1 Uca izdeɣ Yaɛqub di temmurt n Kenɛan mani tuɣa izeddeɣ babas am ubarrani. ^■  

2 Ina d imezruyen n yinni dd-ittwaxeřqen zi Yaɛqub.

Řami tuɣa ɣar Yusuf sbeɛṭac n iseggʷusa, yarwes uǧi n babas ak-d aytmas. Tuɣa Yusuf d aḥudri ittsexxar ɣar iḥenjiren n Bilha d iḥenjiren n Zilpa, timɣarin n babas uca issiweḍ Yusuf ijj n řexbar d aɛeffan xasen i babatsen. 3 Uca ixs Israil Yusuf qaɛ x marra iḥenjiren nnes, minzi tuɣa-t ɣares d mmis x tewsar nnes uca igga as arruḍ aqarqac izewwqen. 4 Řami ẓrin aytmas belli babas ittexs i-t qaɛ xasen, carhen t uca war zemmaren akides ssiwřen ɛad s řehna.

5 Uca yurja Yusuf ict n tarjit, iɛawd i-tt i yaytmas. S uya nitni dewřen carhen t ɛad ktar. 6 Inna asen: “Sřem řexxu tarjit-a nni arjiɣ. 7 Xzar, tuɣa nettcedda icewwafen n imendi di řwest n yeyyar. U xzar, taqebbiḍt inu tbedd, teqqim tbedd u icewwafen nwem nni tuɣa d as dd-innḍent, qewsent i tqebbiḍt inu.” 8 Arrin-dd xas aytmas: “Ma ad tḥekmed zeɛma nican xaneɣ am ujeǧid niɣ ad xaneɣ tseǧḍed d aseǧeḍ?” Uca carhen t ɛad ktar di ssibbet n tirja nnes d wawařen nnes. 9 Uca yurja ɛad tarjit nneɣni, iɛawd i-tt i yaytmas, inna: “Xzar, arjiɣ ɛad tarjit nneɣni. Xzar tafuct d uyur d ḥiṭac n itran bendqen ayi.”

10 Iɛawed i-tt i babas d aytmas uca iwebbex i-t babas, inna as: “Mana tirja aya i tarjid? Ma ad dd-nas jmiɛ, necc d yemmac d aytmac, ad ac nbendeq ɣar temmurt?”

11 Aytmas usmen zzayes. Maca babas iɛqeř x wawařen-a. ^■  

12 Uca ruḥen aytmas ḥima ad arewsen uǧi n babatsen ɣar Cakim.

13 Xenni inna Israil i Yusuf: “Ma war arewsen aytmac uǧi ɣar Cakim? Zid, ad cek ɣarsen ssekkeɣ.” Uca yarra-dd xas: “Aqa ayi da!”

14 Uca inna as: “Ruḥ cek, xzar muxas ǧan aytmac d muxas ǧan wuǧi uca awi ayi-dd řexbar ɛawed.” Ammu i-t issekk ɣar řewḍa n teɣzurt n Ḥabrun uca yiweḍ-dd ɣar Cakim.

15 Yufa i-t ijj n weryaz umi iweddar deg iyyar. Isseqsa t weryaz, inna: “Min tarezzud?”

16 Inna: “Arezzuɣ x aytma. Ttzawgeɣ cek, ini ayi mani arewsen.”

17 Aryaz yarra-dd: “Aqa muṭṭiyen iqiḍan nsen ssa, necc sřiɣ asen qqaren: ‘Ejj aneɣ ad nraḥ ɣar Dutan.’ ” Řexdenni iruḥ Yusuf awarni aytmas uca yufa i-ten di Dutan. ^□  

18 Umi t ẓrin zi řaggʷaj, qbeř ma ad ɣarsen dd-iqarreb, mmɛahaden ḍidd nnes ḥima ad t nɣen,

19 nnan ijj i wenneɣni: “Xzar, yusa-dd bu-tirja nni! 20 Zid řexxu, ejj aneɣ ad t nᵉnneɣ uca ad t nenḍar deg wanu, ad nini: ‘Ca n řweḥc d aɛeffan icca i-t, uca ad nẓar min ɣa iřint tirja nnes.” 21 Isřa Rubin man aya uca issenjem i-t zeg ifassen nsen, inna: “War t nneqq ca!” ^■   22 Inna asen ɛawed Rubin: “War sizziř idammen! Nḍarem t deg wanu aya da di řexřa. War xas tteggem afus!”, ḥima ad t issenjem ammu zeg ifassen nsen uca ad t yarr ɣar babas.

23 Uca imsar, umi dd-yiweḍ Yusuf ɣar aytmas, kksen nitni arruḍ x Yusuf, arruḍ aqarqac izewwqen nni xas tuɣa, 24 uca ṭṭfen t, nḍaren t deg wanu. Maca anu tuɣa ixwa, war dayes tuɣi ca aman. 25 Uca qqimen ad ccen aɣrum, ssgeɛɛden tiṭṭawin nsen, zřin ijj n ukaravan n Ismaɛiliyyen i dd-yusin zi Jilɛad. Iřeɣman nsen arbun řeɛṭur d řefwah n balsam d mirru, gguren ad t awyen ɣar Miṣra. 26 Xenni inna Yahuda i yaytmas: “Man řefḍeř mařa nenɣa umatneɣ uca ad neffar idammen nnes? 27 Ɣawrem, ad t nezzenz i Ismaɛiliyyen, war ittiři ufus nneɣ xas, aqa d umatneɣ d aysum nneɣ.” Uca sřin aytmas ɣares. 28 Am dd-ɛdun tujjar n Midyan, ssgeɛɛden-dd Yusuf zeg wanu uca zzenzen t s ɛicrin n uqiyyat n nnuqart i Ismaɛiliyyen inni dd-yiwyen Yusuf ɣar Miṣra. ^■  

29 Řami dd-idweř Rubin ɣar wanu, war din yufi Yusuf ɛad deg wanu. Xenni icarreg arruḍ nnes. 30 Idweř ɣar aytmas uca inna: “Aḥenjir war din iǧi ɛad. I necc, mani i ɣa raḥeɣ?” 31 Xenni ksin arruḍ n Yusuf uca ɣarṣen i yijj n iɣayḍ d ameẓyan uca marɣen arruḍ s idammen. 32 Ssekken ijjen s warruḍ aqarqac izewwqen, jjin t ad t yawi ɣar babatsen, nnan: “D wa i nufa. Xzar řexxu, ma wah niɣ lla arruḍ n mmic?” 33 Uca netta iɛeqř i-t, inna: “Arruḍ n mmi i yeǧa! Ca n řweḥc icca i-t, Yusuf s tidett bettqen t!” 34 Icarreg Yaɛqub arruḍ nnes uca yarḍ ict n txancet n wecḍan x tejɛinna nnes, icḍen x mmis aṭṭas n wussan. 35 Kkaren marra iḥenjiren nnes d marra tiḥenjirin nnes maḥend ad t ɛezzan, ɛad netta war ixs ad ittwaɛezza, inna: “Minzi ittxeṣṣa ayi ad dd-hwiɣ nnuryeɣ ɣar řaxart.” Ammu xas isɣuyy babas. ^■  

36 Imidiyaniyyen zzenzen t di Miṣra i Putifar, amsexxar amcenneɛ n Firɛun, řqebṭan n iɛessasen n arrimet. ^■