziraren di řeḥbes. 5 Urjin tarjit, kuř ijjen zzaysen yurja di ǧiřet nni tarjit nnes s řmeɛna nnes, ammu awarrad uřa d axebbaz n ujeǧid n Miṣra, inni tuɣa ittwaḥebbsen di taddart n tɛessast.

6 Uca yusa-dd ɣarsen Yusuf x ṣṣbeḥ, ixzar daysen uca iẓra i-ten ttqellqen. 7 Netta isseqsa imsexxaren icenɛen n Firɛun, inni tuɣa akides di řeḥbes di taddart n sidis, inna: “Maɣar barecnen udmawen nwem ass-a qaɛ ammu?” 8 Nitni nnan: “Aqa nurja tarjit, war da wi tt ɣa ifekken.” Inna asen Yusuf: “Ma war ǧin ca ifessaren zi AREBBI? Iwa, ɛawdem ayi tent řexxu!”

9 Xenni iɛawed umeqqran n iwarraden tarjit nnes i Yusuf, inna as: “Necc di tarjit inu ẓriɣ tazayart zzati tbedd.

10 Tazayart nni ɣares třata n tseḍwin. Xmi tessendiy, ittgeɛɛad nnuwwar nnes u ɣar izekkunen nnes iban-dd řḥebb n uḍiř yiweḍ.

11 Uca řkas n Firɛun tuɣa-t ɣari deg ufus inu uca ksiɣ aḍiř nni uca ɛessareɣ t di řkas n Firɛun uca sseɛduɣ řkas ɣar ufus n Firɛun.”

12 Inna as Yusuf: “D wa d afessar nnes: třata n tiseḍwin aqa d třata n wussan.

13 Ɛad třata n wussan xenni ad ac issgeɛɛed Firɛun azeǧif nnek uca ad cek yarr ɣar tsexxart nnek, ad tesseɛdud řkas i Firɛun deg ufus nnes, am mammec tuɣa tasɣart nnek zic řami cek tuɣa d awarrad nnes.

14 Maca ɛqeř xafi xmi i d ac dd ɣa yas řxar, ttzawgeɣ cek ad akidi tegged s tmexsiwt icewwaren uca ejj Firɛun ad xafi iɛqeř uca fekk ayi-dd zi taddart-a.

15 Minzi ucaren ayi zi temmurt n Iɛibraniyyen u da war ggiɣ x min xef dayi i ɣa ggen deg weḥfur n imeḥbas.”

16 Řami iẓra umeqqran n ixebbazen belli ifessar as mliḥ, inna i Yusuf: “Uřa d necc ẓriɣ di tarjit inu třata n tsuǧatin s weɣrum d acemřař x uzeǧif inu.

17 Di tsuǧet n sennej tuɣa dayes aṭṭas n macca i Firɛun i igga uxebbaz u ijḍaḍ ttᵉtten zi tsuǧet i iǧan x uzeǧif inu.”

18 Yarra-dd xas Yusuf, inna: “D wa d afessar nnes. Třata n tsuǧatin d třata n wussan.

19 Ɛad třata n wussan xenni ad xak issgeɛɛed Firɛun azeǧif nnek uca ad cek yayeř x ict n tcejjart u ijḍaḍ ad ccen aysum nnek.” ^□  

20 Deg wass wiss třata, ass n wexřaq n Firɛun, imsar belli issewjed ijj n umensi i marra imsexxaren nnes uca issgeɛɛed azeǧif n umeqqran n iwarraden u azeǧif n umeqqran n ixebbazen tuɣa-t jar imsexxaren nnes. 21 Uca netta yarra ameqqran n iwarraden ɣar řxedmet nnes n uwarrad, u wanita iwca ɛawed aɣarraf deg ufus n Firɛun. 22 Maca ameqqran n ixebbazen yuyeř i-t, am mammec d as ifessar Yusuf. 23 Maca ameqqran n iwarraden war ifekkar ca di Yusuf, ittu t.