1 Dina, yeǧis n Liya, tenni dd-turuw i Yaɛqub, teffeɣ ḥima ad temmeřqa ak-d yessis n temmurt. ^■   2 Cakim, mmis n Ḥamur Aḥiwi, řḥakem n temmurt nni, iẓra i-tt, iksi tt uca iṭṭeṣ akides, issɛiǧet i-tt. 3 Iṭṭarbeṭ di Dina, yeǧis n Yaɛqub, u netta ixs taḥenjirt uca issiweř ɣar wuř n tḥenjirt. 4 Issiweř Cakim ɣar Ḥamur babas, inna as: “Awyi ayi-dd tabřiɣt-a d tamɣart.”

5 Řami isřa Yaɛqub belli Cakim iḍeyyeɛ ccaraf n yeǧis Dina, tuɣa iḥenjiren nnes ak-d řebhayem deg iyyar. Issusem Yaɛqub ařami dd-ɛeqben nitni. 6 Iruḥ Ḥamur, babas n Cakim ɣar Yaɛqub, ḥima ad kis issiweř. 7 Tarwa n Yaɛqub dewřen-dd zeg iyyar uca areggben x řexbar. Xeyyqen x man aya deg wuř u fuggmen aṭṭas, minzi igga řefḍiḥet-a di Israil umi iṭṭeṣ ak-d yeǧis n Yaɛqub. Man aya war icuwwar ad t yegg. 8 Issiweř Ḥamur akidsen, inna: “Mmi Cakim ittexs yeǧitwem, ttzawgeɣ, ad as tt tewcem d tamɣart, 9 uca ad nemḍeggwar. Ad aneɣ tewcem yeǧitwem, kenniw ad teksim yessitneɣ i yixef nwem.

10 Zedɣem akidneɣ, minzi tammurt aqa-tt zzatwem. Zedɣem u uyurem dayes uca ṭṭfem dayes agřa i kenniw.”

11 Uca inna Cakim ɛawed i babas d aytmas: “Ejj ayi ad afeɣ arḍa di tiṭṭawin nwem uca ad wceɣ min d ayi ɣa tinim.

12 U waxxa tessḍeqřem xafi řeḥmeř aṭṭas n ṣṣadaq d ssunan, aqa necc ad wceɣ mecḥař ma d ayi ɣa tinim. Wcem ayi mɣir taḥenjirt d tamɣart.”

13 Arrin iḥenjiren n Yaɛqub x Cakim d Ḥamur, babas, s ict n teḥraymect, minzi aqa issexsar Dina, učmatsen. Nitni ssiwřen,

14 nnan asen: “War nzemmar ad negg ammu, ad newc učmatneɣ i weryaz nni ɛad s řeɛdařyet. Degga d řɛar xaneɣ. ^■  

15 Mɣir s umtawi aya waha ad kenniw nseɛɛef, mařa teggim am neccin, ad ttwaxetnen i marra iwetman nwem.

16 Xenni ad awem newc yeǧitneɣ uca ad neksi yessitwem, ad kidwen nezdeɣ, ad niři d ijj n řgens.

17 Maca mařa war d aneɣ tesřim di tmesřact n wextan, xenni ad neksi yeǧitneɣ uca ad nuyur.”

18 Banen wawařen nsen mliḥ deg imezzuɣen n Ḥamur u deg imejjan n Cakim, mmis n Ḥamur. ^□  

19 Aɛezri war d as icqi ad igg man aya, minzi netta ittexs aṭṭas yeǧis n Yaɛqub u netta tuɣa-t qaɛ mweqqar di marra taddart n babas.

20 Uca usin-dd Ḥamur d mmis Cakim ɣar tewwart n tendint nnes, ssiwřen ak-d yeryazen n tendint, nnan: 21 “Iryazen-a d imhudnen akidneɣ. Ejj aneɣ ad ten nejj ad zedɣen di temmurt-a uca ad dayes uyuren. Xzar, tammurt tewseɛ i nitni ɣar marra iɣezdisen nnes. Neccin ad neksi yessitsen d timɣarin, ad asen newc yessitneɣ. 22 Maca s umtawi aya waha ad seɛɛfen yeryazen-a ḥima ad kidneɣ zedɣen u ḥima ad dewřen d ijj n řgens akidneɣ, mařa marra iryazen i iǧan jar aneɣ ad ttwaxetnen am mammec ttwaxtnen nitni. 23 Řebhayem nsen d agřa nnes d marra řmař nsen, ma war ttiřin nneɣ? Ejj aneɣ ad ten nseɛɛef, xenni ad zedɣen akidneɣ.” 24 Marra inni dd-yusin ɣar tewwart n tendint nnes sřin i Ḥamur d mmis Cakim uca marra iryazen inni dd-yusin ɣar tewwart n tendint nnes, ttwaxetnen. 25 Umi tuɣa ɛad daysen řehriq deg wass wiss třata, temsar bell iḥenjiren n Yaɛqub, Cimɛun d Lawi, aytmas n Dina, aqa kuř ijj zzaysen iksi ssif nnes uca ruḥen ɣar tendint mani d asen ittɣiř aqa dayes řaman uca nɣin marra iryazen. ^■   26 Nɣin Ḥamur d mmis Cakim s řeqḍeɛ n ssif uca ksin Dina zi taddart n Cakim, ffɣen. 27 Tarwa n Yaɛqub usin-dd ɣar yenni ittwanɣen uca keccḍen tandint, minzi nitni ssexsaren učmatsen. 28 Ksin uǧi nsen d ifunasen d tfunasin nsen d yeɣyař nsen d marra min tuɣa di tendint u deg iyyar. 29 Ksin marra agřa nnes uca iwyen-dd marra iḥenjiren d temɣarin nsen d imeḥbas uca ucaren marra min tuɣa di tudrin. 30 Xenni inna Yaɛqub i Cimɛun d Lawi: “Kenniw tessidfem ayi deg imxumbar ařami d ayi tessarzgem ɣar imezdaɣ n temmurt-a, ak-d Ikenɛaniyyen d Ifiriziyyen. D necc ɣari ijj n wuru n yeryazen waha. Mařa ad munen x uzeřmaḍ inu, ad ayi qeẓẓren, ad iřiɣ areyyteɣ, necc d taddart inu.” 31 Nitni nnan: “Ma iɛeddeř xenni ad iḥseb učmatneɣ amecnaw ict n lfasda?”