1 Di řweqt d ict ihwa Yahuda iffeɣ x aytmas, uca iwta iqiḍan nnes ɣar yijj n weryaz d Adullamiti wenni umi qqaren Ḥira. 2 Uca iẓra din Yahuda yeǧis n ijj n weryaz d Akenɛani wenni umi qqaren Cuɛ. Iwyi tt-i-dd d tamɣart uca yudef xas. ^■   3 Nettat teksi s ddeyset uca turuw-dd aḥenjir uca isemma t Yahuda Ɛir. 4 Uca teksi ɛawed s ddeyset, turuw-dd aḥenjir uca isemma t Unan. 5 Uca turuw-dd ɛawed aḥenjir uca tsemma t Cayla. Netta tuɣa-t di Kazib umi d as t-i-dd turuw. ^■   6 Yahuda iksi tamɣart i Ɛir, amenzu nnes. Isem nnes tuɣa qqarent as Tamar. 7 Ɛir, amenzu n Yahuda, tuɣa-t d aɛeffan di tiṭṭawin n SIDI uca inɣa i-t SIDI. 8 Xenni inna Yahuda i Unan: “Adef x temɣart n umac, mřec akides deg wemcan n umac, tejjed-dd zzariɛet i umac.” 9 Maca Unan issen belli zzariɛet war tᵉttiři nnes. Uca ammu imsar, umi yudef x temɣart n umas, inɣeř i-tt di temmurt, ḥima war ittic zzariɛet i umas.

10 Min igga tuɣa d aɛeffan di tiṭṭawin n SIDI uca inɣa i-t uřa d netta.

11 Xenni inna Yahuda i Tamar, tasřit nnes: “Qqim am tajjač di taddart n babam, ař ɣa imɣar mmi Cayla!”, minzi inna: “Aqa war ittmetti uřa d wa amecnaw aytmas.” Uca truḥ Tamar, tezdeɣ di taddart n babas.

12 Ɛdun wussan aṭṭas, xenni temmut yeǧis n Cuɛ, tamɣart n Yahuda. Yahuda yarezzu ad ittwaɛezza uca igeɛɛed ɣar tḥimart n wuǧi nnes ɣar Timnat, netta d umeddukkeř nnes Ḥira zi Adullam.

13 Ɛeřmen as i Tamar uca nnan: “Xzar, aḍeggʷař nnem igeɛɛed ɣar Timnat, ad iřs uǧi nnes.”

14 Xenni tekkes xas arruḍ n tajjač, třeḥḥef s tkenbuct uca teɣnes ixef nnes uca truḥ ad teqqim ɣar wadaf n Ɛaynayim, wenni iǧan deg webrid ɣar Timnat, minzi teẓra Cayla imɣar, u nettat tuɣa war d as temmewc d tamɣart.

15 Uca iẓra i-tt Yahuda, iḥesb i-tt d lfasda, minzi tuɣa-tt třeḥḥef i uɣembub nnes.

16 Uca imeyyeř ɣares ɣar webrid, inna as: “Ejj ayi ad xam adfeɣ!”, minzi netta tuɣa war issin belli nettat d tasřit nnes. Nettat tenna: “Min d ayi ɣa tewced ḥima ad xafi tadfed?”

17 Yarra: “Necc ad am-dd ssekkeɣ ijj n iɣayḍ d ameẓyan zeg wuǧi.” Tenna as: “Mɣir ewc ayi ijj n warhan, ař d ayi t-i-dd i ɣa tessekked.”

18 Inna: “Man aḍman i-dd am i ɣa wceɣ?” Nettat tenna: “Taxadent nnek n ucemmiɛ d ttesbiḥ nnek d taɣɣarct i ɣarek deg ufus.” Uca iwca as ten, yudef xas uca teksi zzayes ddeyset.

19 Uca tekkar, truḥ, tekkes xas takenbuct nnes uca tyarḍ arruḍ nnes n tajjač.

20 Uca issekk Yahuda iɣayḍ d ameẓyan x ufus n umeddukkeř nnes Adullami, ḥima ad iṭṭef ɛawed aḍman zeg ufus n temɣart, maca war tt yufi. 21 Isseqsa iryazen x wemcan nnes, inna: “ Mani teǧa temɣart n ffarq-ccɣeř nni tuɣa iqqimen x webrid ɣar Ɛanayim?” Nitni arrin-dd xas: “War da tuɣi qaɛ ca n temɣart n ffarq-ccɣeř ɣar zzawect.” 22 Xenni iɛqeb-dd ɣar Yahuda, inna: “War tt ufiɣ ca, uřa d iryazen n wemcan nni nnan: ‘War da tuɣi qaɛ ca n temɣart n ffarq-ccɣeř ɣar zzawect.’ ” 23 Uca inna Yahuda: “Ejj i-tt ad ten tejj ɣares, ḥima war nettiři d řɛar. Xzar, necc aqa ssekkeɣ iɣayḍ-a d ameẓyan, maca cek war tt tufid.”

24 Ɛřaḥař awarni třata n iyuren temsar, aqa xebbaren Yahuda, nnan: “Tamar, tasřit nnek, aqa tessefsed ixef nnes uca řexxu nettat aqa-tt s ddeyset s farq-ccɣeř nnes.” Xenni inna Yahuda: “Suffɣem tt-i-dd, teggur ad tecmeḍ!” 25 Umi tt-i-dd yiwyen ɣar barra, tessekk-dd ijjen ɣar uḍeggʷař nnes, maḥend ad yini: “Zeg weryaz n řeḥwayej-a, aqa ksiɣ s ddeyset.” Tenna ɛad: “Arzu xenni wi iřan taxadent-a n ucemmiɛ d ttesbiḥin-a d taɣɣarct-a.” 26 Yahuda iɛeqř i-ten, inna: “Aqa-tt d nican xafi minzi war tt wciɣ d tamɣart i Cayla mmi.” War iqqim issen i-tt ɛad.

27 Di řweqt umi dd-tiweḍ ad dd-taruw, aqa da acniwen deg uɛeddis nnes. ^■   28 Umi dd-tiweḍ řweqt ad dd-taruw, issuffeɣ-dd afus n ijjen uca teksi t řqabřa uca tcedd i-t ɣar ufus nnes s ufiřu d azeggʷaɣ, tenna: “Wa i dd-iffɣen d amezwar.” 29 Řami dd yarra afus nnes, iban-dd umas uca tenna: “Mammec teggid tennufsřed. Xak i yarsa unufseř!” Uca semman t Fariṣ. ^□  ■   30 Awarni man aya iffeɣ-dd umas, wenni ɣar iǧa ufiřu azeggʷaɣ deg ufus nnes uca isemma t Zaraḥ. ^□