1 Řami iẓra Yaɛqub belli aqa din imendi di Miṣra, xenni inna i iḥenjiren nnes “Maɣar teqqimem txezzarem ijjen deg wenneɣni?” 2 Inna: “Aqa necc sřiɣ belli din imendi di Miṣra. Ruḥem dinni uca sɣem aneɣ-dd ssenni imendi, ḥima ad neqqim neddar uca war nettmetti ca.” ^■   3 Hwan ɛecra n wawmaten n Yusuf maḥend ad raḥen ad sɣen imendi zi Miṣra. 4 Maca Yaɛqub war issekk Binyamin, umas n Yusuf, ak-d aytmas, minzi inna: “Ḥima war d as ittemsar ca n řḥajjet d taɛeffant.”

5 Jar inni dd-yusin dinni, usin-dd ɛawed ayt n Israil maḥend ad sɣen macca, minzi tuɣa din řaẓ di temmurt n Kenɛan. 6 Yusuf tuɣa d řḥakem x temmurt uca izzenz imendi i marra imezdaɣ n temmurt. Umi dd-iwḍen aytmas n Yusuf, bendqen as s uɣembub nsen ɣar temmurt. ^■   7 Yusuf iẓra aytmas uca iɛqeř i-ten, maca igga ixef nnes axmi war ten issin uca issiweř akidsen s řeqsaḥet, inna asen: “Manis dd-tusim?” Nnan: “Zi temmurt n Kenɛan maḥend ad nseɣ macca.” 8 Yusuf iɛeqř aytmas, maca nitni war t ɛqiřen ca. 9 Ifekkar Yusuf di tirja nni tuɣa xasen yurja, inna asen: “Kenniw d ibergagen i teǧam, tusim-dd ḥima ad tẓarem mani war tᵉttwaḥḍi temmurt.” ^■  

10 Arrin xas: “Lla, a sidi, ɛad imsexxaren nnek usin-dd maḥend ad sɣen macca.

11 Marra neccin aqa aneɣ d tarwa n ijj n weryaz. Aqa aneɣ d iryazen d imtiqqen, imsexxaren nnek war ǧin ca d ibergagen.”

12 Netta yarra-dd xasen: “Lla, kenniw tusim-dd maḥend ad tẓarem tuɛɛaryent n temmurt. ”

13 Nnan nitni: “Neccin d imsexxaren nnek, aqa aneɣ di tenɛac n wawmaten, tarwa n ijj n weryaz di temmurt n Kenɛan. Aqa amaẓuẓ aqa-t ak-d babatneɣ u wenneɣni war iǧi ɛad.” ^■  

14 Inna asen Yusuf: “Ma war d awem t nniɣ, umi nniɣ: ‘Aqa kenniw d ibergagen!’

15 S uya tᵉttwaqeǧbem. S tidett am iddar Firɛun, kenniw war dd-tteffɣem ssa, mɣir xmi dd ɣa yas umatwem amaẓuẓ danita!

16 Sekkem ijj n zzaywem, maḥend ad dd-yawi umatwem. Xenni kenniw ad tᵉttwaḥebbsem uca awařen nwem ad ttwaqeǧben, ma daywem řaman. Niɣ lla, s tidett am iddar Firɛun, aqa kenniw d ibergagen!”

17 Uca igga ten třata n wussan di řeḥbes.

18 Deg wass wiss třata inna asen Yusuf: “Ggem aya, ḥima ad teqqimem teddarem, necc tteggʷdeɣ AREBBI.

19 Mařa kenniw d iryazen d imtiqqen, jjem xenni ijj n umatwem ad iqqim icarf di taddart mani tᵉttwaḥebbsem kenniw, xenni ruḥem, ksim imendi i řaẓ n aytbab n taddart nwem. 20 Awyem-dd xenni umatwem ameẓyan maḥend ad ttwaqeǧben wawařen nwem, war tᵉttmettim ca.” Uca nitni ggin amenni. ^■   21 Nnan i wayawya: “S tidett aqa ittxeṣṣa aneɣ ad dd-narr ddeyyet n umatneɣ, aqa neẓra řḥeṣran n řeɛmar nnes umi d aneɣ ittar aḥinni, maca war d as nesři ca! S uyenni dd-yusa řḥeṣran-a xaneɣ .” 22 Yarra xasen Rubin, inna: “Ma war d awem t nniɣ, umi nniɣ: ‘War xeṭṭam ca ak-d uḥenjir!’, maca kenniw war tesřim ca. Xzar, idammen nnes ttwattaren řexxu!” ^■   23 Nitni war ssinen belli ifhem asen Yusuf, minzi tuɣa din ijj n uturjman jar asen. 24 Inneqřeb xasen uca isɣuyy. Awarni as inneqřeb-dd ɛawed ɣarsen, issiweř akidsen, iksi zzaysen Cimɛun uca iḥebbes i-t zzat i tiṭṭawin nsen. 25 Yumur Yusuf maḥend ad ccuren tixuncay nsen s imendi u ad ggen tmenyat n nnuqart di kuř ict n txancet nsen uca wcin asen macca i webrid. U ammu i kidsen ggin. 26 Ssarbun imendi nsen x yeɣyař nsen uca ffɣen ssenni.

27 Umi yarzem ijjen zzaysen taxancet nnes ḥima ad issecc aɣyuř nnes ɣar mani i ɣa ssensen, iẓra nnuqart nnes deg arzam n uqemmum n txancet. 28 Inna i yaytmas: “Nnuqart inu tedweř ayi-dd. Xzar, aqa-tt da di txancet inu!” Řexdenni ibedd asen wuř, arjijen uca nnan i wayawya: “Manawya i d aneɣ ittegg AREBBI?” 29 Uca reḥḥgen ɣar babatsen Yaɛqub di temmurt n Kenɛan uca ɛawden as marra min xasen ikkin, nnan: 30 “Aryaz, bab n temmurt, issiweř akidneɣ s řeqsaḥet, iḥesb aneɣ d ibergagen n temmurt. 31 Nenna as neccin: ‘Neccin d iryazen d imtiqqen, ɛemmarṣ war neǧi d ibergagen. 32 Aqa-neɣ di tenɛac n wawmaten, iḥenjiren n babatneɣ. Ijjen war iqqim, amenzu aqa-t ass-a ak-d babatneɣ di temmurt n Kenɛan.’ 33 U aryaz nni, bab n temmurt, inna aneɣ: ‘Awarni aya ad ssneɣ ma aqa kenniw d imtiqqen. Ad kidi tejjem ijjen zeg aytmatwem uca ad teksim macca i řaẓ nni din ɣar aytbab n taddart nwem, xenni ffɣem. 34 Awyem-dd da umatwem ameẓyan, xenni ad ssneɣ belli war teǧim d ibergagen, maca d imtiqqen uca ad awem dd-arxuɣ i wamatwem nwem uca ad traḥem ad tjuřem di temmurt.’ ” 35 Umi ssexwan tixuncay nsen, ḥekkaren belli di kuř txancet n kuř ijjen, dayes tacyart s nnuqart nnes. Ẓrin nitni d babatsen ticyar s nnuqart nsen uca tudef i-ten tiggʷudi. ^■  

36 Inna asen babatsen Yaɛqub: “Aqa tḥarrmem ayi zeg iḥenjiren inu! Yusuf war dd-iḍhar ɛad uřa d Cimɛun, uca řexxu tᵉttexsem ad tnedhem Binyamin. Marra man aya ittemsaren di řeɛkes inu!” 37 Xenni issiweř Rubin ɣar babas, inna: “Ad tenɣed tnayen n iḥenjiren inu, mařa war d ac t-i-dd-arriɣ. Ewc ayi t deg ufus inu, necc aqa ad ac t-i-dd arreɣ!” 38 Maca netta inna as: “Mmi war ittriḥ ca akidwem, minzi umas immut u netta weḥḥdes i d ayi iqqimen. Mařa iřeqf i-t ca n řɣar deg webrid nni i ɣa tekkem, ad tessehwam ccib inu s wecḍan ɣar řaxart.”