1 Nedhen xenni Yusuf ɣar Miṣra. Putifar, amsexxar icenɛen n Firɛun, řqebṭan n iɛessasen n arrimet, ijj n Umiṣri, isɣa i-t zeg ufus n Ismaɛiliyyen, inni din t yiwyen. ^■   2 Tuɣa SIDI ak-d Yusuf. Tuɣa netta d aryaz ifřeḥ uca tuɣa-t di taddart n sidis, Amiṣri. ^■   3 Iẓra sidis belli SIDI tuɣa-t akides u belli SIDI issekkʷaḍ s ufus nnes marra min tuɣa ittegg.

4 Ammu i yufa Yusuf arḍa di tiṭṭawin nnes, isexxar as. Uca igga i-t Putifar d ameḥday x taddart nnes uca igga as deg ufus marra min ɣares. 5 Zeg wass min di t igga x taddart nnes u x marra min ɣares, ibark SIDI taddart n Umiṣri di ṭṭweɛ n Yusuf. Tuɣa lbaraka n SIDI x marra min ɣares, am daxeř n taddart, am barra deg iyyar. 6 Marra min ɣares, ijja i-t deg ifassen n Yusuf, ař war issin netta ca ktar mɣir aɣrum i ittett. Tuɣa Yusuf icna deg waddud u udem nnes dayes aẓri.

7 Imsar awarni man aya, aqa tamɣart n sidis tenḍar tiṭṭawin nnes di Yusuf, tenna: “Zid, ṭṭess akidi.”^■   8 Maca netta yugi, inna i temɣart n sidis: “Xzar, sidi inu war issin min iǧan di taddart řami da akides ǧiɣ. Marra min ɣares, igga i-t deg ufus inu. 9 Netta war iǧi sennej inu di taddart-a, war d ayi iṭṭif s walu mɣir cem, umi teǧid d tamɣart nnes. Mammec i ɣa ggeɣ ljarima aya tameqqrant am tanita uca ad ggeɣ ddenb ak-d AREBBI!”

10 Tuɣa tessawař ak-d Yusuf kuř ass, war ɣares ittesři ḥima ad iṭṭes ṭṭarf nnes u ḥima ad akides yiři.

11 Deg ijj n wass temsar, umi dd-yudef ɣar taddart ḥima ad igg řxedmet nnes, war tuɣi din uřa d ijj zeg yeryazen n taddart.

12 Xenni tᵉṭṭeff i-t zeg warruḍ nnes, tenna: “Araḥ-dd zzeř akidi!” Řexdenni ijja as netta arruḍ nnes deg ufus, yarweř, iffeɣ barra.

13 Umi teẓra belli ijja as arruḍ nnes deg ufus nnes, yarweř ɣar barra,

14 třaɣa i aytbab n taddart, tenna asen: “Xzarem, aqa netta yiwy aneɣ-dd aryaz Aɛibrani, ḥima ad xaneɣ iḍḥec. Yusa-dd ɣari ḥima akidi iṭṭes uca necc sɣuyyeɣ s jjehd.

15 Umi isřa belli ssgeɛɛdeɣ tmijja inu uca sɣuyyeɣ, ijja ɣari arruḍ nnes, yarweř, iffeɣ barra.”

16 Uca nettat tegga arruḍ nnes zzates, ař dd ɣa yas sidis ɣar taddart.

17 Xenni tessiweř akides s wawařen nni d ijjen, tenna: “Amsexxar Aɛibrani wenni dd-tiwyed ɣarneɣ, yusa-dd ɣari ḥima ad ayi issɛurra.

18 Umi ssgeɛɛdeɣ tmijja inu, sɣuyyeɣ, ijja arruḍ nnes ɣari uca yarweř barra.”

19 Sidis isřa i wawařen inni d as tenna temɣart nnes, tenna: “Ammu i dayi igga umsexxar nnek!”, uca ixeyyeq aṭṭas. 20 Iṭṭef i-t sidi n Yusuf, igga i-t di řeḥbes, mani tuɣa imeḥbas n ujeǧid. Ammu i iqqim di řeḥbes. ^■  

21 Maca SIDI tuɣa-t ak-d Yusuf uca isswiẓẓeḍ ɣares s tmexsiwt icewwaren uca iwca as arḍa di tiṭṭawin n umeqqran n řeḥbes. 22 Uca ameqqran n řeḥbes yarra marra imeḥbas nni tuɣa di řeḥbes sadu ufus n Yusuf. Marra min tuɣa tteggen din tuɣa ittekk x ufus nnes. 23 Ameqqran n řeḥbes war d as iqqim min xef ɣa innehweř zi min tuɣa sadu ufus nnes, minzi SIDI tuɣa-t ak-d Yusuf. Min ma tuɣa ittegg netta, SIDI issekkwaḍ i-t.