33
1 Issgeɛɛed Yaɛqub tamuɣři nnes uca iẓra Ɛisu d arbeɛ-mya n yeryazen akides xeccen-dd. Ifarq iḥenjiren x Liya d Raḥil d tnayen n tiyya. 2 Igga tiyya d tarwa nsent ɣar zzat, awarni asent Liya d tarwa nnes u Raḥil d Yusuf d ineggura. 3 Umi iɛdu zzat i tiṭṭawin nsen, ibbendeq ɣar temmurt sebɛa n twařawin ařami dd-yiweḍ ɣar umas. □ 4 Ɛisu yuzzeř-dd ḥima ad t iřqa, idarreɛ as, ingez as x yiri nnes, issudem i-t uca run s tnayen. 5 Xenni issgeɛɛed tiṭṭawin nnes, iẓra timɣarin d iḥenjiren nni uca inna: “Min ɛnan ina inni akidek?” Netta yarra-dd xas: “D tarwa nni iwca AREBBI zeg arḍa nnes i umsexxar nnek.” 6 Uca reḥḥgent-i-dd tiyya, nitenti d tarwa nsent, uca bendqent. 7 Treḥḥeg-dd ɛawed Liya d iḥenjiren nnes uca bendqen. Řexdenni iqarreb-dd Yusuf d Raḥil uca bendqen. 8 Inna as: “Min texsed ak-d ubarru aya n řɛeskar nni řqiɣ?” Netta inna: “Maḥend ad afeɣ arḍa tiṭṭawin n sidi inu!” 9 Inna Ɛisu: “Aqa ɣari aṭṭas, uma inu! Ad yiři i cek min iǧan nnek!” 10 Inna Yaɛqub: “Lla, ttzawgeɣ cek! Mařa ufiɣ řexxu arḍa di tiṭṭawin nnek, ksi arriɣalu inu zeg ifassen inu, maɣar ẓriɣ udem nnek axmi ẓriɣ udem n AREBBI uca tqebřed xafi s řemřaḥet.
11 Ttzawgeɣ cek, ksi lbaraka inu i d ac dd-iwyeɣ, minzi AREBBI imṣurruf akidi s arḍa uca necc ɣari kuřci.” Ikellef i-t uca iksi t.
12 Netta inna: “Ejj aneɣ ad nefsi iqiḍan nneɣ, ad nraḥ. Necc ad raḥeɣ zzatec.”
13 Maca netta inna as: “Sidi inu issen, aqa iḥenjiren-a arehfen u aqa ɣari uǧi d tfunasin urwent ssuṭṭuḍent. Mařa bnadem-a, waxxa mɣir i yijj n wass izeyyar xasent aṭṭas, ad immet wuǧi marra.
14 Ad iɛdu řexxu sidi inu zzat i uɣembub n umsexxar nnes u necc ad dd-aseɣ cwayt cwayt ak-d iṣuraf n řeksibet i iǧan zzati uřa ak-d iṣuraf n iḥenjiren, ař dd ɣa awḍeɣ ɣar sidi inu di Saɛir.”
15 Inna Ɛisu: “Ad jjeɣ řexxu akidek ca n iwdan inni iǧan akidi.” Inna netta: “Umi ddegga? Ejj ayi ad afeɣ arḍa di tiṭṭawin n sidi inu!”
16 Iɛqeb-dd Ɛisu ass nni x webrid ɣar Saɛir.
17 Uca ifsi Yaɛqub iqiḍan nnes, yuyur ɣar Sukkut, ibna din taddart i yixef nnes uca igga iɛiccwen n tseṭṭa i řebhayem nnes. S uya iřaɣa isem n wemcan nni Sukkut. □
18 Umi dd-iɛqeb Yaɛqub zi Fadan-Aram, yusa-dd ɣar Calim, ict n tendint n Cakim, tenni iǧan di temmurt n Kenɛan, uca iwta iqiḍan zzat i tendint. ■
19 Isɣa ṭṭarf n yeyyar mani iwta iqiḍan nnes zeg ifassen n iḥenjiren n Ḥamur, babas n Cakim, s mya n tepyisin n nnuqart. □ 20 Issgeɛɛed din ijj n uɛalṭar min xef temmars tɣarṣt uca iřaɣa as: ‘Arebbi d AREBBI n Israil!’ □